Vishal Injured: షూటింగ్‌లో తీవ్రంగా గాయపడిన హీరో విశాల్

Vishal Injured: కోలీవుడ్‌ నటుడు విశాల్‌ మరోసారి తీవ్రంగా గాయపడ్డారు. ఫైట్‌ షూటింగ్‌ జరుగుతుండగా గోడను ఢీకొని కిందపడిపోయారు. విశాల్‌ ప్రస్తుతం 'నాట్‌ ఏ కామన్‌ మ్యాన్‌' మూవీలో నటిస్తున్నారు. ప్రస్తుతం హైదరాబాద్‌లో ఈ సినిమా షూట్‌ జరుగుతోంది. డైరెక్టర్ శరవణన్ యాక్షన్‌ సన్నివేశాలను చిత్రీకరిస్తున్నారు. ఎంతో ఎనర్జిటిక్‌గా సాగుతోన్న క్లైమాక్స్‌ ఫైట్‌ సీక్వెన్స్‌లో విశాల్ బలంగా గోడను ఢీకొని కిందపడిపోయారు.

ఈ ప్రమాదంలో విశాల్‌ వెన్ను భాగానికి దెబ్బతగిలింది. ప్రస్తుతం ఆయన వైద్యుల సమక్షంలో ట్రీట్‌మెంట్‌ తీసుకుంటున్నారు. విశాల్‌ ఆరోగ్యంగానే ఉన్నారని చిత్ర యూనిట్‌ వెల్లడించింది. ఈ ప్రమాదానికి సంబంధించిన ఓ వీడియో నెట్టింట్లో తెగ చక్కర్లు కొడుతోంది.

ఇదిలా ఉండగా గతంలోనూ 'నాట్‌ ఏ కామన్‌ మ్యాన్‌' షూట్‌లో తీవ్రంగా గాయపడ్డారు విశాల్‌. ఫైట్‌ సీక్వెన్స్‌ సమయంలో సమన్వయ లోపం ఏర్పడటంతో ఆయన తలకు, కంటికి స్వల్ప గాయాలయ్యాయి. యాక్షన్‌ ఎంటర్‌టైనర్‌గా తెరకెక్కుతోన్న ఈ సినిమాలో విశాల్‌ విభిన్నమైన లుక్‌లో కనిపించనున్నారు.