Apple Watch: నిద్రలో శ్వాస ఆగిపోతుందా? యాపిల్ వాచ్ ముందే హెచ్చరిస్తుంది

Apple Watch: టెక్నాలజీ దిగ్గజం యాపిల్ భారతీయ యూజర్ల కోసం రెండు కీలక ఆరోగ్య ఫీచర్లను అందుబాటులోకి తీసుకొచ్చింది. ఇప్పుడు యాపిల్ వాచ్ ద్వారా స్లీప్ అప్నియా వంటి ప్రమాదకర నిద్ర సమస్యలను ముందుగానే గుర్తించే అవకాశం లభిస్తోంది.

స్లీప్ అప్నియా అంటే ఏమిటి? ఎందుకు ప్రమాదకరం?

స్లీప్ అప్నియా అనేది నిద్రిస్తున్న సమయంలో శ్వాస పలుమార్లు ఆగి మళ్లీ ప్రారంభమయ్యే ఒక ఆరోగ్య సమస్య. ఇందులో అత్యంత సాధారణంగా కనిపించే రకం అబ్స్ట్రక్టివ్ స్లీప్ అప్నియా (OSA). ఈ పరిస్థితిలో గొంతు భాగంలోని కండరాలు సడలిపోవడంతో శ్వాస మార్గం కొంతసేపు మూసుకుపోతుంది. దీంతో శ్వాస సక్రమంగా జరగదు. చాలా మందికి తమకు ఈ సమస్య ఉందనే విషయం కూడా తెలియదు. ఎందుకంటే ఇది పూర్తిగా నిద్రలోనే జరుగుతుంది. దీర్ఘకాలం ఈ సమస్యను నిర్లక్ష్యం చేస్తే అధిక రక్తపోటు, గుండె జబ్బులు, టైప్-2 మధుమేహం, స్ట్రోక్ వంటి తీవ్రమైన ఆరోగ్య సమస్యలు వచ్చే ప్రమాదం పెరుగుతుంది. ప్రస్తుతం మారుతున్న జీవనశైలి, ఊబకాయం, ఒత్తిడి, నిద్రలేమి వంటి కారణాలతో ఈ సమస్య మరింత పెరుగుతోందని వైద్య నిపుణులు చెబుతున్నారు.

యాపిల్ వాచ్ ఈ సమస్యను ఎలా గుర్తిస్తుంది?

యాపిల్ వాచ్‌లో బ్రీతింగ్ డిస్ట్ర‌బెన్స్ అనే ప్రత్యేక ఫీచర్‌ను జోడించారు. ఇందులో ఉన్న సెన్సార్లు చేతి కదలికలను అత్యంత సూక్ష్మంగా పరిశీలిస్తాయి. వాచ్ నేరుగా శ్వాసను కొలవకపోయినా, శరీర కదలికల ఆధారంగా శ్వాసలో ఏవైనా అసాధారణ మార్పులు ఉన్నాయా లేదా అనేది అంచనా వేస్తుంది. ఒకవేళ 30 రోజుల పాటు నిరంతరంగా అసాధారణ శ్వాస నమూనాలు కనిపిస్తే వినియోగదారుడికి హెచ్చరిక పంపిస్తుంది. అలాగే వైద్యుడిని సంప్రదించాలని సూచిస్తుంది. అంతేకాకుండా హెల్త్ యాప్‌ ద్వారా గత మూడు నెలల నివేదికను పీడీఎఫ్‌ రూపంలో డౌన్‌లోడ్ చేసుకునే అవకాశం కూడా ఉంటుంది. దీన్ని వైద్యులకు చూపించి మ‌రిన్ని పరీక్షలు చేయించుకోవచ్చు.

నిద్ర నాణ్యతపై కూడా పూర్తి సమాచారం

ఈ కొత్త ఫీచర్ కేవలం స్లీప్ అప్నియా గుర్తించడానికే పరిమితం కాలేదు. యూజ‌ర్‌ రాత్రి ఎంత ప్రశాంతంగా నిద్రపోయాడు, నిద్రలో ఎన్ని సార్లు కదిలాడు, ఎంతసేపు అసౌకర్యంగా ఉన్నాడు వంటి అంశాలను కూడా నమోదు చేస్తుంది. అంతేకాకుండా మద్యం సేవించడం, కొన్ని రకాల మందులు వాడటం, మానసిక ఒత్తిడి లేదా పడుకునే విధానం వంటి అంశాలు శ్వాసపై చూపే ప్రభావాన్ని కూడా విశ్లేషిస్తుంది. దీంతో వినియోగదారులు తమ నిద్ర అలవాట్లను మెరుగ్గా అర్థం చేసుకుని అవసరమైన మార్పులు చేసుకునే అవకాశం ఉంటుంది.

