Chiranjeevi: మెగా ఫ్యాన్స్‌కు పండుగ.. జనవరి 4న ‘మన శంకర వర ప్రసాద్ గారు’ ట్రైలర్ విడుదల

మెగాస్టార్ చిరంజీవి కథానాయకుడిగా నటిస్తున్న మాస్ ఎంటర్‌టైనర్ చిత్రం ‘మన శంకర వర ప్రసాద్ గారు’ ట్రైలర్ విడుదల తేదీ ఖరారైంది. ఈ సినిమా థియేట్రికల్ ట్రైలర్‌ను జనవరి 4న విడుదల చేయనున్నట్లు చిత్రబృందం అధికారికంగా ప్రకటించింది. ఈ మేరకు విడుదల చేసిన కొత్త పోస్టర్ ప్రస్తుతం అభిమానుల్లో ఆసక్తిని పెంచుతోంది.

సంక్రాంతి పండుగ కానుకగా ఈ చిత్రాన్ని జనవరి 12న ప్రపంచవ్యాప్తంగా థియేటర్లలో విడుదల చేయనున్నారు. దర్శకుడు అనిల్ రావిపూడి దర్శకత్వంలో తెరకెక్కిన ఈ చిత్రం పూర్తి స్థాయి ఫ్యామిలీ యాక్షన్ ఎంటర్‌టైనర్‌గా రూపొందింది.

ఈ సినిమాలో విక్టరీ వెంకటేశ్ కీలక పాత్రలో నటించగా, చిరంజీవి–వెంకటేశ్‌లు తొలిసారిగా వెండితెరపై కలిసి కనిపించనుండటం విశేషంగా మారింది. దీంతో ఈ ప్రాజెక్ట్‌పై మొదటి నుంచే భారీ అంచనాలు నెలకొన్నాయి. చిరంజీవికి జోడీగా నయనతార నటిస్తున్నారు.

షైన్ స్క్రీన్స్, గోల్డ్ బాక్స్ ఎంటర్‌టైన్‌మెంట్స్ బ్యానర్లపై సాహు గారపాటి, సుష్మిత కొణిదెల ఈ చిత్రాన్ని నిర్మిస్తున్నారు. భీమ్స్ సిసిరోలియో సంగీతం అందించారు. ఇప్పటికే ప్రమోషన్లు జోరుగా సాగుతుండగా, జనవరి 7న ప్రీ-రిలీజ్ ఈవెంట్ నిర్వహించేందుకు సన్నాహాలు జరుగుతున్నట్లు సమాచారం. అలాగే యూఎస్‌ఏలో ఈ చిత్రానికి సంబంధించిన ఓవర్సీస్ అడ్వాన్స్ బుకింగ్స్ ఇప్పటికే ప్రారంభమయ్యాయి.