ఎల్‌నినోపై సీఎం సమీక్ష.. ముందస్తు చర్యలకు దిశానిర్దేశం..

అమరావతి: ఎల్‌నినో ప్రభావాన్ని ఎదుర్కొనేందుకు ముందస్తుగా సిద్ధం చేసిన యాక్షన్‌ ప్లాన్‌ను సమర్థవంతంగా అమలు చేయాలని ముఖ్యమంత్రి చంద్రబాబు నాయుడు అధికారులను ఆదేశించారు. ఎల్‌నినో ప్రభావం కేవలం వ్యవసాయ రంగానికే పరిమితం కాదని.. అన్ని వ్యవస్థలపై ప్రభావం చూపే అవకాశం ఉన్నందున సమన్వయంతో పనిచేయాలని సూచించారు. వివిధ శాఖల ఉన్నతాధికారులు, జిల్లా కలెక్టర్లు, అధికారులు, ఉద్యోగులు, ఆర్ఎస్‌కే సిబ్బందితో నిర్వహించిన టెలీకాన్ఫరెన్స్‌లో సీఎం పలు అంశాలపై సమీక్షించారు.

ముందుగానే అంచనా.. యాక్షన్ ప్లాన్ అమలు

ఎల్‌నినో పరిస్థితులను ముందుగానే అంచనా వేసుకున్నామని చంద్రబాబు తెలిపారు. ముందుగా సిద్ధం చేసుకున్న కార్యాచరణ ప్రణాళిక ప్రకారం ప్రతి ఒక్కరూ పనిచేయాలని సూచించారు. ఎల్‌నినో ప్రభావం వల్ల రైతులు ఇబ్బందులు పడకుండా చూడటంతో పాటు.. వినియోగదారులపై కూడా భారం పడకుండా చర్యలు తీసుకోవాలని ఆదేశించారు. విపత్తులు వచ్చినప్పుడు వాటి ప్రభావం ప్రజలపై పడకుండా చూడటం ప్రభుత్వాల బాధ్యత అని స్పష్టం చేశారు.

రైతులను ఆదుకోవాలి.. బీమా పరిహారం అందించాలి

ఎల్‌నినో ప్రభావంతో పంటలకు నష్టం వాటిల్లే పరిస్థితుల్లో రైతులకు అండగా నిలవాలని సీఎం సూచించారు. ఇప్పటికే పంటల బీమా చేయించామని.. పంట నష్టం సంభవిస్తే బీమా పరిహారం రైతులకు సకాలంలో అందేలా చర్యలు తీసుకోవాలని ఆదేశించారు. అధికారులు క్రమం తప్పకుండా క్షేత్రస్థాయిలో పర్యటిస్తూ పరిస్థితులను పరిశీలించాలని చెప్పారు.

డిమాండ్‌ ఆధారిత సాగుపై దృష్టి

మార్కెట్‌లో డిమాండ్‌కు అనుగుణంగా పంటల సాగును ప్రోత్సహించాలని చంద్రబాబు సూచించారు. పప్పుధాన్యాలు, చిరుధాన్యాలు, వర్షాభావాన్ని తట్టుకునే పంటల సాగును పెంచడంతో పాటు డిమాండ్‌ ఎక్కువగా ఉన్న పంటలను సాగు చేసేలా రైతుల్లో అవగాహన కల్పించాలన్నారు. సంప్రదాయేతర ప్రాంతాల్లో కూడా ఉల్లి, మిరప సాగును ప్రోత్సహించాలని సూచించారు.

నిత్యావసర ధరలపై ప్రత్యేక దృష్టి

ఎల్‌నినో ప్రభావంతో పంటల ఉత్పత్తి తగ్గితే నిత్యావసరాల ధరలు పెరిగే అవకాశం ఉన్నందున ముందస్తు చర్యలు తీసుకోవాలని సీఎం ఆదేశించారు. బియ్యం, ఉల్లి, పామాయిల్, కందిపప్పు ధరలను అదుపులో ఉంచాలని సూచించారు. గోడౌన్లలో ఉన్న బియ్యం నిల్వలను పరిశీలించి.. అవసరమైన మేరకు మార్కెట్‌లోకి విడుదల చేసే చర్యలు చేపట్టాలన్నారు.

ఉల్లి సాగును పెంచాలి

ప్రస్తుతం ఉల్లి ధరలను నియంత్రించేందుకు వివిధ ప్రాంతాల నుంచి ఉల్లిని కొనుగోలు చేస్తున్నామని సీఎం తెలిపారు. భవిష్యత్‌లో ఉల్లికి ఉన్న డిమాండ్‌కు అనుగుణంగా సాగును ప్రోత్సహించాలని సూచించారు. సంప్రదాయేతర ప్రాంతాల్లోనూ ఉల్లి సాగు చేపట్టేలా రైతులను ప్రోత్సహించాలని అధికారులకు దిశానిర్దేశం చేశారు.

