Kia : వెన్యూ, బ్రెజా, నెక్సన్‌ల మధ్య నలిగిపోయింది.. మూడు నెలల్లోనే చేతులెత్తేసిన కియా

Kia: కియా ఇండియా ఇటీవల జూన్ 2025 నెలవారీ అమ్మకాల గణాంకాలను విడుదల చేసింది. ఈ డేటా ప్రకారం కంపెనీ అమ్మకాల్లో ఏటా 3 శాతం క్షీణత కనిపించింది. జూన్‌లో కియా మొత్తం 20,625 వాహనాలను విక్రయించింది. ఇది గతేడాది జూన్ 2024లో 21,300 యూనిట్లుగా ఉంది. అంతేకాకుండా, మే 2025తో పోలిస్తే అమ్మకాలు 8 శాతం తగ్గాయి. అప్పుడు కంపెనీ 22,315 వాహనాలను విక్రయించింది. కియా ఉత్పత్తి శ్రేణిలో కియా కారెన్స్ అత్యధికంగా అమ్ముడైన వాహనంగా నిలిచింది. అయితే, అందరినీ తీవ్రంగా నిరాశపరిచిన మోడల్ మాత్రం కియా సైరోస్.

సంవత్సరం ప్రారంభంలో విడుదలైన కియా సైరోస్ ఒక ప్రీమియం సబ్-కాంపాక్ట్ ఎస్‌యూవీ. దీన్ని ఫిబ్రవరి 1న విడుదల చేశారు. ప్రారంభంలో దీని అమ్మకాలు భారీగా జరిగాయి. ఏప్రిల్ నాటికి భారతదేశంలో కియా సైరోస్ 19,986 యూనిట్లకు పైగా అమ్ముడయ్యాయి. అయితే, ఈ వాహనం ఎంత వేగంగా ప్రజాదరణ పొందిందో, అంతే వేగంగా దాని ప్రజాదరణ తగ్గిపోయింది. మూడు నెలల్లో దాదాపు 20 వేల యూనిట్లు అమ్ముడైన ఈ వాహనాన్ని జూన్‌లో కేవలం 774 మంది మాత్రమే కొనుగోలు చేశారు. నెలవారీ ప్రాతిపదికన దీని అమ్మకాల్లో 78 శాతం భారీ పతనం నమోదైంది. మేలో 3,611 మంది దీనిని కొనుగోలు చేశారు.

కియా సైరోస్ బేస్ మోడల్ ధర రూ.9.50 లక్షల నుంచి ప్రారంభమై, టాప్ మోడల్ ధర రూ.17.80 లక్షల (ఎక్స్-షోరూమ్) వరకు ఉంటుంది. ఇది రెండు ఇంజిన్ ఆప్షన్‌లలో అందుబాటులో ఉంది. అవి 1.0-లీటర్ టర్బో-పెట్రోల్ ఇంజిన్, 1.5-లీటర్ డీజిల్ ఇంజిన్. ఈ రెండు ఇంజిన్‌లు 6-స్పీడ్ మ్యాన్యువల్ ట్రాన్స్‌మిషన్‌తో వస్తాయి. పెట్రోల్ ఇంజిన్ 7-స్పీడ్ డ్యూయల్-క్లచ్ ఆటోమేటిక్ (DCT)తో కూడా అందుబాటులో ఉంది. డీజిల్ ఇంజిన్ 6-స్పీడ్ టార్క్ కన్వర్టర్ ఆటోమేటిక్ ట్రాన్స్‌మిషన్‌తో వస్తుంది.

కియా సైరోస్‌లో డ్యుయల్-పాన్ పనోరమిక్ సన్‌రూఫ్, ముందు, వెనుక వెంటిలేటెడ్ సీట్లు, ట్రినిటీ పనోరమిక్ డిస్‌ప్లే, హర్మాన్ కార్డన్ సౌండ్ సిస్టమ్ వంటి అనేక ఫీచర్లు ఉన్నాయి. సైరోస్ డిజైన్, ఫీచర్లు, క్యాబిన్ క్వాలిటీ ఈ సెగ్మెంట్‌లో అద్భుతంగా ఉన్నాయి. ఇది సుదీర్ఘ ప్రయాణాలకు అనుకూలమైన సీటింగ్, మంచి సస్పెన్షన్‌తో వస్తుంది.

సైరోస్ అమ్మకాలు తగ్గడానికి కొన్ని కారణాలు ఉన్నాయి. దీని డిజైన్ వెన్యూ, బ్రెజా, నెక్సన్ వంటి ఇతర ఎస్‌యూవీల నుండి చాలా భిన్నంగా ఉంది, ఇది కొంతమంది కస్టమర్‌లకు నచ్చకపోవచ్చు. వెనుక సీటులో స్థలం ఉన్నప్పటికీ, ముగ్గురు పెద్దలు సౌకర్యంగా కూర్చోలేరు. ఇద్దరు పెద్దలు, ఒక పిల్లవాడు మాత్రమే సరిపోతారు. కొంతమంది వినియోగదారులు ఎగుడుదిగుడు రోడ్లపై దీని రైడింగ్ కొద్దిగా కఠినంగా అనిపిస్తుందని చెప్పారు. అలాగే, వాహనం నిలిచి ఉన్నప్పుడు డీజిల్ ఇంజిన్ నుండి సౌండ్ వస్తుందట. దీని టాప్ వేరియంట్‌లు కొనుగోలుదారులకు ఖరీదైనవిగా అనిపించవచ్చు.