Amaravati: ఏపీ సాగునీటి ప్రాజెక్టులకు టైమ్‌లైన్ ఫిక్స్ చేసిన సీఎం చంద్రబాబు

Amaravati: రాష్ట్రంలో సాగునీటి ప్రాజెక్టుల నిర్మాణానికి స్పష్టమైన కార్యాచరణ రూపొందించాలని ముఖ్యమంత్రి చంద్రబాబు అధికారులకు దిశానిర్దేశం చేశారు. ఇప్పటికే ప్రకటించిన 25 ప్రాజెక్టులతో పాటు మరో 11 కీలక ప్రాజెక్టులను కూడా ఇరిగేషన్ క్యాలెండర్‌లో చేర్చాలని ఆదేశించారు. భూసేకరణ, సివిల్ పనులు, ఆర్థిక కేటాయింపుల్లో ఎక్కడా ఆటంకాలు రాకుండా ముందుగానే చర్యలు తీసుకోవాలని సూచించారు. అంటే ఇకపై ప్రాజెక్టులు కేవలం ప్రకటనలకే పరిమితం కాకుండా, ఖచ్చితమైన తేదీలతో ముందుకు సాగాలనే సంకేతాలు కనిపిస్తున్నాయి.

*పోలవరం పురోగతిపై సీఎం ప్రత్యేక దృష్టి*

పోలవరం పనుల పురోగతిని ముఖ్యమంత్రి ప్రత్యేకంగా సమీక్షించారు. ప్రాజెక్టులో సివిల్ పనులు 88 శాతం పూర్తయ్యాయని అధికారులు వివరించారు. భూసేకరణ 93 శాతం, నిర్వాసితుల తరలింపు 45 శాతం పూర్తయిందని తెలిపారు. 2027 మార్చి నాటికి కీలక డ్యామ్ పనులు పూర్తి చేయాలని లక్ష్యంగా పెట్టుకున్నారు. ప్రతి నెల పోలవరం పనులపై స్వయంగా సమీక్ష చేస్తానని సీఎం ప్రకటించడం ప్రాజెక్టుపై ప్రభుత్వ దృష్టి ఎంత తీవ్రంగా ఉందో చూపిస్తోంది.

*చంపావతి లింక్ పై కొత్త ఆలోచన*

పురుషోత్తపట్నం ఎత్తిపోతల ద్వారా ఎడమ కాలువ నుంచి నీటిని మేఘాద్రిగడ్డకు తరలించి అక్కడి నుంచి వంశధార-నాగావళి-చంపావతి వరకూ అనుసంధానం చేసే అవకాశాలపై అధ్యయనం చేయాలని సీఎం సూచించారు. ఇది అమలైతే ఉత్తరాంధ్రలో నీటి వనరుల వినియోగంలో కీలక మార్పులు రావచ్చని అధికారులు భావిస్తున్నారు.

*2027 నాటికి పోలవరం నిర్వాసితుల తరలింపు పూర్తి*

పోలవరం ఆర్ అండ్ ఆర్ అంశంపై సీఎం స్పష్టమైన లక్ష్యాన్ని నిర్దేశించారు. 2027 ఏప్రిల్ నాటికి నిర్వాసితుల తరలింపును పూర్తిచేయాలని అధికారులను ఆదేశించారు. పరిహార చెల్లింపులు చట్టబద్ధంగా, వివాదాలకు తావులేకుండా పూర్తి చేయాలని సూచించారు. గతంలో ఆర్ అండ్ ఆర్ ప్రక్రియలో ఎదురైన సమస్యలు ఈసారి రాకుండా ముందుగానే చర్యలు తీసుకోవాలని పేర్కొన్నారు.

పోలవరం వద్ద ఐకానిక్ బ్రిడ్జి ప్లాన్

పోలవరం స్పిల్‌వే దిగువన ప్రత్యేక ఐకానిక్ బ్రిడ్జి నిర్మించాలని సీఎం సూచించారు. కేవలం రవాణా అవసరాలకే కాదు, భవిష్యత్తులో టూరిజం హబ్‌గా మార్చే ఆలోచన కనిపిస్తోంది. ఈ ప్రాజెక్టు అమలైతే పోలవరం ప్రాంతం పర్యాటక మ్యాప్‌లో ప్రత్యేక స్థానం పొందే అవకాశం ఉందని భావిస్తున్నారు.

