Reciprocal Tariff: రెసిప్రోకల్ టారిఫ్ అంటే ఏమిటి? ట్రంప్ భారత్‌పై ఎందుకు విధించారు?

Reciprocal Tariff: ప్రపంచ వాణిజ్యంలో సమానత్వం, నిష్పాక్షికతను తీసుకురావడానికి అమలు చేసే విధానమే రెసిప్రోకల్ టారిఫ్. అసలు రెసిప్రోకల్ టారిఫ్ అంటే ఏమిటో మీకు తెలుసా? అమెరికా భారత్‌పై 26 శాతం టారిఫ్‌ను విధించినట్లు ప్రకటించింది. దీని ప్రభావం వ్యవసాయం, వస్త్ర, ఆటో రంగాలపై స్పష్టంగా కనిపించనుంది. ఈ రెసిప్రోకల్ టారిఫ్ అంటే ఏమిటో ఇప్పుడు తెలుసుకుందాం.

రెసిప్రోకల్ టారిఫ్ అంటే ఏమిటి?

ముందుగా టారిఫ్ అంటే ఏమిటో తెలుసుకుందాం. టారిఫ్ అనేది ఒక రకమైన పన్ను. ఒక దేశం దిగుమతి చేసుకునే వస్తువులపై ఈ పన్ను విధిస్తుంది. దీని ప్రధాన ఉద్దేశం ప్రభుత్వం కోసం ఆదాయాన్ని పెంచడం, దేశీయ కంపెనీలను విదేశీ పోటీ నుండి రక్షించడం. ఇక, రెసిప్రోకల్ అంటే మీరు ఎలా చేస్తారో, మేము కూడా అలాగే చేస్తాము అని అర్థం.

రెసిప్రోకల్ టారిఫ్ ఉద్దేశం

ప్రభుత్వం దీనిని వాణిజ్య విధానం, ఆదాయ సేకరణ సాధనంగా ఉపయోగిస్తుంది. ఒక ఉదాహరణతో చెప్పాలంటే.. భారతదేశం అమెరికా వస్తువులపై 20 శాతం టారిఫ్ విధిస్తే, అమెరికా కూడా భారతీయ వస్తువులపై 20 శాతం టారిఫ్ విధిస్తుంది. దీని ముఖ్య ఉద్దేశం వాణిజ్య అసమతుల్యతను తగ్గించడం, దేశీయ మార్కెట్‌ను పరిరక్షించడం.

టారిఫ్‌ను ఆయుధంగా మార్చిన ట్రంప్

అమెరికా వాణిజ్య లోటును తగ్గించడానికి, ఇతర దేశాలు అమెరికన్ వస్తువులపై అధిక టారిఫ్‌లు విధించకుండా నిరోధించడానికి డొనాల్డ్ ట్రంప్ ఈ రెసిప్రోకల్ టారిఫ్‌ను తన ఆయుధంగా ఉపయోగించారు. ఒక దేశం అమెరికన్ దిగుమతులపై భారీగా సుంకాలు విధిస్తే, అమెరికా కూడా ఆ దేశం దిగుమతులపై సమానమైన టారిఫ్‌ను విధిస్తుందని ఆయన పేర్కొన్నారు. దీనిని ఆయన "న్యాయమైన వాణిజ్యం"గా అభివర్ణించారు.

భారతదేశ GDPపై ప్రభావం

అమెరికా అధ్యక్షుడు డొనాల్డ్ ట్రంప్ భారతదేశంపై 26 శాతం రెసిప్రోకల్ టారిఫ్ విధించారు. దీని కారణంగా భారతదేశ GDPపై ప్రభావం పడే అవకాశం ఉంది. ఈ విషయంపై ట్రంప్ మాట్లాడుతూ, ఈ టారిఫ్‌లు రెసిప్రోకల్ అని, అంటే ఇతర దేశాలు అమెరికన్ ఉత్పత్తులపై విధించిన సుంకాలను ప్రతిస్పందిస్తూ విధించామని అన్నారు.