భక్తి కేంద్రాల నుంచి సంస్కృతి విశ్వవిద్యాలయాల దిశగా ఆలయాలు..ఏపీ బీజేపీ చీఫ్ PVN మాధవ్

అమరావతి: ఆలయాలు కేవలం పూజలు, ఉత్సవాలకు మాత్రమే పరిమితం కాకుండా భారతీయ సంస్కృతి, సనాతన ధర్మం, సంప్రదాయ కళల పరిరక్షణకు జీవంతమైన శిక్షణ కేంద్రాలుగా మారాలని బీజేపీ ఆంధ్రప్రదేశ్ రాష్ట్ర అధ్యక్షుడు పీవీఎన్ మాధవ్ రాష్ట్ర ప్రభుత్వాన్ని కోరారు. ఆలయాల ఆధ్వర్యంలో ఉచిత సాంస్కృతిక శిక్షణ కేంద్రాలు ఏర్పాటు చేయడం, కళాకారుల ఎంపికలో పారదర్శక విధానాన్ని అమలు చేయడం ద్వారా సంప్రదాయ కళలకు కొత్త ఊపు తీసుకురావచ్చని ఆయన అభిప్రాయపడ్డారు.

బీజేపీ రాష్ట్ర కార్యాలయంలో నిర్వహించిన "జనతా వారధి" కార్యక్రమంలో రాష్ట్రవ్యాప్తంగా ఉన్న భజన మండళ్లు, హరికథకులు, కోలాట బృందాలు, జానపద కళాకారులు, కూచిపూడి, భరతనాట్యం, బుర్రకథ, యక్షగానం, తోలుబొమ్మలాట, వీధి భాగవతం, ధింసా, చెక్కభజన, డప్పు, ఒగ్గుకథ, గరగ నృత్యం, నాగస్వరం, వేదపారాయణం, అన్నమాచార్య, త్యాగరాజ, రామదాసు కీర్తనల గాయకులు తదితరులు తమ సమస్యలను ఆయన దృష్టికి తీసుకువచ్చారు. వారి వినతుల ఆధారంగా ప్రభుత్వం వెంటనే విధానపరమైన నిర్ణయాలు తీసుకోవాలని ఆయన కోరారు.

*ఆలయాల పాత్ర మరింత విస్తరించాలి*

భారతీయ సమాజంలో ఆలయాలకు ఉన్న ప్రాధాన్యం కేవలం ఆధ్యాత్మికతకే పరిమితం కాదని, చరిత్రలో అనేక ఆలయాలు సంగీతం, నృత్యం, సాహిత్యం, శిల్పకళలకు కేంద్రాలుగా పనిచేశాయని పీవీఎన్ మాధవ్ గుర్తు చేశారు. గతంలో ఆలయాల చుట్టూనే అనేక కళారూపాలు అభివృద్ధి చెందాయని, ప్రస్తుతం అదే వ్యవస్థను ఆధునిక అవసరాలకు అనుగుణంగా పునరుద్ధరించాల్సిన అవసరం ఉందన్నారు.

*ఉచిత శిక్షణ కేంద్రాలే పరిష్కారం*

సంప్రదాయ కళలను నేర్చుకోవాలనుకునే విద్యార్థులు, ముఖ్యంగా పేద మరియు మధ్యతరగతి కుటుంబాలకు చెందిన పిల్లలు ప్రస్తుతం అనేక ఇబ్బందులు ఎదుర్కొంటున్నారని ఆయన పేర్కొన్నారు. శిక్షణ కోసం ప్రైవేట్ హాళ్లను అద్దెకు తీసుకోవాల్సి రావడంతో ఖర్చు భారం పెరుగుతోందని, ఫలితంగా చాలామంది పిల్లలు కళలకు దూరమవుతున్నారని ఆవేదన వ్యక్తం చేశారు.దేవాదాయ శాఖ పరిధిలోని ఆలయాల్లో ప్రతిరోజూ కనీసం గంటసేపు ఉచిత శిక్షణ కార్యక్రమాలు నిర్వహిస్తే వేలాది మంది విద్యార్థులకు ఉపయోగపడుతుందని తెలిపారు.

స్థానిక కళాకారులను పార్ట్‌టైమ్ శిక్షకులుగా నియమించి వారికి గౌరవప్రదమైన పారితోషికం చెల్లించాలని, శిక్షణ పూర్తిచేసిన వారికి ధ్రువపత్రాలు ఇవ్వడంతో పాటు ఆలయ ఉత్సవాల్లో ప్రదర్శన అవకాశాలు కల్పించాలని సూచించారు.

*కళాకారులకు ఉపాధి – యువతకు సంస్కృతి*

ఈ విధానం అమలైతే రెండు ప్రధాన ప్రయోజనాలు ఉంటాయని పీవీఎన్ మాధవ్ అభిప్రాయపడ్డారు. ఒకవైపు సంప్రదాయ కళలు అంతరించిపోకుండా భావితరాలకు చేరుతాయని, మరోవైపు స్థానిక కళాకారులకు స్థిరమైన ఉపాధి అవకాశాలు లభిస్తాయని చెప్పారు. యువతలో భారతీయ సంస్కృతి, సనాతన ధర్మం పట్ల అవగాహన పెరగడంతో పాటు సమాజంలో సాంస్కృతిక చైతన్యం మరింత బలపడుతుందని పేర్కొన్నారు.

