Telangana: మన సీట్లు మనకే.. ఇంజినీరింగ్‌, వృత్తి విద్యా కోర్సుల్లో ఏపీ విద్యార్థుల కోటా కట్‌

Telangana: ఇంజినీరింగ్‌, వృత్తి విద్యా కోర్సుల్లో ఏపీ విద్యార్థుల కోటాను కట్ చేస్తూ రాష్ట్ర ప్రభుత్వం గురువారం ఉత్తర్వులు జారీ చేసింది. ఏపీ పునర్విభజన చట్టం ప్రకారం ఏపీకి కోటా గడువు పదేళ్లు ముగియడంతో కేబినెట్ సబ్ కమిటీ సిఫార్సుల మేరకు ఈ జీవోను విడుదల చేసింది. వ్రుత్తి విద్య కోర్సుల్లో 85శాతం సీట్లు తెలంగాణ విద్యార్థులకే కేటాయించింది. 15శాతం అన్ రిజర్వ్డ్ కోటా సీట్ల కేటాయింపులో ప్రభుత్వం కొన్ని మార్పులను చేసింది. 15శాతం సీట్లకు 4 రకాల వారిని అర్హులుగా గుర్తిస్తూ ప్రభుత్వం మార్గదర్శకాలను జారీ చేసింది. తెలంగాణ స్థానికులతో పాటు ఇతర రాష్ట్రాల్లో చదివిన వారు కూడా 15శాతం అన్ రిజర్వ్డ్ సీట్లకు అర్హులని ప్రభుత్వం తన ఉత్తర్వుల్లో పేర్కొంది. ఇతర రాష్ట్రాల్లో చదివిన వారు రాష్ట్రంలో పదేళ్లు చదివి ఉండాలని నిబంధన పెట్టింది. కేంద్ర, రాష్ట్ర సంస్థల్లో పనిచేస్తున్నవారి పిల్లలు 15శాతం సీట్లకు అర్హులని తెలిపింది.

ఇంజనీరింగ్, ఎంబీఏ, ఎంసీఏ, బీఈడీ, న్యాయవిద్య, ఫార్మసీ, ఫిజికల్ ఎడ్యుకేషన్ కోర్సుల్లో ఈ కోటాను వర్తింపజేయనున్నారు. అయితే ఈఏపీ సెట్ కు ఈనెల 25 నుంచి దరఖాస్తులు ఆహ్వానించాల్సి ఉండగా జీవో జారీ ఆలస్యం కావడంతో ప్రక్రియ వాయిదా పడింది. తాజాగా జీవో వెలువడటంతో మార్చి 1 నుంచి ఈఏపీ సెట్ దరఖాస్తుల స్వీకరణ ప్రక్రియ చేపట్టనున్నారు.

రాష్ట్రంలోని 15 ఇంజనీరింగ్ కాలేజీల్లో ఎన్నారై కోటా సీట్లకు అనుమతి ఉండగా వాటి సంఖ్యను 32కు పెంచుతూ ఆలిండియా కౌన్సిల్ ఆఫ్ టెక్నికల్ ఎడ్యుకేషన్ అనుమతి ఇచ్చింది. ఈ మేరకు గురువారం 32 కాలేజీల జాబితాను రిలీజ్ చేసింది. ఎన్నారై కోటాలో 15శాతం సీట్లను ఆయా కాలేజీలు భర్తీ చేసుకునే అవకాశం ఉంది.