AP: ఏపీలో పలు జిల్లాలకు వర్ష హెచ్చరిక.. పిడుగులు, ఈదురుగాలులపై అప్రమత్తం!

AP: ఆంధ్రప్రదేశ్‌లో వాతావరణం మరోసారి చురుగ్గా మారింది. రాష్ట్రంలోని పలు జిల్లాలకు వర్షాలు, పిడుగులు, ఈదురుగాలులపై రాష్ట్ర విపత్తుల నిర్వహణ సంస్థ అలర్ట్ జారీ చేసింది. భారత వాతావరణ శాఖ కూడా సెప్టెంబర్ 19 నుంచి 21 వరకు ఏపీలో అక్కడక్కడ ఉరుములు, పిడుగులు, గంటకు 60 కిలోమీటర్ల వరకు ఈదురుగాలులు వీచే అవకాశం ఉందని తెలిపింది.

శ్రీకాకుళం, విజయనగరం, పార్వతీపురం మన్యం, అల్లూరి సీతారామరాజు, అనకాపల్లి, ఏలూరు, కాకినాడ, కృష్ణా, ఎన్టీఆర్ జిల్లాలకు వాతావరణ హెచ్చరిక జారీ అయింది. ఆయా జిల్లాల్లో కొన్నిచోట్ల పిడుగులతో కూడిన మోస్తరు వర్షాలు కురిసే అవకాశం ఉందని అధికారులు తెలిపారు. గంటకు 50 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉండటంతో ప్రజలు అప్రమత్తంగా ఉండాలని సూచించారు.

ముఖ్యంగా ఉరుములు, పిడుగులతో కూడిన వర్షం సమయంలో ప్రజలు చెట్లు, హోర్డింగులు, విద్యుత్ స్తంభాల కింద ఉండకూడదని రాష్ట్ర విపత్తుల నిర్వహణ సంస్థ హెచ్చరించింది. బహిరంగ ప్రదేశాల్లో ఉన్నవారు వీలైనంత త్వరగా సురక్షిత ప్రాంతాలకు చేరుకోవాలని సూచించింది.

ఇక రాయలసీమ జిల్లాలకు కూడా వాతావరణ శాఖ హెచ్చరికలు జారీ చేసింది. ఈరోజు రాత్రి పిడుగులతో కూడిన మోస్తరు వర్షాలు కురిసే అవకాశం ఉంది. నంద్యాల, శ్రీ సత్యసాయి, వైఎస్సార్ కడప, అన్నమయ్య, తిరుపతి జిల్లాల్లో మోస్తరు వర్షాలు పడే అవకాశం ఉన్నట్లు అధికారులు తెలిపారు.

కర్నూలు, అనంతపురం జిల్లాల్లో అక్కడక్కడ చెదురుమదురు తేలికపాటి వర్షాలు కురిసే అవకాశం ఉందని అంచనా వేశారు. రాయలసీమలోనూ ఉరుములు, పిడుగుల సమయంలో ప్రజలు అప్రమత్తంగా ఉండాలని విపత్తుల నిర్వహణ సంస్థ సూచించింది.

వాతావరణ పరిస్థితుల నేపథ్యంలో రైతులు, వాహనదారులు, ప్రజలు అవసరమైన జాగ్రత్తలు తీసుకోవాలని అధికారులు సూచించారు. పిడుగులు పడే సమయంలో పొలాలు, చెరువులు, బహిరంగ ప్రదేశాల్లో ఉండకుండా సురక్షిత భవనాల్లోకి వెళ్లాలని తెలిపారు. తాజా జిల్లా వారీ హెచ్చరికలను పరిశీలించాలని సూచించారు.