Gold: భారత్‌ కంటే తక్కువ ధరకే బంగారం ఎక్కడ దొరుకుతుందో తెలుసా?

Gold: బంగారం ఎప్పటికీ బంగారమే... ఈ ట్యాగ్ లైన్ కేవలం ఒక ప్రకటనకు మాత్రమే పరిమితం కాదు.. ఇది దాదాపు ప్రతి భారతీయుడి ఆలోచన. ఇదే భారత్‌ను ప్రపంచంలోనే అతిపెద్ద బంగారం దిగుమతిదారుగా మార్చింది. భారతదేశంలో బంగారానికి ఉన్న క్రేజ్ కారణంగానే నేర ముఠాలు దీనిని విదేశాల నుండి అక్రమంగా తరలిస్తూ పట్టుబడి జైలు పాలవుతున్నారు. అందుకే, ఈరోజు మనం భారత్‌ కంటే తక్కువ ధరకు బంగారం లభించే కొన్ని దేశాల గురించి తెలుసుకుందాం. అంతేకాకుండా, అక్కడి నుంచి చట్టబద్ధంగా బంగారాన్ని మీతో ఎలా తీసుకురావచ్చో కూడా తెలుసుకుందాం.

బంగారం చౌకగా లభించే దేశాలు:

దుబాయ్: దుబాయ్‌ను "సిటీ ఆఫ్ గోల్డ్" అని పిలుస్తారు. ఇక్కడ బంగారంపై ఎటువంటి వ్యాట్ (VAT) లేదా దిగుమతి సుంకం ఉండదు. అందువల్ల దుబాయ్ గోల్డ్ మార్కెట్‌లో బంగారం ధరలు భారతదేశంతో పోలిస్తే తక్కువగా ఉంటాయి.

సింగపూర్: ఇది ప్రధాన బంగారు వ్యాపార కేంద్రం. ఇక్కడ తక్కువ పన్నులు, అధిక నాణ్యత గల బంగారం అందుబాటులో ఉంటుంది.

బ్యాంకాక్: భారత్ నుంచి చాలా మంది బ్యాంకాక్ సందర్శిస్తుంటారు. బ్యాంకాక్ గోల్డ్ మార్కెట్ మంచి బంగారు ధరలకు ప్రసిద్ధి చెందింది. ఇక్కడ బంగారం ధరలు భారతదేశంతో పోలిస్తే తక్కువగా ఉంటాయి మరియు స్వచ్ఛత కూడా బాగుంటుంది.

స్విట్జర్లాండ్: ఇది బంగారం శుద్ధి, నిల్వకు ప్రసిద్ధి చెందింది. ఇక్కడ బంగారం స్వచ్ఛత చాలా బాగుంటుంది. ధరలు కూడా తక్కువగా ఉంటాయి.

హాంకాంగ్: ఇక్కడ పన్ను మినహాయింపుల కారణంగా బంగారం ధర చాలా తక్కువగా ఉంటుంది.

భారత్‌కు బంగారం ఎలా తీసుకురావాలి?

మీరు విదేశాల నుంచి బంగారం కొనుగోలు చేసి భారతదేశానికి తీసుకురావాలనుకుంటే, ప్రభుత్వం రూపొందించిన కొన్ని నియమాలను తప్పనిసరిగా పాటించాలి. ఒక పురుషుడు విదేశాల నుండి బంగారం తీసుకురావాలంటే, అతను 20 గ్రాముల వరకు బంగారాన్ని ఎటువంటి దిగుమతి సుంకం లేకుండా తీసుకురావచ్చు. అదేవిధంగా, ఒక మహిళా ప్రయాణికురాలు 40 గ్రాముల వరకు బంగారాన్ని పన్ను లేకుండా తీసుకురావచ్చు. భారతదేశంలో బంగారాన్ని కేవలం ఆభరణాల రూపంలో మాత్రమే తీసుకురావడానికి అనుమతి ఉంది. బిస్కెట్లు, నాణేల రూపంలో తీసుకురావడం నిషేధం. అలాగే, మీరు కొనుగోలు చేసిన బంగారానికి సంబంధించిన బిల్లు మీ వద్ద తప్పనిసరిగా ఉండాలి.