పెద్ది’ మూవీపై ఐకాన్ స్టార్ అల్లు అర్జున్ సంచలన ట్వీట్!

Allu Arjun: మెగా పవర్‌స్టార్ రామ్ చరణ్, సంచలన దర్శకుడు బుచ్చిబాబు సన కాంబినేషన్‌లో వచ్చిన రూరల్ స్పోర్ట్స్ డ్రామా ‘పెద్ది’ బాక్సాఫీస్ వద్ద వసూళ్ల జాతర సృష్టిస్తోంది. విడుదలైన మొదటి రోజు నుంచే పాజిటివ్ టాక్‌తో దూసుకుపోతున్న ఈ చిత్రం కేవలం ఐదు రోజుల్లోనే ప్రపంచవ్యాప్తంగా ఏకంగా 315 కోట్ల రూపాయల గ్రాస్ వసూళ్లను సాధించి సరికొత్త రికార్డులను సృష్టించింది. థియేటర్లలో ‘పెద్ది’ సంచలన విజయం వైపు దూసుకుపోతున్న తరుణంలో, ఐకాన్ స్టార్ అల్లు అర్జున్ ఈ సినిమాపై సోషల్ మీడియా వేదికగా స్పందిస్తూ చిత్ర బృందాన్ని ఆకాశానికెత్తేశారు.

చరణ్ బాడీ ట్రాన్స్‌ఫార్మేషన్ మైండ్ బ్లాకింగ్.. బన్నీ ప్రశంసలు!

హీరో రామ్ చరణ్ నటనపై అల్లు అర్జున్ ఎక్స్ (ట్విట్టర్) వేదికగా ప్రశంసల వర్షం కురిపించారు. చరణ్ కెరీర్‌లోనే ఇది అత్యుత్తమ ప్రదర్శన అని కొనియాడారు.

"పెద్ది సినిమాలో నా బ్రదర్ రామ్ చరణ్ రగ్గడ్, రా అండ్ గ్రిట్టీ లుక్‌లో మైండ్ బ్లాకింగ్ పర్ఫార్మెన్స్ ఇచ్చాడు. సినిమా కోసం చరణ్ చేసిన ఎక్స్‌ట్రాడినరీ బాడీ ట్రాన్స్‌ఫార్మేషన్, అందులోని గ్రేస్‌ఫుల్ డ్యాన్స్ మూవ్స్ నన్ను ఎంతగానో ఆకట్టుకున్నాయి. నిన్ను చూస్తుంటే నాకు నిజంగా చాలా గర్వంగా ఉంది బ్రదర్" అని బన్నీ ట్వీట్ చేశారు.

ఈ చిత్రంలో నటించిన జగపతి బాబు నటనను మెచ్చుకున్న అల్లు అర్జున్, హీరోయిన్ జాన్వీ కపూర్‌కు తన ప్రేమాభిమానాలను తెలియజేశారు.

బుచ్చిబాబు సన చరణ్‌ను నెక్స్ట్ లెవెల్‌లో నిలబెట్టాడు!

దర్శకుడు బుచ్చిబాబు సన మేకింగ్ స్టైల్‌ను ఐకాన్ స్టార్ ప్రత్యేకంగా ప్రస్తావించారు. ప్రతి ఒక్క పాత్రను ఎలివేట్ చేస్తూ, రామ్ చరణ్ గారిని ఒక సరికొత్త ఎత్తైన పీఠంపై బుచ్చిబాబు నిలబెట్టాడని కొనియాడారు. వృద్ధి సినిమాస్ బ్యానర్‌పై భారీ నిర్మాణ విలువలతో నిర్మితమైన ఈ చిత్రానికి ఆస్కార్ విజేత ఏఆర్ రెహమాన్ అందించిన సంగీతం, బ్యాక్‌గ్రౌండ్ స్కోర్ సినిమా విజయానికి ప్రధాన బలంగా నిలిచాయి. దివ్యేందు, బోమన్ ఇరానీ, కన్నడ స్టార్ శివ రాజ్‌కుమార్ వంటి దిగ్గజ తారాగణంతో రూపొందిన ‘పెద్ది’ చిత్రం రాబోయే రోజుల్లో మరిన్ని భారీ వసూళ్లను సాధించడం ఖాయంగా కనిపిస్తోంది.