Pahalgam Effect: పహల్గాం ఎఫెక్ట్.. 10,000 మెగావాట్ల విద్యుత్ కాశ్మీర్‌ సొంతం

Pahalgam Effect : పహల్గాంలో జరిగిన ఉగ్రదాడి తర్వాత భారత్ కఠిన చర్యలు తీసుకుంది. తొలుత సింధు జల ఒప్పందాన్ని నిలిపివేసింది. భవిష్యత్తులోనూ పాకిస్తాన్ తన వైఖరి మార్చుకోకపోతే నీటి కోసం అల్లాడాల్సి వస్తుంది. అయితే సింధు ఒప్పందం రద్దు అయితే కాశ్మీర్ దేశానికి విద్యుత్ కేంద్రంగా ఎలా మారుతుందో తెలుసా? దాని వెనుక ఉన్న కారణం ఏమిటో చూద్దాం. పాకిస్తాన్ పూర్తిగా ఈ నదులపైనే ఆధారపడి ఉంది. మీడియా కథనాల ప్రకారం.. పశ్చిమ నదుల నుండి దాదాపు 130 మిలియన్ ఎకరాలకు సరిపడా నీరు పాకిస్తాన్‌కు వెళుతోంది. పాకిస్తాన్ వ్యవసాయంలో 80 శాతం దీని ద్వారానే లాభం పొందుతోంది. ఒకవేళ భారత్ ఈ నీటిని శాశ్వతంగా నిలిపివేస్తే ఇక్కడి రైతుల సాగునీటి కోసం మరింత నీరు లభిస్తుంది.

10,000 మెగావాట్ల విద్యుత్ ఉత్పత్తి

1960 ఒప్పందాన్ని రద్దు చేయాలనే భారతదేశ నిర్ణయంతో, చీనాబ్, జీలం, సింధు నదులపై నిర్మిస్తున్న జలవిద్యుత్ ప్రాజెక్టుల పనులు వేగవంతం అవుతాయి. ఈ ఒప్పందం కారణంగానే ఆ పనులు నిలిచిపోయాయి. అంతేకాకుండా, భారత్ ఇకపై ప్రాజెక్టుల సమాచారాన్ని పాకిస్తాన్‌కు ముందుగా తెలియజేయదు. నదుల గురించిన డేటాను పంచుకోవడం, వార్షిక సమావేశాలు కూడా నిలిచిపోతాయి. కానీ ఈ నిర్ణయం వల్ల జమ్మూ కాశ్మీర్‌లోని నీటి సమస్య పరిష్కారమవుతుంది. హిమాలయ ప్రాంతానికి దాదాపు 10,000 మెగావాట్ల విద్యుత్ కూడా లభిస్తుంది.

దేశ విద్యుత్ కేంద్రంగా కాశ్మీర్

దీనిలో అతిపెద్ద మార్పు చీనాబ్, జీలం నదులపై విద్యుత్ ప్రాజెక్టులు , నీటి నిల్వ సౌకర్యాల నిర్మాణం. మొదట 540 మెగావాట్ల క్వార్, 1000 మెగావాట్ల పాకల్ దల్, 624 మెగావాట్ల కిరు, 390 మెగావాట్ల కిర్తాయ్ I, 930 మెగావాట్ల కిర్తాయ్ II, 1,856 మెగావాట్ల సావల్‌కోట్ నిర్మిస్తారు. దీనివల్ల 3,000 మెగావాట్ల కంటే ఎక్కువ విద్యుత్ ఉత్పత్తి అవుతుంది. తద్వారా జమ్మూ కాశ్మీర్ విద్యుత్ ఉత్పత్తి సామర్థ్యం 10,000 మిలియన్ యూనిట్లు పెరుగుతుంది.