కిచెన్ గార్డెన్లకు ప్రోత్సాహం

కూరగాయల ధరలను నియంత్రించేందుకు కిచెన్ గార్డెన్లను ప్రోత్సహించాలని చంద్రబాబు సూచించారు. స్వయం సహాయక సంఘాల ఆధ్వర్యంలో కిచెన్ గార్డెన్ల ద్వారా కూరగాయలను పండించేలా చర్యలు తీసుకోవాలని చెప్పారు. ఈ విధానాన్ని వ్యవస్థీకృతంగా అమలు చేయగలిగితే కూరగాయల ధరలను కొంతమేర నియంత్రించవచ్చన్నారు.

హైరిస్క్ ఉద్యాన పంటలకు రూ.190 కోట్లు

కొన్ని ప్రాంతాల్లో ఉద్యాన పంటలపై ఎల్‌నినో ప్రభావం ఎక్కువగా ఉండే అవకాశం ఉందని సీఎం తెలిపారు. హైరిస్క్ ప్రాంతాల్లో ఉద్యాన పంటలను కాపాడేందుకు ప్రభుత్వం రూ.190 కోట్లు కేటాయించిందని చెప్పారు. ఈ నిధులను సమర్థవంతంగా వినియోగించి రైతులకు అవసరమైన సహాయం అందించాలని అధికారులను ఆదేశించారు.

వర్షాలను సద్వినియోగం చేసుకోవాలి

ఇటీవల కొన్ని రోజులుగా రాష్ట్రంలో వర్షాలు కురుస్తున్నాయని.. అందుబాటులోకి వచ్చిన వర్షపు నీటిని సద్వినియోగం చేసుకోవాలని సీఎం సూచించారు. వర్షాధార పంటలు, ప్రకృతి వ్యవసాయానికి ప్రాధాన్యత ఇవ్వాలని చెప్పారు. పచ్చదనం ఏమాత్రం తగ్గకుండా చర్యలు తీసుకోవాలని అధికారులను ఆదేశించారు. పశువులకు తాగునీటితో పాటు పశుగ్రాసం అందుబాటులో ఉండేలా చూడాలన్నారు.

జలధారను ముమ్మరం చేయాలి

వీబీ-జీ రామ్‌జీ పనులను అనుసంధానం చేసుకుంటూ జలధార కార్యక్రమాన్ని ముమ్మరం చేయాలని చంద్రబాబు సూచించారు. నీటి సంరక్షణ, భూగర్భ జలాల పెంపు, కరవు పరిస్థితులను ఎదుర్కొనే చర్యలను సమన్వయంతో అమలు చేయాలని చెప్పారు. మల్చింగ్‌ కోసం విత్తనాలు జల్లడం వంటి చర్యలను కూడా చేపట్టాలని సూచించారు.

రాష్ట్రంలో 50.7 శాతం లోటు వర్షపాతం

రాష్ట్రవ్యాప్తంగా ప్రస్తుతం 50.7 శాతం మేర లోటు వర్షపాతం నమోదైందని సీఎం తెలిపారు. ప్రకాశం, అన్నమయ్య, సత్యసాయి జిల్లాల్లో అత్యధిక లోటు వర్షపాతం కనిపిస్తోందన్నారు. కర్నూలు, నంద్యాల, అనంతపురం జిల్లాల్లోని పంటలపై ఎల్‌నినో ప్రభావం ఎక్కువగా కనిపిస్తోందని చెప్పారు.

79 శాతం భూముల్లో ఖరీఫ్ సాగు

రాష్ట్రంలో ఖరీఫ్‌ సీజన్‌లో 30.84 లక్షల హెక్టార్లలో సాగు చేయాల్సి ఉండగా.. ఎల్‌నినో పరిస్థితుల నేపథ్యంలో ఇప్పటివరకు 79 శాతం భూముల్లో సాగు పనులు ప్రారంభమైనట్లు సీఎం వెల్లడించారు. పప్పుధాన్యాల సాగు మెరుగ్గా ఉన్నప్పటికీ.. నూనెగింజల సాగు తక్కువగా ఉందని తెలిపారు. పరిస్థితులకు అనుగుణంగా పంటల సాగును మార్చుకోవాల్సిన అవసరం ఉందన్నారు.

