PM Modi : ప్రధాని మోదీని కలిసిన చిన్నజీయర్ స్వామి.. సమతామూర్తి వేడుకలకు ఆహ్వానం

PM Modi : ముచ్చింతల్‌లోని సమతామూర్తి స్ఫూర్తి కేంద్రం మూడవ వార్షికోత్సవానికి రంగం సిద్ధమవుతోంది. ఈ సందర్భంగా ఈ ఏడాది చివర్లో జరగనున్న ముగింపు వేడుకలను మరింత ఘనంగా నిర్వహించేందుకు ప్రయత్నాలు ముమ్మరమయ్యాయి. ఈ వేడుకలకు ముఖ్య అతిథిగా భారత ప్రధానమంత్రి నరేంద్ర మోదీని ఆహ్వానించారు. ఈ మేరకు శ్రీ త్రిదండి చిననజీయర్ స్వామి, మైహోమ్ గ్రూప్ ఛైర్మన్ డా. జూపల్లి రామేశ్వర్‌రావు, ఎగ్జిక్యూటివ్ వైస్ ఛైర్మన్ జూపల్లి రామురావు ఢిల్లీలోని ప్రధాని నివాసంలో మోదీని కలిశారు.

ఢిల్లీలోని ప్రధాని నివాసంలో ఈ ఉదయం జరిగిన ఈ భేటీలో, డాక్టర్ రామేశ్వర్‌రావు, రామురావుతో కలిసి చిననజీయర్ స్వామి ప్రధానమంత్రి నరేంద్ర మోదీని కలిశారు. ఈ సందర్భంగా స్వామిజీ హైదరాబాద్ ముచ్చింతల్‌లోని సమతామూర్తి స్ఫూర్తి కేంద్రం విశేషాలను ప్రధానికి వివరించారు. సమతామూర్తి స్ఫూర్తి కేంద్రం ప్రాంగణంలో ఉన్న 108 దివ్య దేశాలలో కొలువుదీరిన దేవతామూర్తులకు జరిగే నిత్య కైంకర్యాల గురించి ప్రధానికి తెలియజేశారు.

దాదాపు 45 నిమిషాల పాటు సాగిన ఈ భేటీలో, జీయర్ ట్రస్ట్ ఆధ్వర్యంలో నడుస్తున్న నేత్ర విద్యాలయం (కంటి ఆసుపత్రి), ఆయుర్వేద-హోమియో కళాశాల పురోగతి గురించి ప్రధాని ఆసక్తిగా తెలుసుకున్నారు. ఆధ్యాత్మిక, విద్య, ఆరోగ్య రంగాల్లో జీయర్ ట్రస్ట్ చేస్తున్న సేవలను ప్రధాని మోదీ అభినందించారు.

ఆధ్యాత్మిక, దైవిక కార్యక్రమాల ద్వారా సమాజంలో భక్తిభావాన్ని పెంపొందిస్తూ, స్ఫూర్తిదాయకంగా నిలుస్తున్నారంటూ ప్రధాని మోదీ ఈ సందర్భంగా మైహోమ్ గ్రూప్ ఛైర్మన్ డా. రామేశ్వర్‌రావు, ఎగ్జిక్యూటివ్ వైస్ ఛైర్మన్ రామురావును ప్రత్యేకంగా అభినందించారు. వార్షికోత్సవ వేడుకలలో పాల్గొనే విషయంలో ప్రధాని మోదీ సానుకూలంగా స్పందించినట్లు సమాచారం.