New Rules: రైలు టికెట్ల నుంచి గ్యాస్ ధరల వరకు.. జూలై 1 నుంచి మారిన కొత్త రూల్స్ ఇవే

New Rules: ప్రభుత్వం ఎల్పీజీ, రైల్వే టికెట్లతో సహా చాలా రూల్స్ మార్చింది. ఇవి నేటి నుండి అంటే జూలై 1, 2025 నుండి అమలులోకి వస్తున్నాయి. ఈ ముఖ్యమైన నియమాల గురించి, అవి మీ జేబుపై ఎలా ప్రభావం చూపుతాయో వివరంగా తెలుసుకుందాం.

రైలు ప్రయాణం ఇక ఖరీదు!

జూలై 1 నుంచి రైలు టికెట్ల ధరలు స్వల్పంగా పెరుగుతాయి. మెయిల్ లేదా ఎక్స్‌ప్రెస్ రైళ్లలో నాన్-ఏసీ క్లాస్‌కు కిలోమీటర్‌కు 1 పైసా, ఏసీ క్లాస్‌కు కిలోమీటర్‌కు 2 పైసలు పెరుగుతాయి. అయితే, 500 కిలోమీటర్ల వరకు ప్రయాణానికి సెకండ్ క్లాస్ ఛార్జీలు మారవు. కానీ, 500 కిలోమీటర్ల కంటే ఎక్కువ ప్రయాణానికి కిలోమీటర్‌కు అదనంగా అర పైసా చెల్లించాల్సి ఉంటుంది.

రిజర్వేషన్ చార్ట్ ఇక 8 గంటల ముందే

ఇప్పటివరకు రైల్వే రిజర్వేషన్ చార్ట్ రైలు బయలుదేరడానికి 4 గంటల ముందు తయారయ్యేది. దీనివల్ల వెయిట్‌లిస్ట్‌లో ఉన్న ప్రయాణికులకు, ముఖ్యంగా దూర ప్రాంతాల వారికి చాలా ఇబ్బంది ఉండేది. ఇప్పుడు రైల్వే దీన్ని మార్చింది. జూలై 1 నుంచి రిజర్వేషన్ చార్ట్ రైలు బయలుదేరడానికి 8 గంటల ముందు తయారవుతుంది. మీ రైలు మధ్యాహ్నం 2 గంటల లోపు బయలుదేరితే, దాని చార్ట్ మునుపటి రోజు రాత్రి 9 గంటలకల్లా ఫైనల్ అవుతుంది. దీనివల్ల టికెట్ స్థితి ముందుగానే తెలుస్తుంది, ప్రయాణికులు ప్రత్యామ్నాయ ప్రణాళికలు వేసుకోవచ్చు. ఇది గ్రామీణ ప్రాంత ప్రయాణికులకు పెద్ద ఊరట.

క్రెడిట్ కార్డ్ బిల్లు చెల్లింపుల కొత్త నియమాలు

జూలై 1 నుంచి ప్రభుత్వ, ప్రైవేట్ బ్యాంకుల కొన్ని నియమాలు మారతాయి. రిజర్వ్ బ్యాంక్ ఆఫ్ ఇండియా కొత్త క్రెడిట్ కార్డ్ నియమాలను అమలు చేస్తోంది. ఇప్పుడు అన్ని క్రెడిట్ కార్డ్ చెల్లింపులు భారత్ బిల్ పేమెంట్ సిస్టమ్ ద్వారా చేయాలి. ఈ నియమం ఫోన్‌పే, క్రెడ్, బిల్డెస్క్, ఇన్‌ఫీబీమ్ అవెన్యూ వంటి ఫిన్‌టెక్ ప్లాట్‌ఫామ్‌లపై ప్రభావం చూపుతుంది. ఇప్పటివరకు కేవలం ఎనిమిది బ్యాంకులు మాత్రమే BBPS ద్వారా బిల్లు చెల్లింపులను సక్రియం చేశాయి. హెచ్‌డిఎఫ్‌సి బ్యాంక్ క్రెడిట్ కార్డ్ హోల్డర్ల కోసం కొత్త ఛార్జీలు, రివార్డ్ పాలసీలో మార్పులు చేసింది. ఇప్పుడు నెలవారీ ఖర్చు రూ.10,000 కంటే ఎక్కువైతే 1 శాతం అదనపు ఛార్జ్ పడుతుంది.

ఎల్పీజీ సిలిండర్ కొత్త ధరలు

జూలై 1న ఎల్పీజీ సిలిండర్ల కొత్త ధరలు విడుదలయ్యాయి. జూన్ 1న 19 కిలోల కమర్షియల్ ఎల్పీజీ సిలిండర్ ధర రూ.25 తగ్గింది. అయితే, 14 కిలోల దేశీయ ఎల్పీజీ సిలిండర్ ధరలు ఆగస్టు 1, 2024 నుండి మారలేదు.

యుటిలిటీ బిల్లులకు కొత్త ఛార్జీలు

బ్యాంకులు ఇప్పుడు యుటిలిటీ బిల్లులపై (విద్యుత్, నీరు, గ్యాస్ మొదలైనవి) కూడా ఛార్జీలు వసూలు చేస్తాయి. కొత్త నియమాల ప్రకారం: రూ.50,000 కంటే ఎక్కువ యుటిలిటీ బిల్లులు. రూ.10,000 కంటే ఎక్కువ ఆన్‌లైన్ గేమింగ్. రూ.15,000 కంటే ఎక్కువ ఇంధన ఖర్చు. విద్య లేదా అద్దెకు సంబంధించిన థర్డ్-పార్టీ పేమెంట్లపై 1 శాతం ఛార్జ్ పడుతుంది. ఆన్‌లైన్ స్కిల్-బేస్డ్ గేమింగ్‌పై రివార్డ్ పాయింట్లు లభించవు. అలాగే, బీమా చెల్లింపులపై రివార్డ్ పాయింట్ల పరిమితి ఉంటుంది.

