Diabetes: డయాబెటిస్‌తో బాధపడుతున్నారా? అయితే డ్రై ఫ్రూట్స్ తినొచ్చా ?

Diabetes: డ్రై ఫ్రూట్స్ ఆరోగ్యానికి చాలా మంచివి, కానీ డయాబెటిస్ (షుగర్) ఉన్నవారికి వీటిని తినడం మంచిదా కాదా అనే సందేహం కొందరిలో ఉంటుంది. కొంతమంది వీటిని ఆరోగ్యకరమైన స్నాక్స్‌గా చూస్తే, మరికొందరు వీటిలో ఉండే నేచురల్ షుగర్స్ వల్ల తమ షుగర్ లెవెల్స్ పెరుగుతాయని భయపడతారు. అయితే, డయాబెటిస్ రోగులు డ్రై ఫ్రూట్స్‌ను పూర్తిగా మానేయాల్సిన అవసరం లేదు. సరైన రకాన్ని, సరైన మోతాదులో తీసుకుంటే అవి ఆరోగ్యానికి మంచివేనని డాక్టర్లు సూచిస్తున్నారు. చక్కెర కలపని, సహజమైన, నానబెట్టిన డ్రై ఫ్రూట్స్ షుగర్ లెవెల్స్ కంట్రోల్లో ఉంచేందుకు సహాయపడతాయి. అయితే, చక్కెర పూత ఉన్న లేదా ప్రాసెస్ చేసిన డ్రై ఫ్రూట్స్, అలాగే ఎక్కువ మోతాదులో తీసుకున్నవి హానికరం కావచ్చు. మీ ఆహారంలో ఏవైనా మార్పులు చేసుకునే ముందు డాక్టర్ లేదా డైటీషియన్‌ను సంప్రదించడం మంచిది.

డాక్టర్లు తెలిపిన ప్రకారం అన్ని డ్రై ఫ్రూట్స్ ఒకేలా ఉండవు. బాదం, అక్రోట్, పిస్తా వంటి కొన్ని డ్రై ఫ్రూట్స్ ఫైబర్, హెల్తీ ఫాట్స్ తో నిండి ఉంటాయి. ఇవి రక్తంలో షుగర్ లెవల్స్ స్థిరంగా ఉంచడానికి సహాయపడతాయి. బాదం, అక్రోట్, పిస్తా, చియా సీడ్స్, అవిసె గింజలు వంటివి డయాబెటిస్ రోగులకు మంచివి. బాదంలో ఫైబర్, విటమిన్ ఇ ఎక్కువగా ఉంటాయి, అక్రోట్‌లో ఒమేగా-3 ఫ్యాటీ యాసిడ్స్ ఉంటాయి. ఇవి గుండె ఆరోగ్యానికి కూడా మంచివి. పిస్తాలో ప్రోటీన్, ఫైబర్ ఉండటం వల్ల త్వరగా ఆకలి వేయదు. ఈ డ్రై ఫ్రూట్స్‌ను పరిమితంగా రోజువారీ ఆహారంలో చేర్చుకోవచ్చు, ఎందుకంటే వాటి గ్లైసెమిక్ ఇండెక్స్ తక్కువగా ఉంటుంది.

అదే సమయంలో, కొన్ని డ్రై ఫ్రూట్స్‌కు దూరంగా ఉండాలి. ఎండుద్రాక్ష (కిష్మిష్), ఎండు ఖర్జూరం, అత్తిపండ్లు వంటి వాటిలో సహజ చక్కెర అధికంగా ఉంటుంది, ఇవి రక్తంలో చక్కెర స్థాయిలను త్వరగా పెంచుతాయి. అలాగే, మార్కెట్లో లభించే చక్కెర పూత ఉన్న లేదా ప్రాసెస్ చేసిన డ్రై ఫ్రూట్స్‌ను పూర్తిగా మానేయాలి. డయాబెటిస్ రోగులు డ్రై ఫ్రూట్స్‌ను పరిమిత మోతాదులో మాత్రమే తీసుకోవాలి. ఉదాహరణకు, రోజుకు 4 నుంచి 5 నానబెట్టిన బాదం, 2 అక్రోట్ గింజలు, 5 నుంచి 6 ఉప్పు లేని పిస్తాలు, లేదా ఒక టీస్పూన్ చియా లేదా అవిసె గింజలు తీసుకోవచ్చు.