పదవీ విరమణ చేసినవారి ఆర్థిక అవసరాలను దృష్టిలో పెట్టుకుని కేంద్ర ప్రభుత్వం SCSS పథకాన్ని అందుబాటులోకి తెచ్చింది. పోస్టాఫీసులతో పాటు అర్హత కలిగిన బ్యాంకుల్లోనూ ఖాతా తెరవవచ్చు.
ప్రస్తుతం 8.2 శాతం వడ్డీ
ఈ పథకంలో ప్రస్తుతం ఏడాదికి 8.2 శాతం వడ్డీ లభిస్తోంది. పెట్టుబడిపై వచ్చే ఆదాయం ముందుగానే అంచనా వేసుకునే అవకాశం ఉండటం దీని ప్రత్యేకత.
రూ.30 లక్షల వరకు పెట్టుబడి
ఒక వ్యక్తి గరిష్టంగా రూ.30 లక్షల వరకు ఈ పథకంలో జమ చేయవచ్చు. కనీస పెట్టుబడి రూ.1,000 నుంచి ప్రారంభమవుతుంది.
నెలకు రూ.17 వేల ఆదాయం
రూ.25 లక్షలు డిపాజిట్ చేస్తే 8.2 శాతం వడ్డీ ప్రకారం ఏడాదికి రూ.2,05,000 వస్తుంది. అంటే నెలకు సగటున రూ.17,083 ఆదాయానికి సమానం.
ప్రతి మూడు నెలలకు వడ్డీ
ఈ పథకంలో వడ్డీని నెలవారీగా కాకుండా మూడు నెలలకు ఒకసారి చెల్లిస్తారు. ఏప్రిల్, జూలై, అక్టోబర్, జనవరి నెలల్లో వడ్డీ జమ అవుతుంది.
ఐదేళ్ల పెట్టుబడి కాలపరిమితి
SCSS ఖాతా ప్రారంభించిన తేదీ నుంచి ఐదేళ్లు మెచ్యూరిటీ వ్యవధిగా ఉంటుంది. గడువు పూర్తయ్యాక పెట్టుబడిదారులు తమ అసలు మొత్తాన్ని వెనక్కి తీసుకోవచ్చు.
ఐదేళ్లలో రూ.10.25 లక్షల వడ్డీ
రూ.25 లక్షల పెట్టుబడిపై వడ్డీ రేటు 8.2 శాతంగా కొనసాగితే ఐదేళ్లలో మొత్తం రూ.10.25 లక్షల వడ్డీ లభిస్తుంది. అసలు పెట్టుబడితో కలిపి రూ.35.25 లక్షలు అందుతాయి.
ఖాతా గడువు పొడిగింపు
ఐదేళ్ల మెచ్యూరిటీ తర్వాత మరో మూడు సంవత్సరాల పాటు ఖాతాను పొడిగించుకునే వెసులుబాటు ఉంది. ఇందుకోసం నిబంధనల ప్రకారం దరఖాస్తు చేసుకోవాలి.
ఎవరెవరు ఖాతా తెరవచ్చు?
60 ఏళ్లు నిండిన వారు ఈ పథకంలో చేరవచ్చు. కొన్ని ప్రత్యేక నిబంధనల ప్రకారం 55 ఏళ్లు దాటిన రిటైర్డ్ ఉద్యోగులకు కూడా అవకాశం ఉంటుంది.
పెట్టుబడికి ముందు తెలుసుకోవాల్సినవి
ప్రభుత్వ మద్దతు ఉన్న పథకం కావడంతో పెట్టుబడి భద్రతకు ప్రాధాన్యం ఉంటుంది. అయితే వడ్డీ రేట్లు మారవచ్చు, వచ్చే వడ్డీకి పన్ను నిబంధనలు వర్తిస్తాయి. అలాగే ఇందులో నెలవారీ చెల్లింపులు ఉండవని గుర్తుంచుకోవాలి.