Amaravati: అమరావతికి మహర్దశ: వేల కోట్ల నిధుల వర్షం!

Amaravati: రాష్ట్ర అభివృద్ధి, పరిపాలన సామర్థ్యాన్ని పెంచే దిశగా ఆంధ్రప్రదేశ్ కేబినెట్ పలు కీలక నిర్ణయాలు తీసుకున్నట్లు మంత్రి పయ్యావుల కేశవ్ వెల్లడించారు. హోమ్ శాఖలో 23 ఏళ్లుగా సేవలందిస్తున్న SPF-385 కానిస్టేబుల్‌కు హెడ్ కానిస్టేబుల్‌గా పదోన్నతి ఇవ్వడం ద్వారా సిబ్బంది ప్రోత్సాహానికి ప్రభుత్వం ప్రాధాన్యం ఇస్తోందని తెలిపారు.

*ఉద్యోగాల సృష్టికి ప్రాధాన్యం*..

న్యాయ, గ్రామీణ అభివృద్ధి శాఖల్లో కొత్త పోస్టులు

న్యాయ వ్యవస్థలో 23 కొత్త పోస్టులు, PR&RD శాఖలో 20 పోస్టులను సృష్టించేందుకు కేబినెట్ ఆమోదం తెలిపింది. ఇది పరిపాలనా వ్యవస్థను బలోపేతం చేయడంలో కీలకంగా మారనుంది.

*పోర్టులు, ఆర్థిక వ్యవస్థకు ఊతం*

రామాయపట్నం పోర్ట్‌కు అదనంగా నిధులు

రామాయపట్నం పోర్ట్ అభివృద్ధికి అదనంగా రూ.354 కోట్లు మంజూరు చేయగా, మార్కిఫైడ్ ద్వారా రూ.1800 కోట్ల రుణం తీసుకునేందుకు అనుమతి ఇచ్చారు. రాష్ట్ర మౌలిక వసతుల అభివృద్ధికి ఇది ఉపయోగపడనుంది.

*న్యూ ఢిల్లీలో నూతన ఏపీ భవన్*

రూ.124.50 కోట్లతో ఆధునిక నిర్మాణానికి ఆమోదం..దేశ రాజధానిలో 11.536 ఎకరాల్లో నూతన ఏపీ భవన్ నిర్మాణానికి కేబినెట్ గ్రీన్ సిగ్నల్ ఇచ్చింది. నిర్మాణ బాధ్యతలను National Buildings Construction Corporation Limited కు అప్పగించనున్నారు. రాష్ట్ర సంస్కృతి, అవసరాలకు అనుగుణంగా డిజైన్ ఉండేలా సీఎం సూచించారు.

*పర్యావరణ, మున్సిపల్ సంస్కరణలు*..

చెత్త నుంచి విద్యుత్ ప్రాజెక్టులకు పన్ను మినహాయింపు..మున్సిపాలిటీల్లో చెత్తను ఎనర్జీ ప్రాజెక్టులకు వినియోగించే సంస్థలకు రూ.25 కోట్ల పన్ను మినహాయింపు ఇవ్వడం, భవనాల పన్నుల విషయంలో మార్పులకు ఆమోదం తెలిపారు.

*కృష్ణా కరకట్ట, మౌలిక వసతుల అభివృద్ధి*

443 కోట్లతో 11 కిలోమీటర్ల పనులకు గ్రీన్ సిగ్నల్

కృష్ణా నది కరకట్ట వైడెనింగ్ పనులను రూ.443 కోట్లతో పూర్తి చేయడం, 11 కిలోమీటర్ల మేర పనులకు అనుమతి ఇవ్వడం జరిగింది.

*అమరావతిలో భారీ నిర్మాణ ప్రాజెక్టులు*

ట్విన్ టవర్లు, సచివాలయం పనులకు వేల కోట్ల మంజూరు..అమరావతి క్వాంటం వ్యాలీలో ట్విన్ టవర్ల నిర్మాణానికి రూ.1208.41 కోట్లు, సచివాలయం, జీఏడీ, హెచ్ఓడీ టవర్లలో ఫాసేడ్, గ్లేజింగ్ పనులకు రూ.2540 కోట్లు మంజూరు చేశారు. శాసనసభ భవన సివిల్ పనులకు రూ.798 కోట్లు ఆమోదించారు..

*ఎల్పీఎస్ గ్రామాల అభివృద్ధి*

రైతులకు పెరుగుతున్న యాన్యుటీ, పెన్షన్ లాభాలు..ఎల్పీఎస్ జోన్-11లో రోడ్లు, డ్రైన్లు, నీటి సదుపాయాలకు ఆమోదం ఇవ్వడంతో పాటు, రైతుల యాన్యుటీ, పెన్షన్ నిబంధనల్లో మార్పులు చేశారు. మెట్ట భూములకు ఎకరాకు రూ.40 వేలు, జరీబుకు రూ.60 వేలు కౌలు పెంచారు. ప్రతి ఏడాది అదనపు పెంపు కూడా అమలు చేయనున్నారు.

*విద్య, సంస్థలకు భూముల కేటాయింపు*

సెబీ, విద్యాసంస్థలకు స్థలాల మంజూరు

అమరావతి ఫైనాన్షియల్ డిస్ట్రిక్ట్‌లో Securities and Exchange Board of India కు 1.78 ఎకరాలు, స్వామి నారాయణ్ గురుకుల్ స్కూల్‌కు 4.23 ఎకరాలు కేటాయించారు. అలాగే డీఏవీ పాఠశాల, అగ్నిమాపక శాఖ, ఆప్కాబ్ వంటి సంస్థలకు కూడా స్థలాలు కేటాయించారు.

*సమగ్ర అభివృద్ధి దిశగా అడుగులు*..

పరిపాలన నుంచి మౌలిక వసతుల వరకు విస్తృత నిర్ణయాలు.. ఈ కేబినెట్ నిర్ణయాలు రాష్ట్రంలో పరిపాలన బలోపేతం, మౌలిక వసతుల విస్తరణ, రైతుల సంక్షేమం, పెట్టుబడుల ఆకర్షణ వంటి విభిన్న రంగాల్లో సమగ్ర అభివృద్ధికి దోహదం చేస్తాయని మంత్రి పయ్యావుల కేశవ్ పేర్కొన్నారు.