అగ్రిగోల్డ్‌ కేసులో మరోసారి ఆస్తుల వేట..

అమరావతి: అగ్రిగోల్డ్‌ కేసులో డిపాజిటర్లకు చెల్లింపుల ప్రక్రియను మరింత వేగవంతం చేసే దిశగా ప్రభుత్వం కీలక చర్యలకు ఉపక్రమించింది. డిపాజిటర్ల నుంచి సేకరించిన సొమ్ముతో కొనుగోలు చేసి.. కుటుంబ సభ్యులు, బంధువుల పేర్లపై ఉంచినట్లు విచారణలో తేలిన మరిన్ని ఆస్తులను గుర్తించిన ప్రభుత్వం.. వాటిని జప్తు చేసేందుకు ఆదేశాలు జారీ చేసింది. ఇప్పటికే అగ్రిగోల్డ్‌ ఆస్తుల వ్యవహారంపై దర్యాప్తు కొనసాగిస్తున్న సీఐడీకి తాజా ఆస్తులపై చర్యలు తీసుకునే బాధ్యతను అప్పగించింది.

విచారణలో భాగంగా కృష్ణా జిల్లాలోని పోరంకి, పెనమలూరు, ఈదర ప్రాంతాల్లో మొత్తం దాదాపు 6.55 ఎకరాల భూమి ఎల్లా జయలక్ష్మి పేరుతో ఉన్నట్లు అధికారులు గుర్తించారు. ఈ భూములను అగ్రిగోల్డ్‌ డిపాజిటర్ల సొమ్ముతోనే కొనుగోలు చేసినట్లు దర్యాప్తులో నిర్ధారణకు వచ్చినట్లు ప్రభుత్వం పేర్కొంది. దీంతో ఈ ఆస్తులను కూడా కేసులో భాగంగా పరిగణించి జప్తు చేసేందుకు హోంశాఖ ఉత్తర్వులు జారీ చేసింది.

ఇక్కడ మరో కీలక అంశం వెలుగులోకి వచ్చింది. ఎల్లా జయలక్ష్మికి అగ్రిగోల్డ్‌ కంపెనీల్లో జాయింట్‌ ఎండీగా వ్యవహరించిన అవ్వా హేమసుందర వరప్రసాద్‌తో కుటుంబ సంబంధం ఉన్నట్లు విచారణలో గుర్తించారు. వరప్రసాద్‌కు ఆమె అత్తగారుగా ఉన్నట్లు అధికారులు గుర్తించారు. దీంతో కంపెనీకి సంబంధం లేని వ్యక్తుల పేర్లపై ఆస్తులు కొనుగోలు చేశారా? ఆ ఆస్తుల వెనుక అసలు ఆర్థిక లావాదేవీలు ఏమిటి? డిపాజిటర్ల సొమ్ము ఏ మార్గంలో ఆస్తుల కొనుగోలుకు మళ్లింది? అన్న కోణాల్లోనూ దర్యాప్తు సాగుతోంది.

ఇదే కేసులో కర్ణాటక రాష్ట్రంలోనూ మరో కీలక ఆస్తిని అధికారులు గుర్తించారు. బెంగళూరు జిల్లా అనేకల్‌ తాలూకా, సర్జాపూర్‌ హోబ్లీ పరిధిలోని ముత్తనల్లూర్‌ అమ్మనికేరి గ్రామంలో 3.32 ఎకరాల భూమి ఎన్‌. మమత పేరుతో ఉన్నట్లు గుర్తించారు. ఈ భూమిని కూడా అగ్రిగోల్డ్‌ డిపాజిటర్ల నుంచి సేకరించిన సొమ్ముతోనే కొనుగోలు చేసినట్లు దర్యాప్తులో నిర్ధారణ అయినట్లు ప్రభుత్వం తెలిపింది.

దీంతో ఆంధ్రప్రదేశ్‌లోని 6.55 ఎకరాలతో పాటు కర్ణాటకలోని 3.32 ఎకరాల భూమిని కలిపి దాదాపు 9.87 ఎకరాల ఆస్తులపై జప్తు చర్యలకు రంగం సిద్ధమైంది. ఆస్తుల స్వాధీనం, వాటి విలువ నిర్ధారణ, తదుపరి న్యాయపరమైన ప్రక్రియ చేపట్టేలా సీఐడీ డీజీని ప్రభుత్వం ఆదేశించింది.

అగ్రిగోల్డ్‌ వ్యవహారంలో వేలాది మంది డిపాజిటర్లు తమ సొమ్ము కోసం ఏళ్లుగా ఎదురుచూస్తున్నారు. డిపాజిటర్ల ప్రయోజనాలను కాపాడటంతో పాటు.. కంపెనీకి సంబంధించిన ఆస్తులు ఎక్కడెక్కడ ఉన్నాయో గుర్తించి వాటిని స్వాధీనం చేసుకోవడం ప్రభుత్వానికి, దర్యాప్తు సంస్థలకు కీలకంగా మారింది. ఈ క్రమంలోనే కంపెనీ ఆస్తులను నేరుగా కాకుండా బంధువులు, ఇతర వ్యక్తుల పేర్లపైకి మళ్లించిన అంశాలపై సీఐడీ ప్రత్యేక దృష్టి సారిస్తోంది.

తాజాగా గుర్తించిన ఆస్తుల జప్తుతో అగ్రిగోల్డ్‌ కేసులో ఆస్తుల అన్వేషణ మరింత విస్తరించే అవకాశం కనిపిస్తోంది. డిపాజిటర్ల సొమ్ముతో కొనుగోలు చేసిన ప్రతి ఆస్తినీ గుర్తించి.. చట్టపరంగా స్వాధీనం చేసుకుని.. బాధితులకు న్యాయం చేసే దిశగా ప్రభుత్వం చర్యలు కొనసాగిస్తోంది. తాజా జప్తు ఉత్తర్వులతో అగ్రిగోల్డ్‌ ఆస్తుల కేసులో మరో కీలక అడుగు పడినట్లైంది.