Etapaka: గొల్లగుప్పలో 53 మందికి అస్వస్థత, బాలిక మృతి!

Etapaka: అల్లూరి సీతారామరాజు జిల్లా ఎటపాక మండలం గొల్లగుప్ప గ్రామంలో పలువురు అస్వస్థతకు గురైన ఘటనపై ఉప ముఖ్యమంత్రి పవన్‌ కల్యాణ్‌ ఆరా తీశారు. గ్రామంలో చోటుచేసుకున్న పరిణామాలపై జిల్లా కలెక్టర్‌తో మాట్లాడి పరిస్థితిని తెలుసుకున్నారు. అస్వస్థతకు కారణాలు ఏమిటి, ప్రస్తుతం గ్రామంలో వైద్య పరిస్థితి ఎలా ఉంది, బాధితులకు అందుతున్న వైద్య సేవలు తదితర అంశాలపై వివరాలు అడిగి తెలుసుకున్నారు.

గొల్లగుప్ప గ్రామంలో రెండో తరగతి చదువుతున్న బాలిక మృతి చెందగా, మరో 53 మంది అస్వస్థతకు గురైనట్లు కలెక్టర్‌ ఉప ముఖ్యమంత్రికి వివరించారు. ఈ ఘటనపై ప్రభుత్వం అప్రమత్తమైంది. గ్రామంలో ప్రత్యేక వైద్య బృందాలను ఏర్పాటు చేసి పరిస్థితిని నిరంతరం పర్యవేక్షిస్తున్నారు. అస్వస్థతకు గురైన వారికి అవసరమైన వైద్య పరీక్షలు, చికిత్స అందిస్తున్నారు.

మలేరియా అనుమానాల నేపథ్యంలో గ్రామంలో ఇప్పటివరకు 71 మందికి మలేరియా నివారణ మాత్రలను పంపిణీ చేసినట్లు అధికారులు పవన్‌ కల్యాణ్‌కు తెలిపారు. అయితే అస్వస్థతకు అసలు కారణం ఏమిటన్నది స్పష్టంగా నిర్ధారించాల్సిన అవసరం ఉందని ఉప ముఖ్యమంత్రి సూచించారు.

ఇప్పటికే పంపిణీ చేసిన మలేరియా మందులను కూడా ల్యాబ్‌కు పంపించి శాస్త్రీయ పరీక్షలు నిర్వహించాలని ఆదేశించారు. మందుల నాణ్యత, వాటి వినియోగం తదితర అంశాలను కూడా పరిశీలించాలని అధికారులకు సూచించారు.

గ్రామంలో ఒక్కొక్కరి ఆరోగ్య పరిస్థితిని పరిశీలించాల్సిన అవసరం ఉందని పవన్‌ కల్యాణ్‌ స్పష్టం చేశారు. గ్రామస్తులందరికీ తక్షణమే సమగ్ర ఆరోగ్య పరీక్షలు నిర్వహించాలని ఆదేశించారు. ముఖ్యంగా చిన్నారులు, వృద్ధులు, ఇప్పటికే అనారోగ్య లక్షణాలు కనిపిస్తున్న వారిపై ప్రత్యేక దృష్టి పెట్టాలని సూచించారు. జ్వరం, వాంతులు, నీరసం, ఒళ్లు నొప్పులు వంటి లక్షణాలతో ఎవరైనా బాధపడుతున్నారా అనే విషయాన్ని వైద్య సిబ్బంది ఇంటింటికీ వెళ్లి పరిశీలించాలని పేర్కొన్నారు.

గ్రామంలో పారిశుద్ధ్య పరిస్థితి, తాగునీటి నాణ్యత, దోమల నియంత్రణ చర్యలను కూడా సమీక్షించాలని అధికారులకు సూచించారు. అవసరమైన చోట పారిశుద్ధ్య కార్యక్రమాలు చేపట్టడంతో పాటు దోమల నివారణకు చర్యలు తీసుకోవాలని ఆదేశించారు. గ్రామంలో పరిస్థితి పూర్తిగా అదుపులోకి వచ్చే వరకు వైద్య బృందాలు అందుబాటులో ఉండాలని స్పష్టం చేశారు.

అస్వస్థతకు గురైన వారికి మెరుగైన వైద్యం అందించేందుకు అవసరమైన అన్ని ఏర్పాట్లు చేయాలని పవన్‌ కల్యాణ్‌ ఆదేశించారు. అవసరమైతే బాధితులను మెరుగైన వైద్య సదుపాయాలున్న ఆసుపత్రులకు తరలించాలని సూచించారు. పరిస్థితిని ఎప్పటికప్పుడు తనకు తెలియజేయాలని అధికారులను ఆదేశించారు.

ఇదిలా ఉండగా, రెండో తరగతి బాలిక మృతి చెందడంపై ఉప ముఖ్యమంత్రి పవన్‌ కల్యాణ్‌ తీవ్ర విచారం వ్యక్తం చేశారు. బాలిక కుటుంబ సభ్యులకు ప్రగాఢ సానుభూతి తెలిపారు. కుటుంబానికి ప్రభుత్వం అండగా ఉంటుందని భరోసా ఇచ్చారు. ఘటనకు దారితీసిన కారణాలను శాస్త్రీయంగా గుర్తించి, గ్రామంలో మరింత మంది అస్వస్థతకు గురికాకుండా అన్ని ముందస్తు చర్యలు తీసుకోవాలని అధికారులకు స్పష్టం చేశారు.