Wayne Larkins: 86 సెంచరీలు, 41 వేలకు పైగా రన్స్.. దిగ్గజ క్రికెటర్ కన్నుమూత

Wayne Larkins: ప్రస్తుతం టీమ్ ఇండియా ఇంగ్లండ్‌తో ఐదు మ్యాచ్‌ల టెస్ట్ సిరీస్ ఆడుతోంది. హెడింగ్లీలో జరిగిన మొదటి టెస్ట్ మ్యాచ్‌లో ఇంగ్లండ్ గెలిచింది. ఇప్పుడు రెండు జట్ల మధ్య రెండో టెస్ట్ జూలై 2 నుండి ప్రారంభమవుతోంది. అయితే, రెండో టెస్ట్ మ్యాచ్ ప్రారంభానికి ముందే, ఇంగ్లండ్ జట్టులో విషాదఛాయలు అలుముకున్నాయి. జట్టు మాజీ అనుభవజ్ఞుడైన ఆటగాడు వేన్ లార్కిన్స్ తన 71వ ఏట కన్నుమూశారు. క్రీడా ప్రపంచంలో నెడ్ గా ప్రసిద్ధి చెందిన లార్కిన్స్, చాలా కాలంగా తీవ్ర అనారోగ్యంతో బాధపడుతున్నారు. ఆయనకు చికిత్స కూడా అందిస్తున్నారు.

86 సెంచరీలు, 41 వేలకు పైగా పరుగులు

వేన్ లార్కిన్స్ తన క్రికెట్ కెరీర్‌లో ఎన్నో అద్భుతమైన రికార్డులను నమోదు చేసుకున్నారు. ఫస్ట్‌క్లాస్ క్రికెట్లో 482 ఫస్ట్‌క్లాస్ మ్యాచ్‌లలో, ఆయన 34.44 సగటుతో 27,142 పరుగులు సాధించారు. ఇందులో 59 సెంచరీలు, 116 అర్ధ సెంచరీలు ఉన్నాయి. లాన్ లార్కిన్స్ 485 లిస్ట్ A మ్యాచ్‌లలో 30.75 సగటుతో 13,594 పరుగులు సాధించారు. ఈ ఫార్మాట్‌లో ఆయన బ్యాట్ నుండి మొత్తం 26 సెంచరీలు, 66 అర్ధ సెంచరీలు వచ్చాయి. ఆయన ఇంగ్లండ్ తరపున 13 టెస్ట్ మ్యాచ్‌లు, 25 వన్డే అంతర్జాతీయ మ్యాచ్‌లు ఆడారు.

టెస్ట్ కెరీర్‌లో 3 అర్ధ సెంచరీల సహాయంతో 493 పరుగులు చేశారు. 25 వన్డే మ్యాచ్‌లలో 1 సెంచరీ సహాయంతో 591 పరుగులు సాధించారు. మొత్తంగా, లార్కిన్స్ తన క్రికెట్ కెరీర్ మొత్తంలో 1358 ఇన్నింగ్స్‌లలో 41,820 పరుగులు సాధించారు. ఇందులో 86 సెంచరీలు, 185 అర్ధ సెంచరీలు ఉన్నాయి. మాజీ బ్యాట్స్‌మెన్ వేన్ లార్కిన్స్ మృతి పట్ల ఇంగ్లండ్ అండ్ వేల్స్ క్రికెట్ బోర్డు తీవ్ర సంతాపం వ్యక్తం చేసింది. “ఈ దిగ్గజ ఆటగాడి మరణం వల్ల బోర్డు తీవ్ర దుఃఖంలో ఉంది. వారి కుటుంబానికి స్నేహితులకు మా ప్రగాఢ సానుభూతి” అని ECB ఒక ప్రకటనలో తెలిపింది.