సాఫ్ట్ ఆలూ పరాటా

బ్రేక్‌ఫాస్ట్ లేదా డిన్నర్‌లోకి వేడి వేడి ఆలూ పరాటా ఉంటే ఆ మజాయే వేరు. నోట్లో కరిగిపోయేలా ఎలా చేయాలో చూద్దాం.

2 కప్పుల గోధుమ పిండి, చిటికెడు ఉప్పు, 1 స్పూన్ నూనె లేదా నెయ్యి ఉంటే చాలు. పిండిని చపాతీ పిండి కంటే కొంచెం సాఫ్ట్‌గా కలపాలి.

కలిపిన పిండిని కనీసం 20 నిమిషాల పాటు నాననివ్వాలి. పిండి ఎంత బాగా నానితే పరాటాలు అంత సాఫ్ట్‌గా వస్తాయి.

ఉడికించిన 4 బంగాళదుంపలు, 1 ఉల్లిపాయ, 2 పచ్చిమిర్చి, 1 స్పూన్ అల్లం వెల్లుల్లి పేస్ట్, అర స్పూన్ జీలకర్ర, వాము సిద్ధం చేసుకోవాలి.

పొట్టు తీసిన బంగాళదుంపలను మెత్తగా మాష్ చేయాలి. ఉల్లిపాయ, పచ్చిమిర్చి, పేస్ట్, మసాలాలు, ఉప్పు, కొత్తిమీర వేసి బాగా కలపాలి.

మిశ్రమంలో వాము వేయడం వల్ల జీర్ణశక్తి బాగుంటుంది. అంతేకాదు మంచి సువాసన కూడా వస్తుంది.

పిండిని సమాన ఉండలుగా చేసి, పూరీ సైజులో ఒత్తాలి. మధ్యలో నిమ్మకాయ సైజులో ఆలూ మిశ్రమం ఉంచి అన్ని వైపులా మూసేయాలి.

అదనపు పిండిని తీసేసి, పొడి పిండి చల్లుతూ నెమ్మదిగా మందంగా రోల్ చేయాలి. గట్టిగా ఒత్తితే స్టఫింగ్ బయటకు వచ్చేస్తుంది.

పెనం వేడెక్కాక పరాటా వేయాలి. ఒకవైపు కాలాక తిప్పి నెయ్యి లేదా నూనె రాసి, మీడియం మంటపై రెండు వైపులా గోల్డెన్ బ్రౌన్ వచ్చే వరకు కాల్చాలి.

నెయ్యితో కాల్చిన ఆలూ పరాటాను పెరుగు, నిమ్మకాయ ఊరగాయ లేదా టమాటో సాస్‌తో తింటే ఆ రుచి అద్భుతంగా ఉంటుంది.