టోల్ ప్లాజాల దగ్గర నివసిస్తూ ప్రతిరోజూ రాకపోకలు సాగించే వారికి ఆర్థిక భారం తగ్గించడమే ఈ కొత్త విధానం ప్రధాన ఉద్దేశం.
ఏడాదికి రూ.1,500 చెల్లిస్తే చాలు
పట్టణ, మున్సిపల్ పరిధికి బయట ఉన్న టోల్ ప్లాజాల వద్ద అర్హులైన వాహనదారులు ఏడాదికి రూ.1,500 చెల్లించి ఈ పాస్ పొందవచ్చు.
పట్టణ ప్రాంతాల్లో రూ.3,000
మున్సిపాలిటీ లేదా పట్టణ పరిధిలో ఉన్న టోల్ ప్లాజాలకు సంబంధించిన స్థానిక పాస్ కోసం ఏడాదికి రూ.3,000 రుసుము చెల్లించాల్సి ఉంటుంది.
20 కిలోమీటర్ల పరిధిలో నివాసం తప్పనిసరి
సంబంధిత టోల్ ప్లాజా నుంచి 20 కిలోమీటర్ల లోపు నివసించే వారికే ఈ రాయితీ వర్తిస్తుంది. దూర ప్రాంతాల వాహనదారులకు ఈ అవకాశం ఉండదు.
ప్రైవేట్ వాహనాలకే అవకాశం
వ్యక్తిగత అవసరాల కోసం రిజిస్టర్ చేసిన కార్లు వంటి వాణిజ్యేతర వాహనాలకు మాత్రమే ఈ పాస్ అందుబాటులో ఉంటుంది. వాణిజ్య వాహనాలకు ఈ పథకం వర్తించదు.
FASTag తప్పనిసరిగా పనిచేయాలి
పాస్ పొందాలనుకునే వాహనానికి ఇప్పటికే చెల్లుబాటయ్యే FASTag ఉండాలి. అది సరిగా పనిచేస్తుండటంతో పాటు సంబంధిత వాహనానికి అనుసంధానమై ఉండాలి.
అన్ని టోల్ ప్లాజాల్లో చెల్లదు
ఈ పాస్ తీసుకున్నంత మాత్రాన దేశవ్యాప్తంగా ఉన్న టోల్ గేట్లలో ఉచిత ప్రయాణం చేయలేరు. ఏ టోల్ ప్లాజా కోసం పాస్ పొందుతారో అక్కడ మాత్రమే ఉపయోగించుకోవచ్చు.
కొన్ని రహదారులకు మినహాయింపు
క్లోజ్డ్ యూజర్ ఫీ కలెక్షన్ విధానంలో టోల్ వసూలు చేసే జాతీయ రహదారులు, ఎక్స్‌ప్రెస్‌వేలపై ఈ స్థానిక పాస్ చెల్లుబాటు కాదు. ప్రత్యామ్నాయ మార్గాలు ఉన్న చోట ప్రత్యేక నిబంధనలు ఉంటాయి.
సాధారణ వార్షిక పాస్‌కు భిన్నం
ప్రస్తుతం అందుబాటులో ఉన్న FASTag వార్షిక పాస్‌తో దీనిని పోల్చకూడదు. సాధారణ వార్షిక పాస్ ఏడాది లేదా 200 ట్రిప్పుల వరకు వర్తిస్తే, కొత్త స్థానిక పాస్ నిర్దిష్ట టోల్ ప్లాజాకే పరిమితమవుతుంది.
ధరల్లో మార్పులు ఉండొచ్చు
ఈ పాస్‌కు నిర్ణయించిన రుసుములను ఏటా ఏప్రిల్ 1న సమీక్షించే అవకాశం ఉంది. దరఖాస్తు విధానం, నివాస ధ్రువీకరణ పత్రాలు, యాక్టివేషన్ వివరాలను అధికారిక ప్రకటన ద్వారా తెలుసుకోవాలి.