రాజాసింగ్ రాజీనామా: బీజేపీ నాయకత్వంపై తీవ్ర ఆగ్రహంతో గోషామహల్ ఎమ్మెల్యే సంచలన నిర్ణయం

హైదరాబాద్: తెలంగాణ రాష్ట్ర రాజకీయాల్లో పెద్ద సంచలనంగా మారింది గోషామహల్ ఎమ్మెల్యే రాజాసింగ్ రాజీనామా. తెలంగాణ బీజేపీ అధ్యక్ష ఎన్నికల ప్రక్రియపై తీవ్ర అసంతృప్తి వ్యక్తం చేసిన ఆయన, పార్టీకి తన రాజీనామా లేఖను రాష్ట్ర అధ్యక్షుడు కిషన్ రెడ్డికి పంపినట్లు వెల్లడించారు.

రాజాసింగ్ మాట్లాడుతూ –

“పార్టీ అధ్యక్ష పదవికి నామినేషన్ వేయాలనుకున్నాను. దరఖాస్తు తీసుకున్నప్పటికీ, జాతీయ కౌన్సిల్ సభ్యులు మద్దతు ఇవ్వకుండా నన్ను బెదిరించారు. పార్టీలో ఉండాలా లేక సస్పెండ్ చేయాలా అంటూ బెదిరింపులు వచ్చాయి. ముగ్గురు సభ్యుల సంతకాలు సాధించగలిగినా, మిగిలిన ఏడుగురి సంతకాలు రాలేదు. అందుకే నామినేషన్ వేయలేకపోయాను. కిషన్ రెడ్డికి రాజీనామా లేఖ పంపించాను.”

అధ్యక్షుడి ఎంపికపై విమర్శలు:

రాష్ట్ర బీజేపీ అధ్యక్షుడి నియామకంపై ఇప్పటికే రాజాసింగ్ అసహనం వ్యక్తం చేశారు. ఒకే వ్యక్తిని అధిష్ఠానం ఎంచుకోవడం వెనుక ప్రజాస్వామ్య సూత్రాలకు వ్యతిరేకంగా ఉందని, బూత్ కార్యకర్త నుంచి ముఖ్యనేత వరకు ఓటు వేసి నాయకుడిని ఎన్నుకోవాల్సిన అవసరం ఉందని రాజాసింగ్ పునరుద్ఘాటించారు. “నీవాడు – నావాడు అనే విధంగా నాయకులను నియమిస్తే పార్టీకే నష్టం” అని ఆగ్రహం వ్యక్తం చేశారు.

2014 నుంచి అవమానాలు – అభిమానం తగ్గింది:

“నేను 2014 నుంచే పార్టీ కోసం శ్రమిస్తున్నాను. కానీ ప్రతిసారి పార్టీ నేతల నుంచి నిరాశే ఎదురవుతుంది. పార్టీకి కష్టకాలంలో నిలబడ్డా కానీ, ఇప్పుడు నన్ను పక్కనబెట్టారు. పార్టీలో విలువ లేదనిపిస్తోంది” అని రాజాసింగ్ ఎమోషనల్‌గా చెప్పారు.

బీజేపీలో అంతర్గత ఉద్రిక్తతలు పెరుగుతాయా?

రాజాసింగ్ రాజీనామాతో తెలంగాణ బీజేపీలో సభ్యుల మధ్య అసంతృప్తి, సీనియర్ నాయకులకు అవమానం జరిగిందన్న భావన బలపడుతున్నట్లుగా రాజకీయ విశ్లేషకులు చెబుతున్నారు. రాబోయే స్థానిక ఎన్నికలు, 2028 అసెంబ్లీ ఎన్నికల్లో పార్టీపై ఇది ప్రభావం చూపుతుందా అన్నదానిపై చర్చ మొదలైంది.