Amaravati: రేపే ఏపీ క్యాబినెట్ భేటీ.. కొత్త పెన్షన్లపై కీలక నిర్ణయం?

Amaravati: ఆంధ్రప్రదేశ్ ప్రభుత్వానికి సంబంధించిన కీలక నిర్ణయాలు వెలువడే అవకాశం ఉన్న క్యాబినెట్ సమావేశం రేపు అమరావతిలో జరగనుంది. రాష్ట్ర సచివాలయంలో ముఖ్యమంత్రి చంద్రబాబు అధ్యక్షతన ఉదయం 10.30 గంటలకు మంత్రివర్గ సమావేశం ప్రారంభం కానుంది. పరిపాలన, సంక్షేమం, పెట్టుబడులు, తాజా రాజకీయ పరిణామాలు వంటి అనేక అంశాలపై ఈ సమావేశంలో విస్తృతంగా చర్చ జరిగే అవకాశం ఉంది.

ఈ సమావేశంలో ముఖ్యంగా కొత్త పెన్షన్ల మంజూరు అంశం ప్రాధాన్యత పొందనుంది. అర్హులైన లబ్ధిదారులకు కొత్తగా పెన్షన్లు మంజూరు చేసే విధానంపై మంత్రివర్గం చర్చించనుంది. పెన్షన్‌ల కోసం ఎదురుచూస్తున్న వేలాది మంది ప్రజలకు ఈ సమావేశం కీలకంగా మారింది. ప్రభుత్వం త్వరలోనే ఈ ప్రక్రియను వేగవంతం చేసే దిశగా నిర్ణయం తీసుకునే అవకాశాలు కనిపిస్తున్నాయి.

అదేవిధంగా పలు జాతీయ, అంతర్జాతీయ సంస్థలకు భూ కేటాయింపుల అంశం కూడా క్యాబినెట్ ఎజెండాలో ఉన్నట్లు సమాచారం. పెట్టుబడులను ఆకర్షించడం, పారిశ్రామికాభివృద్ధికి ఊతమివ్వడం లక్ష్యంగా పరిశ్రమలకు భూముల కేటాయింపుపై ప్రభుత్వం నిర్ణయం తీసుకోనుంది. ముఖ్యంగా రాజధాని ప్రాంతం, కీలక పారిశ్రామిక జోన్లలో ఈ భూ కేటాయింపులపై స్పష్టత వచ్చే అవకాశం ఉంది.

క్యాబినెట్ అధికారిక ఎజెండా ముగిసిన తర్వాత తాజా రాజకీయ, పరిపాలనా పరిణామాలపై ముఖ్యమంత్రి మంత్రులతో ప్రత్యేకంగా చర్చించనున్నట్లు తెలుస్తోంది. ఇటీవల పెట్రోల్, డీజిల్ సరఫరా సమస్యలపై రాష్ట్రవ్యాప్తంగా చర్చ సాగుతున్న నేపథ్యంలో దీనిపై కూడా సమీక్ష ఉండే అవకాశం ఉంది. ఈ అంశంపై ప్రతిపక్షాలు చేస్తున్న ప్రచారం, ప్రజల్లో ఏర్పడుతున్న అభిప్రాయాలపై ప్రభుత్వం ఎలా స్పందించాలన్న దానిపై సీఎం దిశానిర్దేశం చేసే అవకాశం ఉంది.

త్వరలో కూటమి ప్రభుత్వం రెండేళ్ల పాలన పూర్తి చేసుకోనున్న నేపథ్యంలో శాఖల వారీగా పనితీరు, ప్రజలకు చేరువ కావాల్సిన కార్యక్రమాలు, ప్రభుత్వ విజయాలను మరింత సమర్థంగా ప్రజల్లోకి తీసుకెళ్లే విధానంపై కూడా చర్చ జరిగే అవకాశం ఉంది. మంత్రులు ప్రజల మధ్య మరింత చురుకుగా ఉండాలని సీఎం సూచించే అవకాశముంది.

ఇటీవల కొంతమంది మంత్రుల సింగపూర్ పర్యటనపై కూడా సమావేశంలో ప్రస్తావన వచ్చే అవకాశం ఉందని సమాచారం. పెట్టుబడుల ఆకర్షణ, అభివృద్ధి నమూనాల అధ్యయనం, విదేశీ భాగస్వామ్యాల అంశాలపై ఈ పర్యటనల ఉద్దేశ్యం, ఫలితాలపై సీఎం సమీక్ష చేసే అవకాశముంది.

ఐతే ముందుగా 29 వ తేదీ క్యాబినెట్ సమావేశం నిర్వహించాల్సి ఉండగా టీడీపీ జాతీయ,రాష్ట్ర కమిటీ ప్రమాణ స్వీకారం నేపద్యం లో గురువారానికి వాయిదా పడింది.. క్యాబినెట్ సమావేశం పరిపాలనపరంగానే కాకుండా రాజకీయంగా కూడా అత్యంత కీలకంగా మారింది. ప్రజా సంక్షేమం నుంచి పెట్టుబడుల వరకు, ప్రతిపక్ష విమర్శల నుంచి ప్రభుత్వ భవిష్యత్ కార్యాచరణ వరకు పలు అంశాలపై స్పష్టమైన సంకేతాలు వెలువడే అవకాశముండటంతో ఈ సమావేశంపై రాష్ట్రవ్యాప్తంగా ఆసక్తి నెలకొంది.