TVS iQube: టీవీఎస్ ఐక్యూబ్ కొత్త వేరియంట్ లాంచ్.. తక్కువ ధరలో ఎక్కువ రేంజ్

TVS iQube: టీవీఎస్ తన పాపులర్, మార్కెట్‌లో అత్యధికంగా అమ్ముడవుతున్న ఎలక్ట్రిక్ స్కూటర్ ఐక్యూబ్ కొత్త 3.1 kWh వేరియంట్‌ను విడుదల చేసింది. కొత్త మోడల్ ధర రూ.1.03 లక్షలు (ఎక్స్-షోరూమ్)గా నిర్ణయించారు. ఈ కొత్త మోడల్ రాకతో ఐక్యూబ్ సిరీస్‌లో ఇప్పుడు మొత్తం 6 వేరియంట్‌లు అందుబాటులో ఉన్నాయి. దీంతో వినియోగదారులకు వారి అవసరాలు, బడ్జెట్‌కు తగ్గట్టుగా మరిన్ని ఆప్షన్లు లభిస్తాయి. భారతదేశంలో ఎలక్ట్రిక్ టూ-వీలర్ మార్కెట్‌లో డిమాండ్ వేగంగా పెరుగుతున్న సమయంలో ఈ కొత్త వేరియంట్ వచ్చింది.

టీవీఎస్ ఐక్యూబ్ 3.1 kWh వేరియంట్‌ను ప్రత్యేకంగా పట్టణ ప్రాంతాల కోసం రూపొందించారు. ఈ స్కూటర్ ఒకసారి పూర్తిగా ఛార్జ్ చేస్తే 123 కిలోమీటర్ల దూరం ప్రయాణించగలదు. ఈ వేరియంట్ ఐక్యూబ్ శ్రేణిలో మిడ్-లెవల్ ఆప్షన్ గా నిలిచింది. ఇది ఎక్కువ ఖరీదైనది కాదు.. అలా అని మరీ బేసిక్ కూడా కాదు. మధ్యస్థంగా కావాలనుకునే వారికి ఇది మంచి ఆప్షన్.

ఇందులో హిల్ హోల్డ్ ఫంక్షన్ ఉంది, ఇది స్టాప్-స్టార్ట్ ట్రాఫిక్, వాలుగా ఉండే రోడ్లపై స్కూటర్‌ను కంట్రోల్ చేయడంలో సహాయపడుతుంది. ఇది ముఖ్యంగా పట్టణ ప్రాంతాలకు చాలా ఉపయోగకరంగా ఉంటుంది. కొత్త UI/UX డిజైన్ కూడా ఉంది. డిజిటల్ స్క్రీన్‌ను ఇప్పుడు మరింత యూజర్ ఫ్రెండ్లీగా మార్చారు, అయితే కంపెనీ ఈ మార్పుల గురించి పూర్తి వివరాలు వెల్లడించలేదు.

టీవీఎస్ ఇటీవల ఐక్యూబ్ సిరీస్‌లో అనేక అప్‌డేట్‌లను చేసింది. కొన్ని వేరియంట్‌లలో పెద్ద బ్యాటరీ, డ్యూయల్-టోన్ పెయింట్ స్కీమ్, బ్యాక్‌రెస్ట్ వంటి అదనపు ఫీచర్‌లు ఉన్నాయి. ఐక్యూబ్ ఇప్పటివరకు 6 లక్షలకు పైగా యూనిట్లను విక్రయించింది. దేశవ్యాప్తంగా దీనికి 1900కు పైగా టచ్‌పాయింట్లు ఉన్నాయి. ఈ స్కూటర్ ముఖ్యంగా కుటుంబం కోసం కొనే వారికి చాలా ఆదరణ పొందింది.

కొత్త 3.1 kWh వేరియంట్‌లో పాత స్టైల్ అలాగే ఉంటూనే, డ్యూయల్-టోన్ కలర్ ఆప్షన్ లభిస్తుంది. దీనివల్ల దీని లుక్ మరింత ప్రీమియంగా కనిపిస్తుంది. కలర్ ఆప్షన్ల విషయానికి వస్తే, ఇందులో పర్ల్ వైట్, టైటానియం గ్రే, స్టార్‌లైట్ బ్లూ విత్ బీజ్, కాపర్ బ్రోన్జ్ విత్ బీజ్ వంటి ఆప్షన్లు ఉన్నాయి. డిజైన్‌లో పెద్ద మార్పులు లేనప్పటికీ, కొత్త కలర్స్ స్కూటర్‌ను మరింత ఆకర్షణీయంగా మార్చి, వినియోగదారులకు మంచి స్టైలిష్ అనుభవాన్ని అందిస్తాయి.