*వెలిగొండకు హై ప్రయార్టీ*

వెలిగొండ ప్రాజెక్టు మొదటి దశను జూలై నాటికి పూర్తి చేయాలని సీఎం స్పష్టం చేశారు. ఇంకా రూ.2019 కోట్ల నిధులు అవసరమని అధికారులు అంచనా వేశారు. టీబీఎం అడ్డంకులను తొలగించి నిర్దేశిత గడువులో పనులు పూర్తి చేయాలని ఆదేశించారు. వెలిగొండ ప్రాజెక్టు పూర్తి అయితే ప్రకాశం, నెల్లూరు జిల్లాల్లో సాగునీటి పరిస్థితులు మెరుగుపడే అవకాశం ఉంది.

*రాయలసీమకు నీటి భరోసా*

హంద్రీ-నీవా, కుప్పం, పుంగనూరు బ్రాంచ్ కెనాల్ పనులను వేగవంతం చేయాలని సీఎం ఆదేశించారు. మడకశిర, మైదుకూరు వంటి చివరి ప్రాంతాలకు కూడా నీరు చేరేలా చర్యలు తీసుకోవాలని చెప్పారు. నీళ్లు కనిపిస్తే ప్రజల్లో విశ్వాసం పెరుగుతుందని వ్యాఖ్యానించారు.

*ఖరీఫ్ ముందే నీటి ప్రణాళిక*

ఈసారి వర్షపాతం సాధారణ స్థాయికంటే 3 శాతం తక్కువగా ఉందని సీఎం పేర్కొన్నారు. అయినా భూగర్భ జలాలు గత ఏడాదికంటే మెరుగ్గా ఉన్నాయని తెలిపారు. ఖరీఫ్ సీజన్ ఆలస్యం కాకుండా కాల్వలకు ముందుగానే నీటి విడుదలపై దృష్టి పెట్టాలని జలవనరుల శాఖకు సూచించారు.

జలధార-జలహరతి కార్యక్రమాలకు ప్రాధాన్యత

భూగర్భ జలాల పెంపుతో విద్యుత్ వినియోగాన్ని తగ్గించవచ్చని సీఎం అభిప్రాయపడ్డారు. వ్యవసాయానికి ప్రభుత్వం భారీగా విద్యుత్ సబ్సిడీ ఇస్తోందని, నీటి భద్రత పెరిగితే ఆ భారం కూడా తగ్గుతుందని తెలిపారు. అందుకే జలధార-జలహరతి కార్యక్రమాలను సమర్థంగా అమలు చేయాలని సూచించారు.

*లిఫ్ట్ స్కీంలపై గత ప్రభుత్వాలపై విమర్శలు*

2019-24 మధ్య లిఫ్ట్ స్కీంలకు తగిన నిధులు కేటాయించకపోవడంతో 362 లిఫ్ట్ స్కీంలు నిర్వీర్యమయ్యాయని అధికారులు సీఎంకు వివరించారు. ప్రస్తుతం వాటిని పునరుద్ధరించే చర్యలు చేపట్టినట్టు చెప్పారు. గతంలో 10 లక్షల ఎకరాలకు సాగునీరు అందించే వ్యవస్థలను మళ్లీ గాడిలో పెట్టాలని సీఎం సూచించారు.

ఈ సమీక్షలో కేవలం ప్రాజెక్టుల పురోగతి మాత్రమే కాకుండా, స్పష్టమైన టైమ్‌లైన్లు, కొత్త అనుసంధాన ప్రణాళికలు, నీటి నిర్వహణపై దీర్ఘకాలిక దృక్పథం కనిపించింది. ఇప్పుడు అసలు పరీక్ష ప్రకటించిన తేదీల్లో ఈ ప్రాజెక్టులు పూర్తి అవుతాయా లేదా అన్నదే.