Anganwadi Jobs: మ‌హిళ‌ల‌కు గుడ్ న్యూస్‌.. అంగ‌న్వాడీ పోస్టుల భ‌ర్తీ

Anganwadi Jobs: ఆంధ్ర‌ప్ర‌దేశ్ ప్ర‌భుత్వం మహిళలకు పెద్ద శుభవార్త ప్రకటించింది. రాష్ట్రవ్యాప్తంగా అంగన్వాడీ కేంద్రాల్లో ఖాళీగా ఉన్న పోస్టులను త్వరలో భర్తీ చేయాలని నిర్ణయం తీసుకుంది. దీనికి సంబంధించిన అధికారిక నోటిఫికేషన్ త్వరలో విడుదల చేసేందుకు సిద్ధ‌మ‌వుతున్నారు.

5 వేల పోస్టుల భర్తీ – రెండు దశల్లో నియామకాలు

రాష్ట్రంలో మొత్తం 5 వేల అంగన్వాడీ హెల్పర్ పోస్టులను భర్తీ చేయనున్నారు. ఈ నియామక ప్రక్రియను రెండు విడతలుగా నిర్వహించనున్నారు. మొదటి దశలో 2,645 పోస్టులను భర్తీ చేయగా, మిగిలిన పోస్టులను రెండో దశలో పూర్తి చేయాలని ప్రభుత్వం ప్రణాళిక సిద్ధం చేసింది. ఈ నియామకాలు పూర్తిగా పారదర్శకంగా జరుగుతాయని అధికారులు స్పష్టం చేశారు.

అంగన్వాడీ వ్యవస్థ బలోపేతానికి చర్యలు

రాష్ట్రంలో అంగన్వాడీ సేవలను మరింత మెరుగుపరచడానికి ప్రభుత్వం పలు కీలక నిర్ణయాలు తీసుకుంటోంది. మినీ అంగన్వాడీ కేంద్రాలను ప్రధాన కేంద్రాలుగా అభివృద్ధి చేస్తూ, సేవలను విస్తరించనున్నారు. అలాగే ప్రస్తుతం పనిచేస్తున్న ఆయాలకు ప్రమోషన్ ఇచ్చి, అంగన్వాడీ కార్యకర్తలుగా బాధ్యతలు అప్పగించేందుకు కూడా చర్యలు తీసుకుంటున్నారు. వారికి టీచర్ హోదా కల్పించి, తగిన జీతభత్యాలు అందించే విధంగా ప్రణాళిక రూపొందించారు.

సిబ్బందికి స్మార్ట్‌ఫోన్లు

అంగన్వాడీ సేవలను డిజిటల్ దిశగా తీసుకెళ్లేందుకు ప్రభుత్వం టెక్నాలజీ వినియోగాన్ని పెంచుతోంది. రాష్ట్రంలో ఉన్న 257 ఐసీడీఎస్ ప్రాజెక్టుల పరిధిలో పనిచేస్తున్న సిబ్బందికి స్మార్ట్‌ఫోన్లు అందించారు. ఇప్పటికే 58,204 మంది కార్యకర్తలకు 5జీ ఫోన్లు పంపిణీ చేయగా, సూపర్‌వైజర్లతో పాటు బ్లాక్ కోఆర్డినేటర్లకు కూడా ఈ సదుపాయం కల్పించారు. దీని వల్ల సేవల నాణ్యత పెరగడంతో పాటు పర్యవేక్షణ మరింత సమర్థవంతంగా జరుగుతుందని ప్రభుత్వం భావిస్తోంది.