*కళాకారుల ఎంపికలో పారదర్శకత అవసరం*

తిరుమల తిరుపతి దేవస్థానం (టీటీడీ)తో పాటు రాష్ట్రంలోని ప్రధాన ఆలయాల్లో జరిగే ఉత్సవాలకు కళాకారుల ఎంపికలో స్పష్టమైన విధానం ఉండాలని ఆయన డిమాండ్ చేశారు. ప్రస్తుతం ఎంపిక ప్రక్రియలో పారదర్శకత లేదనే అభిప్రాయాలు వ్యక్తమవుతున్న నేపథ్యంలో ప్రభుత్వం దీనిపై ప్రత్యేక దృష్టి పెట్టాలని కోరారు.

*డిజిటల్ డేటాబేస్ ఏర్పాటు చేయాలి*

రాష్ట్రవ్యాప్తంగా సంప్రదాయ కళాకారుల సమగ్ర నమోదు చేపట్టి జిల్లా స్థాయిలో వారి అర్హతలను పరిశీలించి డిజిటల్ డేటాబేస్ రూపొందించాలని సూచించారు. ఆ జాబితా నుంచే టీటీడీ, ప్రధాన ఆలయాలు, దేవాదాయ శాఖ ఆధ్వర్యంలోని ఆలయాలు కళాకారులను ఎంపిక చేసే విధానాన్ని అమలు చేయాలని పేర్కొన్నారు. దీనివల్ల ప్రతి కళాకారుడికి సమాన అవకాశాలు లభిస్తాయని అభిప్రాయపడ్డారు.

*ప్రతి జిల్లాకు సముచిత ప్రాతినిధ్యం*

కళాకారుల ఎంపికలో ప్రాంతీయ సమతుల్యత కూడా ఉండాలని పీవీఎన్ మాధవ్ సూచించారు. ఒకే ప్రాంతానికి పరిమితం కాకుండా రాష్ట్రంలోని అన్ని జిల్లాలకు తగిన ప్రాతినిధ్యం కల్పించాలని, ఎంపిక ప్రమాణాలు, ఎంపికైన కళాకారుల పేర్లు, పారితోషిక వివరాలు, ప్రదర్శనల వివరాలను ప్రజలకు అందుబాటులో ఉంచాలని విజ్ఞప్తి చేశారు. కళాకారుల ఫిర్యాదుల పరిష్కారానికి ప్రత్యేక వ్యవస్థ ఏర్పాటు చేయాలని కూడా కోరారు.

*అంతరించిపోతున్న కళలకు జీవం పోయాలి*

తోలుబొమ్మలాట, బుర్రకథ, యక్షగానం, వీధి భాగవతం, ఒగ్గుకథ, ధింసా, గరగ నృత్యం వంటి అనేక సంప్రదాయ కళారూపాలు ప్రస్తుతం ప్రేక్షకాదరణ తగ్గడంతో మనుగడ కోసం పోరాడుతున్నాయి. ఈ కళలను ప్రభుత్వ పరిరక్షణతో పాటు ఆలయాల ప్రోత్సాహం కూడా అవసరమని కళాకారులు అభిప్రాయపడుతున్నారు. ఆలయాల ఆధ్వర్యంలో నిరంతర శిక్షణ, ప్రదర్శనల అవకాశాలు కల్పిస్తే ఈ కళలకు పునర్వైభవం తీసుకురావచ్చని భావిస్తున్నారు.

*జనతా వారధిలో వినిపించిన సమస్యలు*

జనతా వారధి కార్యక్రమంలో పాల్గొన్న కళాకారులు తమకు శిక్షణ వేదికలు లేకపోవడం, ప్రదర్శన అవకాశాలు తగ్గిపోవడం, పారితోషికాల్లో అసమానతలు, ఎంపికలో పారదర్శకత లేకపోవడం వంటి సమస్యలను పీవీఎన్ మాధవ్ దృష్టికి తీసుకువచ్చారు. ఈ సమస్యల పరిష్కారానికి ప్రభుత్వం ప్రత్యేక విధానం రూపొందించాలని ఆయన తరఫున వినతిపత్రం సమర్పించారు.

*సంస్కృతి పరిరక్షణకు విధానపరమైన చర్యలే మార్గం*

భారతీయ సంస్కృతి, సనాతన ధర్మం, సంప్రదాయ కళలు ఒకదానితో ఒకటి విడదీయరాని బంధంతో ఉన్నాయని, వాటిని పరిరక్షించడానికి ప్రభుత్వం దీర్ఘకాలిక విధానాన్ని రూపొందించాల్సిన అవసరం ఉందని పీవీఎన్ మాధవ్ అభిప్రాయపడ్డారు. ఆలయాలను భక్తి కేంద్రాలతో పాటు సాంస్కృతిక శిక్షణ కేంద్రాలుగా అభివృద్ధి చేస్తే కళాకారులకు భరోసా లభించడమే కాకుండా భావితరాలకు భారతీయ వారసత్వాన్ని అందించే బలమైన వేదికగా అవి మారతాయని పేర్కొన్నారు. ప్రభుత్వం ఈ రెండు ప్రతిపాదనలను సానుకూలంగా పరిశీలించి త్వరితగతిన అమలు చేయాలని ఆయన కోరారు.