కంటింజెన్సీ ప్లాన్‌ అమలు చేయాలి

ఇప్పటికే సిద్ధం చేసిన ఖరీఫ్‌ కంటింజెన్సీ ప్లాన్‌ను సమర్థవంతంగా అమలు చేయాలని చంద్రబాబు ఆదేశించారు. 5.21 లక్షల హెక్టార్లకు పప్పుధాన్యాలు, చిరుధాన్యాలు, పచ్చిరొట్ట ఎరువులను సరఫరా చేశామని తెలిపారు. 1.31 లక్షల క్వింటాళ్ల విత్తనాలను 80 శాతం సబ్సిడీతో అందించామని చెప్పారు. ఖరీఫ్‌ కంటింజెన్సీ ప్రణాళిక కోసం రూ.60 కోట్లు సిద్ధంగా ఉంచినట్లు వెల్లడించారు.

తాగునీరు, పశువులకు నీరు అందించాలి

ఎల్‌నినో ప్రభావంతో తాగునీటి సమస్యలు తలెత్తకుండా ముందస్తు చర్యలు చేపట్టాలని సీఎం సూచించారు. ప్రతి ఒక్కరికీ తాగునీరు అందించడంతో పాటు పశువులకు నీరు, పశుగ్రాసం అందుబాటులో ఉంచాలన్నారు. కరవు ప్రభావిత ప్రాంతాల్లో నీటి లభ్యతపై అధికారులు నిరంతరం పర్యవేక్షణ చేయాలని ఆదేశించారు.

హంద్రీ-నీవా ద్వారా నీటి సరఫరా

ముందస్తుగా తీసుకున్న చర్యల వల్ల ఎల్‌నినో వంటి పరిస్థితుల్లోనూ హంద్రీ-నీవా కాల్వల్లో నీరు ప్రవహిస్తోందని చంద్రబాబు తెలిపారు. హంద్రీ-నీవా ద్వారా చివరి భూములకు నీరందించామని.. ప్రస్తుతం తాగునీటికి ఇబ్బందులు రాకుండా చర్యలు తీసుకుంటున్నామని చెప్పారు. రూ.3,500 కోట్ల ఖర్చుతో 100 రోజుల్లో హంద్రీ-నీవా కాల్వల్లో నీటిని పారించగలిగామని సీఎం పేర్కొన్నారు.

సాగునీటి పెట్టుబడులపై సీఎం ప్రస్తావన

2014-19 మధ్య కాలంలో సాగునీటి రంగానికి రూ.65 వేల కోట్లు ఖర్చు చేశామని చంద్రబాబు తెలిపారు. 2019-24 మధ్య కాలంలో నాటి ప్రభుత్వం కేవలం రూ.22 వేల కోట్లు మాత్రమే ఖర్చు చేసిందని పేర్కొన్నారు. ప్రాజెక్టులు పూర్తయి ఉంటే ఎల్‌నినో వంటి విపత్తులు వచ్చినా ఇబ్బందులు తక్కువగా ఉండేవని సీఎం వ్యాఖ్యానించారు.

క్షేత్రస్థాయిలో అవగాహన పెంచాలి

ఎల్‌నినోను ఒక సవాలుగా స్వీకరించి ప్రజాప్రతినిధులు, అధికార యంత్రాంగం, రైతులు, సాగునీటి సంఘాలు సమన్వయంతో పనిచేయాలని సీఎం సూచించారు. స్థానిక ఎన్నికల ప్రక్రియ కొనసాగుతున్నప్పటికీ ప్రజాప్రతినిధులు గ్రామాల్లో ఎల్‌నినో ప్రభావం, వర్షాభావ పంటలు, ప్రత్యామ్నాయ సాగు విధానాలపై రైతులకు అవగాహన కల్పించాలని అన్నారు.

అధికారుల నిర్లక్ష్యానికి తావులేదు

ఎల్‌నినో ప్రభావం వల్ల రైతులు, వినియోగదారులు ఇబ్బందులు పడే పరిస్థితి అధికారుల నిర్లక్ష్యం కారణంగా ఏర్పడకూడదని చంద్రబాబు స్పష్టం చేశారు. కేంద్ర ప్రభుత్వం కొన్ని పంటలకు కనీస మద్దతు ధర అందిస్తున్నందున ఈ అంశంపై కేంద్రంతో సమన్వయం చేసుకోవాలని సూచించారు. తాత్కాలిక, మధ్యంతర ప్రణాళికలతో ముందుకు సాగుతూ.. ఎల్‌నినో ప్రభావాన్ని ఎదుర్కొనేలా అన్ని శాఖలు సమన్వయంతో పనిచేయాలని ముఖ్యమంత్రి ఆదేశించారు....