పెద్ది వివాదంపై అనసూయ స్పందన:

రామ్ చరణ్ పెద్ది సినిమాలో జాన్వీ కపూర్ సీన్లపై చెలరేగిన వివాదంపై నటి అనసూయ భరద్వాజ్ సోషల్ మీడియా వేదికగా పరోక్షంగా స్పందిస్తూ ఒక సుదీర్ఘమైన పోస్ట్ పెట్టారు.

సినిమా అనేది కేవలం సమాజానికి ప్రతిబింబం మాత్రమేనని, సమాజాన్ని మార్చే లేదా విద్యావంతులను చేసే పూర్తి బాధ్యతను చలనచిత్రాలపైనే నెట్టేయడం సరికాదని అభిప్రాయపడ్డారు.

సినిమాలను చూస్తూ పిల్లలను పెంచడం కరెక్ట్ కాదని, వెండితెరపై ఏది మంచి, ఏది చెడు అని విశ్లేషించుకునే విచక్షణ, బాధ్యత ప్రేక్షకులకు ఉండాలని హితవు పలికారు.

సినిమా అనేది ఒక ఫిక్షన్ అయినప్పటికీ, అది ప్రజల ఆలోచనలను, ప్రవర్తనను ప్రభావితం చేసే అపారమైన శక్తి గల పవర్‌ఫుల్ మీడియం అని ఆమె నొక్కి చెప్పారు.

ఒకప్పుడు సినిమాల్లో హీరో అంటే మంచివాడని, విలన్ అంటే చెడ్డవాడని స్పష్టత ఉండేదని, కానీ ఈ రోజుల్లో చెడును చూపించారా లేదా ఆ చెడునే గొప్పగా చూపించారా అనే వ్యత్యాసం అస్పష్టంగా మారిందని ఆందోళన వ్యక్తం చేశారు.

తన సిద్ధాంతాల కోసం గతంలో తాను ఒక పెద్ద టెలివిజన్ రియాలిటీ షో నుంచి తప్పుకున్నానని, ఆ తర్వాత ఇండస్ట్రీలో తనకు టాలెంట్ ఉన్నా కూడా అవకాశాలు రాకుండా ఎన్నో ఇబ్బందులు పెట్టారని అనసూయ ఆవేదన వ్యక్తం చేశారు.

తప్పును ప్రశ్నించడం అంటే సృజనాత్మక స్వేచ్ఛపై దాడి చేయడం కాదని, సోషల్ మీడియాలో ఈ వివాదంపై గొంతు ఎత్తిన నెటిజన్లను చూసి తాను సంతోషిస్తున్నానని తెలిపారు.

అనసూయ చేసిన వ్యాఖ్యలు పెద్ది మూవీ మేకర్లను సమర్థిస్తున్నట్లుగా ఉన్నాయని, సినిమా ప్రభావం జనంపై అంతగా ఉండదని చెప్పడమే ఆమె ఉద్దేశమని మెజారిటీ నెటిజన్లు భావిస్తున్నారు.

అనసూయ పోస్ట్‌పై నెటిజన్లు తీవ్రస్థాయిలో మండిపడుతున్నారు. గతంలో అర్జున్ రెడ్డి సినిమా సమయంలో ఇంతటి నీతులు ఎందుకు చెప్పలేదు? అప్పుడు ఎందుకు అంత పెద్ద రచ్చ చేశారంటూ పాత విషయాలను గుర్తు చేస్తున్నారు.

"ఒకరు చేస్తే చమత్కారం, ఇంకొకరు చేస్తే బలత్కారమా?" అంటూ నెటిజన్లు అనసూయ డబుల్ స్టాండర్డ్స్‌ను ఎండగడుతున్నారు. అర్జున్ రెడ్డి టైమ్‌లో యాక్టింగ్ చేశావా లేక ఇప్పుడు యాక్టింగ్ చేస్తున్నావా అంటూ సోషల్ మీడియాలో ఆమెను ఆడుకుంటున్నారు.