Hyundai Aura: క్రెటా, వెన్యూలను కూడా వెనక్కి నెట్టిన హ్యుందాయ్.. అమ్మకాల్లో 18శాతం పెరుగుదల!

Hyundai Aura: భారత మార్కెట్‌లో అత్యధిక కార్లు అమ్ముతున్న కంపెనీల్లో హ్యుందాయ్ ఒకటి. అయితే, గత కొన్ని నెలలుగా ఈ కంపెనీ అమ్మకాలు కాస్త తగ్గుముఖం పడుతున్నాయి. ఏప్రిల్ 2025లో హ్యుందాయ్ క్రెటా ఒక్కటే గతేడాదితో పోలిస్తే అమ్మకాల్లో కాస్త వృద్ధి సాధించిన మోడల్. మిగతా అన్ని కార్ల అమ్మకాలు పడిపోయాయి. దీని వల్ల హ్యుందాయ్ మోటార్ ఇండియాలో టాప్ కార్ల కంపెనీల జాబితాలో నాలుగో స్థానానికి పడిపోయింది. కానీ, ఇప్పుడు మే నెల అమ్మకాల లెక్కలు బయటపడ్డాయి. ఇందులో ఒక కారు మాత్రం అనూహ్యంగా తిరిగి పుంజుకుంది. ఆ కారే హ్యుందాయ్ ఆరా కాంపాక్ట్ సెడాన్.

హ్యుందాయ్ ఆరా సెడాన్ 5,225 యూనిట్ల విక్రయాలు సాధించి సానుకూల వృద్ధిని నమోదు చేసింది. గతేడాదితో పోలిస్తే ఈ కారు అమ్మకాల్లో 18శాతం పెరుగుదల కనిపించింది. అంతకుముందు నెల (ఏప్రిల్) తో పోలిస్తే 24శాతం పెరుగుదల నమోదైంది. గతేడాది మే నెలలో ఆరా 4,433 యూనిట్లు అమ్ముడవగా, ఈ ఏడాది ఏప్రిల్ నెలలో 4,224 యూనిట్లు అమ్ముడయ్యాయి. ఏప్రిల్‌లో ఆరా అమ్మకాలు గతేడాదితో పోలిస్తే 6శాతం పైగా తగ్గాయి.

అయితే, ఇప్పుడు ఆసక్తికరమైన విషయం ఏమిటంటే.. అమ్మకాల పెరుగుదల విషయంలో ఆరా, హ్యుందాయ్ క్రెటా, వెన్యూ వంటి పాపులర్ కార్లను కూడా వెనక్కి నెట్టింది. క్రెటా అమ్మకాల్లో గతేడాదితో పోలిస్తే కేవలం 1.35శాతం మాత్రమే వృద్ధి ఉండగా, వెన్యూ అమ్మకాలు 19శాతం పైగా తగ్గాయి. ఇది హ్యుందాయ్ ఆరాకు పెద్ద విజయం అనే చెప్పాలి. హ్యుందాయ్ ఆరా బేస్ మోడల్ ధర సుమారు రూ.6.54 లక్షల (ఎక్స్-షోరూమ్) నుండి ప్రారంభమై, టాప్ మోడల్ ధర సుమారు రూ.9.11 లక్షల (ఎక్స్-షోరూమ్) వరకు ఉంటుంది. ఆరా ఒక కాంపాక్ట్ సెడాన్, ఇందులో సీట్లు చాలా సౌకర్యవంతంగా ఉంటాయి. క్యాబిన్ కూడా విశాలంగా డిజైన్ చేయబడి ఉంటుంది. ఇది స్మూత్ ఇంజిన్, అనేక ఫీచర్లు ఉన్న ఇంటీరియర్, తక్కువ వేగంతో ప్రయాణించినప్పుడు కూడా అద్భుతమైన రైడ్ క్వాలిటీతో మంచి పర్ఫామెన్స్ ను అందిస్తుంది. దీనికి తోడు ఇది వివిధ డ్రైవింగ్ పరిస్థితులకు అనుకూలంగా మంచి గ్రౌండ్ క్లియరెన్స్ కూడా కలిగి ఉంది.

కాంపాక్ట్ సెడాన్ విభాగంలో హ్యుందాయ్ ఆరాకు మారుతి సుజుకి డిజైర్, హోండా అమేజ్, టాటా టిగోర్ వంటి కార్ల నుంచి గట్టి పోటీ ఉంది. ఈ మోడళ్లు కూడా దాదాపుగా ఒకే రకమైన ఫీచర్లు, ధర, పర్ఫామెన్స్ తో వస్తాయి. హ్యుందాయ్ ఆరా 1.2-లీటర్, నాలుగు-సిలిండర్ పెట్రోల్ ఇంజిన్‌తో లభిస్తుంది. ఇది మాన్యువల్ లేదా ఆటోమేటిక్ ట్రాన్స్‌మిషన్ ఆప్షన్లతో వస్తుంది. ఇది మాన్యువల్ ట్రాన్స్‌మిషన్‌తో పాటు సీఎన్‌జీ ఆప్షన్‌లో కూడా అందుబాటులో ఉంది. పెట్రోల్ ఇంజిన్ లీటరుకు 17 కిలోమీటర్ల మైలేజీని ఇస్తుంది, కాగా సీఎన్‌జీ వేరియంట్ కిలోగ్రామ్‌కు 22 కిలోమీటర్ల మైలేజీని అందిస్తుంది. ఇది వినియోగదారులకు తక్కువ రన్నింగ్ ఖర్చుతో ఎక్కువ దూరం ప్రయాణించే సౌలభ్యాన్ని కల్పిస్తుంది. ఆరా తిరిగి పుంజుకోవడం హ్యుందాయ్‌కు మంచి ఊపునిస్తుందని మార్కెట్ నిపుణులు భావిస్తున్నారు.