Shubman Gill: గిల్ సూపర్ షో.. కెప్టెన్ గా దుమ్ములేపుతున్న శుభ్ మాన్

Shubman Gill: టీమ్ ఇండియా టెస్ట్ కెప్టెన్‌గా బాధ్యతలు చేపట్టిన తర్వాత శుభ్‌మన్ గిల్ బ్యాట్ పరుగుల వరద పారిస్తోంది. కెప్టెన్‌గా తన మొదటి టెస్ట్ మ్యాచ్‌లో భారత్ ఓడిపోయి ఉండొచ్చు, కానీ బ్యాటర్‌గా గిల్ ప్రదర్శన మాత్రం అద్భుతం. ఇప్పుడు, తన కెప్టెన్సీలో రెండో టెస్ట్ మ్యాచ్ ఆడుతున్న గిల్, ఎడ్జ్‌బాస్టన్‌లో ఇంగ్లాండ్‌తో జరుగుతున్న రెండో టెస్ట్ మ్యాచ్ మొదటి ఇన్నింగ్స్‌లో అదిరిపోయే సెంచరీతో మెరిశాడు. తొలి నుంచీ చాలా ఓపికగా ఆడిన గిల్, 199 బంతుల్లో 11 బౌండరీలతో తన సెంచరీని పూర్తి చేశాడు. వరుసగా రెండు బౌండరీలు కొట్టి సెంచరీ సాధించడం విశేషం.

ఎడ్జ్‌బాస్టన్ టెస్ట్ మొదటి రోజున, ఇంగ్లాండ్ కెప్టెన్ బెన్ స్టోక్స్ టాస్ గెలిచి ముందుగా బౌలింగ్ ఎంచుకున్నాడు. అయితే, టాస్ ఓడిపోయి బ్యాటింగ్‌కు దిగిన భారత్‌కు మంచి ఆరంభం లభించలేదు. దీంతో, 4వ స్థానంలో బ్యాటింగ్‌కు వచ్చిన కెప్టెన్ గిల్, టీమ్‌ను ఆదుకునే ఇన్నింగ్స్ ఆడాడు. 125 బంతుల్లోనే తన హాఫ్ సెంచరీని పూర్తి చేసిన గిల్, ఇప్పటివరకు ఆడిన మూడు ఇన్నింగ్స్‌లలో రెండు సార్లు 50 పరుగుల మార్కును దాటి, తనకు అప్పగించిన బాధ్యతను చాలా చక్కగా నిర్వర్తించాడు.

ముందుగా చెప్పినట్లుగా, శుభ్‌మన్ గిల్ ఎడ్జ్‌బాస్టన్ టెస్ట్ కన్నా ముందు లీడ్స్ టెస్ట్‌లో కూడా కెప్టెన్సీ ఇన్నింగ్స్ ఆడాడు. ఆ మ్యాచ్ మొదటి ఇన్నింగ్స్‌లో 147 పరుగులు చేసిన గిల్, 227 బంతుల్లో 19 బౌండరీలు, 1 సిక్సర్ కొట్టాడు. ఇప్పుడు ఎడ్జ్‌బాస్టన్‌లో కూడా గిల్ అదే విధంగా అదరగొట్టాడు. ఇది గిల్ టెస్ట్ కెరీర్‌లో 7వ సెంచరీ కాగా, అంతర్జాతీయ క్రికెట్‌లో అతని 16వ సెంచరీ.

ఈ సెంచరీతో శుభ్‌మన్ గిల్, భారత స్టార్ ఆటగాడు విరాట్ కోహ్లీ రికార్డును కూడా సమం చేశాడు. వాస్తవానికి, ఎడ్జ్‌బాస్టన్ మైదానంలో భారత కెప్టెన్‌గా సెంచరీ చేసిన రెండో కెప్టెన్‌గా గిల్ నిలిచాడు. ఇంతకుముందు, 2018లో విరాట్ కోహ్లీ మాత్రమే ఈ ఘనత సాధించాడు.