కొత్త పాన్ కార్డుకు ఆధార్ తప్పనిసరి

జూలై 1, 2025 నుండి కొత్త పాన్ కార్డ్ పొందడానికి ఆధార్ కార్డ్ తప్పనిసరి అవుతుంది. గతంలో ఏదైనా గుర్తింపు కార్డు, జనన ధృవీకరణ పత్రంతో పని జరిగేది. కానీ ఇప్పుడు కేంద్ర ప్రత్యక్ష పన్నుల బోర్డు ఆధార్ ధృవీకరణను తప్పనిసరి చేసింది.

జీఎస్‌టీ రిటర్న్‌కు కొత్త రూల్స్

జీఎస్‌టీ నెట్‌వర్క్ జూలై 2025 నుండి జీఎస్‌టీఆర్-3బీ ఫామ్‌ను ఎడిట్ చేయలేమని ప్రకటించింది. అలాగే, ఏ పన్ను చెల్లింపుదారుడు కూడా మూడేళ్ల తర్వాత గత తేదీకి సంబంధించిన జీఎస్‌టీ రిటర్న్‌ను ఫైల్ చేయలేడు. ఈ నియమం జీఎస్‌టీఆర్-1, జీఎస్‌టీఆర్-3బీ, జీఎస్‌టీఆర్-4, జీఎస్‌టీఆర్-5, జీఎస్‌టీఆర్-5ఏ, జీఎస్‌టీఆర్-6, జీఎస్‌టీఆర్-7, జీఎస్‌టీఆర్-8, జీఎస్‌టీఆర్-9 లకు వర్తిస్తుంది. దీని ఉద్దేశ్యం సమయానికి రిటర్న్ దాఖలు చేసే అలవాటును ప్రోత్సహించడం.

యూపీఐ ఛార్జ్‌బ్యాక్ కొత్త నియమం

ఇప్పటివరకు తిరస్కరించబడిన ఛార్జ్‌బ్యాక్ క్లెయిమ్‌లను మళ్లీ ప్రాసెస్ చేయడానికి బ్యాంకులకు నేషనల్ పేమెంట్స్ కార్పొరేషన్ ఆఫ్ ఇండియా అనుమతి తీసుకోవాల్సి వచ్చేది. జూన్ 20, 2025న ప్రకటించిన కొత్త నియమం ప్రకారం, బ్యాంకులు ఇప్పుడు ఎన్‌పీసీఐ అనుమతి లేకుండానే సరైన ఛార్జ్‌బ్యాక్ క్లెయిమ్‌లను మళ్లీ ప్రాసెస్ చేయగలవు.

పాత డీజిల్ వాహనాలకు ఇక ఇంధనం లేదు

జూలై 1, 2025 నుండి ఢిల్లీలోని పెట్రోల్ పంపులు 10 సంవత్సరాల కంటే పాత డీజిల్ వాహనాలకు, 15 సంవత్సరాల కంటే పాత పెట్రోల్ వాహనాలకు ఇంధనాన్ని అమ్మవు. ఈ నియమాన్ని ఎయిర్ క్వాలిటీ మేనేజ్ మెంట్ కమిషన్ అమలు చేసింది.

కమర్షియల్ సిలిండర్ చౌక

ఐఓసీఎల్ గణాంకాల ప్రకారం వరుసగా నాలుగో నెలలో కమర్షియల్ గ్యాస్ సిలిండర్ల ధరలు తగ్గాయి. జూలై మొదటి రోజున ఢిల్లీలో కమర్షియల్ గ్యాస్ సిలిండర్ల ధర రూ.58.5 తగ్గింది. కోల్‌కతాలో రూ.57, ముంబైలో రూ.58, చెన్నైలో రూ.57.5 చొప్పున తగ్గింది. దీనితో ఇప్పుడు నాలుగు ప్రధాన నగరాల్లో కమర్షియల్ గ్యాస్ సిలిండర్ల ధరలు వరుసగా ఢిల్లీ రూ.1665, కోల్‌కతా రూ.1769, ముంబై రూ.1616.50, చెన్నై రూ.1823.50గా ఉన్నాయి.

జెట్ ఫ్యూయెల్ ధరలు పెరిగాయ్

దేశీయ విమానాలకు ఉపయోగించే జెట్ ఫ్యూయెల్ ధరలు పెరిగాయ్. ఢిల్లీ విమానాశ్రయంలో జెట్ ఫ్యూయెల్ ధర రూ.6,271.5 (7.55%) పెరిగి కిలోలీటర్‌కు రూ.89,344.05కి చేరింది. కోల్‌కతాలో రూ.6,473.52 (7.52%) పెరిగి రూ.92,526.09కి, ముంబైలో రూ.5,946.5 (7.66%) పెరిగి రూ.83,549.23కి, చెన్నైలో రూ.6,602.49 (7.67%) పెరిగి రూ.92,705.74కి చేరుకున్నాయి.