Mancherial: మంచిర్యాల కలెక్టరేట్ నుంచి ఆర్టీఐ వారోత్సవాల వీక్షణ!

Mancherial: సమాచార హక్కు చట్టం–2005ను పారదర్శకంగా, జవాబుదారితనంతో అమలు చేయాలని రాష్ట్ర గవర్నర్ శివ ప్రతాప్ శుక్ల అధికారులకు సూచించారు. ప్రజలకు ప్రభుత్వ పాలనకు సంబంధించిన సమాచారాన్ని అందుబాటులో ఉంచడంతో పాటు, ప్రభుత్వ శాఖల్లో జవాబుదారితనాన్ని పెంపొందించాలని అన్నారు. సమాచార హక్కు చట్టం వారోత్సవాలు–2026 సందర్భంగా శుక్రవారం హైదరాబాద్‌లోని రవీంద్ర భారతిలో నిర్వహించిన రాష్ట్రస్థాయి కార్యక్రమాన్ని మంచిర్యాల సమీకృత జిల్లా కలెక్టరేట్‌లోని సమావేశ మందిరం నుంచి అధికారులు ప్రత్యక్ష ప్రసారం ద్వారా వీక్షించారు.

ఈ సందర్భంగా గవర్నర్ మాట్లాడుతూ ప్రతి ఒక్కరూ సమాచార హక్కు చట్టంపై సమగ్ర అవగాహన కలిగి ఉండాలని సూచించారు. చట్టాన్ని సమర్థవంతంగా అమలు చేయడంతో పాటు దుర్వినియోగం కాకుండా చూడాల్సిన బాధ్యత అధికారులతో పాటు పౌర సమాజంపై ఉందన్నారు. సమాచార హక్కు చట్టం కింద అందిన దరఖాస్తులకు నిర్ణీత గడువులోగా సమాధానాలు ఇవ్వాలని స్పష్టం చేశారు.

జిల్లా స్థాయిలోనూ చట్టంపై ప్రజలకు అవగాహన కల్పిస్తూ, పారదర్శకమైన సేవలు అందించేందుకు అధికారులు సమన్వయంతో పనిచేయాలని తెలిపారు. అనంతరం సమాచార హక్కు చట్టాన్ని నిష్పక్షపాతంగా అమలు చేస్తూ, ప్రజలకు చట్టబద్ధంగా అందించాల్సిన సమాచారాన్ని నిర్ణీత సమయంలో అందిస్తామని అధికారులు ప్రతిజ్ఞ చేశారు.

ప్రభుత్వ శాఖల్లో సమాచార నిర్వహణను మెరుగుపరచడం, ప్రజలకు సమాచారాన్ని సులభంగా అందుబాటులో ఉంచడం, చట్టంపై ప్రజల్లో అవగాహన పెంపొందించడం వంటి అంశాలపై దృష్టి సారించాలని సూచించారు. రాష్ట్ర సమాచార కమిషన్ సేవలు, చట్టం అమలుకు సంబంధించిన వివరాలతో రూపొందించిన ‘సమాచార దర్పణం’ బ్రోచర్‌ను ఈ సందర్భంగా ఆవిష్కరించారు. రాష్ట్రవ్యాప్తంగా సమాచార హక్కు చట్టం అమలులో ఉత్తమ ప్రతిభ కనబరిచిన అధికారులు, సిబ్బందికి అవార్డులు అందజేశారు.

ఈ కార్యక్రమంలో అదనపు కలెక్టర్లు పి. చంద్రయ్య, వి. రాములు, కలెక్టరేట్ పరిపాలన అధికారి శ్రీనివాసరావు దేశ్‌పాండే, వివిధ శాఖల జిల్లా అధికారులు, ప్రజా సమాచార అధికారులు, సహాయ ప్రజా సమాచార అధికారులు, మొదటి అప్పీళ్ల అధికారులు తదితరులు పాల్గొన్నారు.