ఈ ఫీచర్ ఎంతవరకు నమ్మదగినది?

యాపిల్ వెల్లడించిన వివరాల ప్రకారం, ఈ ఫీచర్‌ను అభివృద్ధి చేసే సమయంలో 1,448 మంది డేటాతో క్లినికల్ అధ్యయనాలు నిర్వహించారు. ఈ పరీక్షల్లో మధ్యస్థాయి నుంచి తీవ్రమైన స్లీప్ అప్నియా కేసులను గుర్తించడంలో మంచి ఫలితాలు నమోదయ్యాయి. అయితే ఇది పూర్తి స్థాయి వైద్య పరీక్ష కాదని కంపెనీ స్పష్టం చేసింది. అంటే ఈ ఫీచర్ వ్యాధిని క‌చ్చితంగా నిర్ధారించదు. కానీ సమస్య ఉండే అవకాశాన్ని ముందుగానే గుర్తించి వైద్య పరీక్షలు చేయించుకునేలా హెచ్చరిస్తుంది. అందువల్ల దీన్ని ఒక ప్రారంభ స్క్రీనింగ్ టూల్‌గా పరిగణించాలి.

ఎయిర్‌పాడ్స్ ప్రోతో ఇంట్లోనే హియరింగ్ టెస్ట్

యాపిల్‌ మరో ముఖ్యమైన ఆరోగ్య ఫీచర్‌ను కూడా భారతీయ యూజ‌ర్ల‌కు అందుబాటులోకి తీసుకొచ్చింది. ఎయిర్‌పాడ్స్‌ప్రో2, ఎయిర్‌పాడ్స్ ప్రో3 ఉపయోగించే వారు ఇప్పుడు ఇంట్లోనే తమ వినికిడి సామర్థ్యాన్ని పరీక్షించుకోవచ్చు. ఈ టెస్ట్ ఆసుపత్రుల్లో ఉపయోగించే ప్యూర్‌-టోన్ ఆడియోమెట్రీ టెక్నాలజీ ఆధారంగా పనిచేస్తుంది. పరీక్ష పూర్తవడానికి సుమారు ఐదు నిమిషాల సమయం మాత్రమే పడుతుంది. అనంతరం వినియోగదారుడికి ఒక ఆడియోగ్రామ్‌ రిపోర్ట్ అందుతుంది. ఇందులో రెండు చెవుల వినికిడి సామర్థ్యం ఎలా ఉందో స్పష్టంగా తెలుస్తుంది. ఈ నివేదిక హెల్త్‌యాప్‌లో స్టోర్ అవుతుంది. అవసరమైతే వైద్యులతో కూడా పంచుకోవచ్చు.

భారత్‌లో ఈ ఫీచర్ల ప్రాధాన్యత ఏమిటి?

భారత్‌లో స్లీప్ స్టడీ పరీక్షలు చేయించుకోవడం చాలామందికి ఖరీదైన వ్యవహారంగా మారుతోంది. కొన్ని ఆసుపత్రుల్లో ఈ పరీక్షల ఖర్చు వేల రూపాయల వరకు ఉంటుంది. అంతేకాకుండా ఆసుపత్రిలో రాత్రంతా ప్రత్యేక పరికరాలతో నిద్రించాల్సి ఉంటుంది. అలాంటి పరిస్థితుల్లో యాపిల్ వాచ్‌ ఇంట్లోనే నిరంతరం ఆరోగ్య పరిస్థితులను పర్యవేక్షించగలగడం పెద్ద ప్రయోజనంగా భావిస్తున్నారు. అలాగే వినికిడి సమస్యలను ప్రారంభ దశలోనే గుర్తించేందుకు AirPods Pro హియరింగ్ టెస్ట్ ఉపయోగపడుతుంది. ఇవి వైద్యులను పూర్తిగా భర్తీ చేయకపోయినా, సమస్యలను ముందుగానే గుర్తించి సరైన సమయంలో చికిత్స పొందేందుకు మార్గం చూపించే ఆధునిక ఆరోగ్య సాధనాలుగా నిలుస్తాయి.