SBI Card : ఎస్‌బీఐ క్రెడిట్ కార్డుదారులకు షాక్.. జులై 15 నుండి 'ఎయిర్ ఇన్సూరెన్స్' మాయం

SBI Card: ఎస్‌బీఐ క్రెడిట్ కార్డులు వాడుతున్నారా? అలాంటి వాళ్లకు ఓ షాకింగ్ న్యూస్. ఎస్‌బీఐకి అనుబంధ సంస్థ అయిన ఎస్‌బీఐ కార్డ్, తమ క్రెడిట్ కార్డ్ కస్టమర్ల కోసం కొత్త రూల్స్ తీసుకొచ్చింది. ఈ మార్పులు 2025 జులై 15 నుండి అమలులోకి వస్తాయి. ఈ మార్పుల వల్ల మీ క్రెడిట్ కార్డుపై వచ్చే విమాన ప్రమాద బీమా (ఎయిర్ ఇన్సూరెన్స్), చెల్లింపు నిబంధనలు మారిపోతాయి. కార్డుతో ముడిపడి ఉన్న నష్టాలు, ఆర్థిక స్థిరత్వాన్ని దృష్టిలో ఉంచుకొని ఈ నిర్ణయం తీసుకున్నట్లు ఎస్‌బీఐ కార్డ్ చెబుతోంది.

ఎస్‌బీఐ కార్డ్ విడుదల చేసిన ప్రకటన ప్రకారం.. ఎస్‌బీఐ కార్డ్ ఎలైట్, ఎస్‌బీఐ కార్డ్ మైల్స్ ఎలైట్, ఎస్‌బీఐ కార్డ్ మైల్స్ ప్రైమ్ వంటి ప్రీమియం కార్డులపై గతంలో లభించిన రూ.కోటి విలువైన కాంప్లిమెంటరీ విమాన ప్రమాద బీమా 2025 జులై 15 నుండి ఉండదు. అదేవిధంగా, ఎస్‌బీఐ కార్డ్ ప్రైమ్, ఎస్‌బీఐ కార్డ్ పల్స్ కార్డులపై లభించిన రూ. 50 లక్షల వరకు ఉచిత బీమా కవరేజ్ కూడా రద్దు అవుతోంది.

ఈ మార్పులు కేవలం ఎస్‌బీఐ ప్రధాన కార్డులకే పరిమితం కాదు. 2025 ఆగస్టు 11 నుండి, యూకో బ్యాంక్ ఎస్‌బీఐ కార్డ్ ఎలైట్, సెంట్రల్ బ్యాంక్ ఆఫ్ ఇండియా ఎస్‌బీఐ కార్డ్ ఎలైట్ వంటి కో-బ్రాండెడ్ క్రెడిట్ కార్డులపై కూడా రూ.కోటి వరకు ఉన్న విమాన ప్రమాద బీమా కవరేజ్ తొలగించారు. అంతేకాకుండా, యూకో బ్యాంక్ ఎస్‌బీఐ కార్డ్ ప్రైమ్, సెంట్రల్ బ్యాంక్ ఆఫ్ ఇండియా ఎస్‌బీఐ కార్డ్ ప్రైమ్, కర్ణాటక బ్యాంక్ ఎస్‌బీఐ ప్లాటినమ్ కార్డ్, ఫెడరల్ బ్యాంక్ ఎస్‌బీఐ ప్లాటినమ్ కార్డ్ వంటి కార్డులపై లభించిన రూ. 50 లక్షల వరకు బీమా ప్రయోజనం కూడా తొలగిపోయింది.

ఎస్‌బీఐ కార్డ్ మినిమం డ్యూ అమౌంట్ లెక్కించే విధానంలో కూడా మార్పులు చేసింది. 2025 జులై 15 నుండి అమల్లోకి వచ్చే కొత్త ఫార్ములా ప్రకారం, ఇప్పుడు మినిమం డ్యూ అమౌంట్లో ఈ కిందివి కూడా కలుపుతారు:

100% జీఎస్టీ (GST): మీరు వాడిన మొత్తంపై పడే జీఎస్టీ అంతా.

అన్ని ఈఎంఐ బకాయిలు: మీ కార్డుపై ఉన్న ఈఎంఐలన్నీ.

ఫైనాన్స్ ఛార్జ్‌లు, ఇతర రుసుములు: ఆలస్య రుసుములు, వడ్డీలు వంటివి.

ఓవర్‌లిమిట్ అమౌంట్: మీ క్రెడిట్ లిమిట్ దాటి వాడిన మొత్తం.

మిగిలిన బకాయి మొత్తంలో అదనంగా 2శాతం: అంటే మీరు వాడిన మొత్తంపై అదనంగా 2 శాతం కూడా కట్టాలి.

ఈ కొత్త విధానం వల్ల వినియోగదారులు సకాలంలో, మరింత సమర్థవంతంగా చెల్లింపులు చేయాలని, తద్వారా క్రెడిట్ కార్డులను మరింత బాధ్యతాయుతంగా ఉపయోగించాలని ఎస్‌బీఐ కార్డ్ టార్గెట్గా పెట్టుకుంది.

ఎస్‌బీఐ కార్డ్ తీసుకున్న ఈ మార్పులు లక్షలాది మంది కార్డుదారులపై నేరుగా ప్రభావం చూపుతాయి. ఒకవైపు బీమా కవరేజ్ రద్దు అవ్వడం వల్ల భద్రత తగ్గుతుంది, మరోవైపు చెల్లింపు నిబంధనలలో కఠినత్వం వల్ల వినియోగదారులు మరింత ఆర్థిక క్రమశిక్షణను పాటించాల్సి వస్తుంది.