Nirmal: రేవోజిపేటలో వినూత్నంగా గణపతి నిమజ్జనం!

నిర్మల్: నిర్మల్ జిల్లా దస్తురాబాద్ మండల కేంద్ర పరిధిలోని రేవోజిపేట గ్రామంలో ఈ ఏడాది వినాయక చవితి నవరాత్రులను గ్రామస్తులంతా ఏకతాటిపైకి వచ్చి అత్యంత వైభవంగా నిర్వహించారు. తొమ్మిది రోజుల పాటు నిత్య ధూపదీప నైవేద్యాలతో, భక్తిశ్రద్ధలతో పూజలు అందుకున్న గణపయ్యను ఈరోజు నిమజ్జనానికి తరలించారు.

ఎక్కడా లేని విధంగా రేవోజిపేట గ్రామస్తులు ఈసారి వినూత్నంగా గణనాథుడి నిమజ్జన శోభాయాత్రను చేపట్టారు. సాధారణంగా ట్రాక్టర్లు, డీసీఎం వంటి భారీ వాహనాలపై విగ్రహాలను ఊరేగించే పద్ధతికి భిన్నంగా.. స్వామివారి ప్రతిమను ప్రత్యేకంగా అలంకరించిన పల్లకిలో కొలువుదీర్చారు.

గ్రామస్తులంతా కలిసి ఆ పల్లకిని తమ భుజాలపై మోస్తూ కాలినడకన ముందుకు సాగారు. డప్పు వాయిద్యాల మోతలు, యువకుల నృత్యాలు, మహిళల మంగళహారతులతో రేవోజిపేట పురవీధులు మార్మోగిపోయాయి. భక్తిపారవశ్యంతో సాగిన ఈ శోభాయాత్రను చూసేందుకు చుట్టుపక్కల ప్రాంతాల నుంచి కూడా భక్తులు భారీగా తరలివచ్చారు.