ఈపీఎఫ్‌ఓ పరిధిలో పీఎఫ్‌ కంట్రిబ్యూషన్‌కు సంబంధించిన వేతన పరిమితిని రూ.15 వేల నుంచి రూ.25 వేలకు పెంచారు. దీంతో అర్హత ఉన్న ఉద్యోగుల పీఎఫ్‌ కంట్రిబ్యూషన్‌ మొత్తం పెరగనుంది.
జీతంలో ఎంత కట్ అవుతుంది?
ఉద్యోగి ప్రాథమిక వేతనంలో 12 శాతం పీఎఫ్‌ కోసం కేటాయిస్తారు. రూ.25 వేల పరిమితిని పరిగణనలోకి తీసుకుంటే గరిష్ఠంగా రూ.3,000 వరకు ఉద్యోగి వాటాగా జమ అవుతుంది.
గతంలో ఎంత ఉండేది?
రూ.15 వేల వేతన పరిమితి ప్రకారం ఉద్యోగి వాటా గరిష్ఠంగా రూ.1,800గా ఉండేది. కొత్త పరిమితితో ఇది రూ.3,000కి చేరితే నెలకు రూ.1,200 వరకు అదనంగా పీఎఫ్‌లోకి వెళ్లొచ్చు.
చేతికి వచ్చే జీతంపై ప్రభావం
పీఎఫ్‌ కోసం ఎక్కువ మొత్తం మినహాయిస్తే అదే మేరకు నెలవారీ టేక్‌హోమ్‌ శాలరీ తగ్గుతుంది. అంటే ప్రస్తుతం చేతికి వచ్చే నగదు కొంత తగ్గినట్టు ఉద్యోగులకు కనిపిస్తుంది.
ఏడాదికి ఎంత తేడా?
నెలకు అదనంగా రూ.1,200 పీఎఫ్‌కు వెళితే ఏడాదికి రూ.14,400 వరకు అదనపు పొదుపు అవుతుంది. ఈ మొత్తం ఉద్యోగి పీఎఫ్‌ ఖాతాలోనే కొనసాగుతుంది.
భవిష్యత్‌లో ఉపయోగం ఏమిటి?
ఇప్పుడు చేతికి తక్కువ డబ్బు వచ్చినా.. పీఎఫ్‌లో ఎక్కువ మొత్తం నిల్వ అవుతుంది. దీనికి వర్తించే వడ్డీతో కలిపి దీర్ఘకాలంలో ఉద్యోగి రిటైర్మెంట్‌ కార్పస్‌ పెరిగే అవకాశం ఉంటుంది.
EPSపై కూడా ప్రభావం
పీఎఫ్‌ కంట్రిబ్యూషన్‌లో ఒక భాగం ఉద్యోగుల పెన్షన్‌ పథకం (EPS) వైపు వెళ్తుంది. ఈ మొత్తానికి సంబంధించిన ప్రయోజనం పీఎఫ్‌ బ్యాలెన్స్‌ కంటే భిన్నంగా ఉంటుంది.
ఉద్యోగులంద‌రికీ వర్తిస్తుందా?
వేతన పరిమితి మార్పు ప్రభావం ఉద్యోగి జీత నిర్మాణం, పీఎఫ్‌ సభ్యత్వం, సంస్థలో అమలయ్యే నిబంధనలపై ఆధారపడి ఉంటుంది. కాబట్టి ప్రతి ఉద్యోగి జీతంలో ఒకే మొత్తంలో కోత పడుతుందని చెప్పలేం.
పాత PF సమస్యలు ఉంటే?
ఉద్యోగం మారినప్పుడు పాత పీఎఫ్‌ ఖాతా బదిలీ కాకపోవడం, డేట్‌ ఆఫ్‌ ఎగ్జిట్‌ నమోదు కాకపోవడం వంటి సమస్యలు ఎదురవుతుంటాయి. వీటిని ముందుగానే స‌రిచేసుకోవాలి.
ఉద్యోగులు ఏం చేయాలి?
ప్రతి నెల జీతం స్లిప్‌లో PF కంట్రిబ్యూషన్‌ ఎంత మినహాయిస్తున్నారో పరిశీలించాలి. అలాగే EPFO ఖాతాలో కంట్రిబ్యూషన్‌ సరిగ్గా జమ అవుతుందో కూడా క్రమం తప్పకుండా చెక్‌ చేసుకోవాలి.