India vs England: శతకంతో మేజిక్ చేసిన గిల్‌.. తొలి రోజు భారత్ స్కోరు 310/5

India vs England, 2nd Test: టీమిండియా టెస్టు కెప్టెన్ శుభ్‌మన్ గిల్ జోరు కొనసాగుతోంది. ఇంగ్లాండ్‌తో రెండో టెస్టులో తొలి రోజు ఆట ముగిసే సమయానికి గిల్ అజేయ శతకంతో క్రీజులో నిలవగా, భారత్ 5 వికెట్ల నష్టానికి 310 పరుగులు చేసింది. గిల్ 114 పరుగులతో, రవీంద్ర జడేజా 41 పరుగులతో క్రీజులో ఉన్నారు.

ఈ టెస్ట్‌లో టాస్ గెలిచిన ఇంగ్లాండ్ కెప్టెన్ బెన్ స్టోక్స్ బౌలింగ్ ఎంచుకోగా, భారత్ తొలుత బ్యాటింగ్ ప్రారంభించింది. కానీ ఆరంభంలోనే కేఎల్ రాహుల్ (2) త్వరగా వెనుదిరగ్గా, యువ ఓపెనర్ యశస్వి జైశ్వాల్ చెలరేగాడు. ఇంగ్లాండ్ బౌలర్లపై ధాటిగా ఆడుతూ హాఫ్ సెంచరీ (87 బంతుల్లో 50) నమోదు చేసిన జైశ్వాల్.. శతకం దిశగా పయనిస్తుండగా 87 పరుగుల వద్ద స్టోక్స్ బౌలింగ్‌లో ఔట్ అయ్యాడు.

జైశ్వాల్ ఔట్ అయిన తర్వాత కెప్టెన్ గిల్ ఇన్నింగ్స్‌ను నిలబెట్టాడు. రిషభ్ పంత్ (25), నితీశ్ రెడ్డి (1) వెంట వెంటనే ఔట్ కావడంతో టీమిండియా కాస్త ఒడిదుడుకులకు గురైంది. అయితే గిల్‌కు జోడీగా వచ్చిన రవీంద్ర జడేజా శాంతంగా ఆడి, కీలక భాగస్వామ్యాన్ని నెలకొల్పాడు. వీరిద్దరూ ఆరో వికెట్‌కు 99 పరుగుల అజేయ భాగస్వామ్యం నమోదు చేశారు.

ఈ మ్యాచ్‌లో గిల్ టెస్టు కెరీర్‌లో తన ఏడో శతకాన్ని నమోదు చేశాడు. ప్రత్యేకంగా చెప్పుకోవాల్సిన విషయం ఏంటంటే — ఈ ఏడింటిలో నలుగు సెంచరీలు ఇంగ్లాండ్‌పై సాధించాడనే దాంట్లోనే ఉంది. కెప్టెన్‌గా బాధ్యతలు చేపట్టిన తర్వాత గిల్ మూడు ఇన్నింగ్స్‌ల్లోనే రెండో సెంచరీతో మెరిశాడు.

ఇంగ్లాండ్ బౌలర్లలో క్రిస్ వోక్స్ రెండు వికెట్లు తీయగా, బ్రైడన్ కేర్స్, బెన్ స్టోక్స్, షోయబ్ బషీర్ తలో వికెట్ పడగొట్టారు.