Earthquake : భూటాన్, ఫిలిప్పీన్స్ తర్వాత ఇప్పుడు క్యూబా.. వరుస భూకంపాలతో వణుకుతున్న ప్రపంచం

Earthquake : పశ్చిమ క్యూబా పరిసర ప్రాంతాల్లో సోమవారం నాడు భారీ భూకంపం సంభవించింది. రిక్టర్ స్కేలుపై దీని తీవ్రత 6.1 గా నమోదైనట్లు శాస్త్రవేత్తలు వెల్లడించారు. ఈ భూకంపం ధాటికి క్యూబా రాజధాని హవానాతో పాటు దాని చుట్టుపక్కల ఉన్న ఎత్తైన భవనాలు, కార్యాలయాలు ఒక్కసారిగా ఊగిపోయాయి. అయితే, ప్రస్తుతానికి అందిన సమాచారం ప్రకారం ఈ ప్రమాదంలో ఎలాంటి ప్రాణ నష్టం గానీ, భారీ ఆస్తి నష్టం గానీ జరగలేదని అధికారులు తెలపడంతో అందరూ ఊపిరి పీల్చుకున్నారు.

సముద్ర గర్భంలో 10 కిలోమీటర్ల లోతులో కేంద్రం

అమెరికా జియోలాజికల్ సర్వే నివేదికల ప్రకారం.. ఈ భూకంప కేంద్రం క్యూబా రాజధానికి పశ్చిమ దిశగా ఉన్న సముద్ర గర్భంలో కేంద్రీకృతమైంది. సముద్ర మట్టానికి సుమారు 10 కిలోమీటర్ల లోతులో ఈ భూప్రకంపనలు చోటుచేసుకున్నాయి. ఈ భారీ భూకంపం రావడానికి కొన్ని గంటల ముందే.. అంటే ఆదివారం సాయంత్రం భూటాన్‌లోను, సోమవారం తెల్లవారుజామున ఫిలిప్పీన్స్‌లోనూ వరుసగా భూకంపాలు సంభవించడం అంతర్జాతీయంగా ఆందోళన కలిగిస్తోంది.

రోడ్లపైకి పరుగులు తీసిన జనం

భూకంపం వచ్చిన సమయంలో పినార్ డెల్ రియో ప్రాంతంలోని ఒక హోటల్ మేనేజర్ ఫ్లేవియా పుపో స్థానిక మీడియాతో ఫోన్ ద్వారా మాట్లాడారు. భూకంపం వస్తున్నప్పుడు హోటల్ బిల్డింగ్ మొత్తం ఒక్కసారిగా ఊగిపోయిందని, దాంతో లోపల ఉన్న కస్టమర్లు, సిబ్బంది తీవ్ర భయాందోళనలకు గురయ్యారని ఆమె చెప్పారు. భవనాలు ఎక్కడ కూలిపోతాయో అనే భయంతో జనం ఇళ్లలోంచి, ఆఫీసుల నుంచి రోడ్లపైకి పరుగులు తీశారు. ప్రస్తుతం పరిస్థితి అంతా అదుపులోనే ఉందని ఆమె స్పష్టం చేశారు.

అమెరికాలోని ఫ్లోరిడా దాకా పాకిన ప్రకంపనలు

ఈ భూకంపం యొక్క ప్రభావం కేవలం క్యూబా దేశానికే పరిమితం కాలేదు. సముద్ర దాటి అమెరికాలోని ఫ్లోరిడా రాష్ట్రం వరకు దీని కంపనాలు పాకాయి. ఫ్లోరిడాలోని నైరుతి ప్రాంత నివాసితులు తమ ఇళ్లలోని వస్తువులు కదిలిపోయాయని సామాజిక మాధ్యమాల్లో పోస్టులు పెట్టారు. మయామిలోని నేషనల్ వెదర్ సర్విస్ (NWS) కూడా దీనిపై ట్వీట్ చేస్తూ.. ఫ్లోరిడా సరిహద్దుల్లోని ప్రజల నుంచి భూప్రకంపనలు వచ్చాయనే ఫిర్యాదులు పెద్ద ఎత్తున అందినట్లు అధికారికంగా ధృవీకరించింది.

గతంలో వచ్చిన 7.7 తీవ్రత భయాలు

క్యూబా ఆగ్నేయ తీరానికి సమీపంలో ఉండే ఓరియంట్ ఫాల్ట్ జోన్ భూకంపాలకు అత్యంత ప్రమాదకరమైన కేంద్రంగా పేరుపొందింది. గత కొన్ని శతాబ్దాలుగా ఈ జోన్‌లో ఎన్నో భయంకరమైన భూకంపాలు వచ్చాయి. గతంలో అంటే జనవరి 2020 లో ఇదే సముద్ర ప్రాంతంలో 7.7 తీవ్రతతో ఒక భారీ భూకంపం వచ్చింది. ఆ సమయంలో క్యూబాతో పాటు కేమాన్ ఐలాండ్స్‌లోనూ పెద్ద ఎత్తున ఆస్తి, ప్రాణ నష్టం సంభవించింది. తాజాగా వచ్చిన 6.1 తీవ్రత భూకంపం ఆ పాత చేదు జ్ఞాపకాలను మరోసారి గుర్తుచేసింది.