Vijayawada: భగత్ సింగ్, గుర్రం జాషువా త్యాగాలు స్ఫూర్తిదాయకం!

విజయవాడ: పిస్వాతంత్ర్య సమరయోధుడు భగత్ సింగ్, మహాకవి గుర్రం జాషువా జయంతి సందర్భంగా విజయవాడలోని బీజేపీ రాష్ట్ర కార్యాలయంలో పార్టీ నాయకులు వారికి ఘన నివాళులు అర్పించారు. బీజేపీ రాష్ట్ర సంఘటనా ప్రధాన కార్యదర్శి మధుకర్ జీ ఇరువురి చిత్రపటాలకు పూలమాలలు వేసి నివాళులర్పించారు.

ఈ సందర్భంగా బీజేపీ రాష్ట్ర అధికార ప్రతినిధి షేక్ బాజీ మాట్లాడుతూ.. భగత్ సింగ్ చిన్న వయసులోనే దేశభక్తిని తన జీవిత లక్ష్యంగా మలుచుకున్నారని అన్నారు. దేశ స్వాతంత్ర్యం కోసం రాజ్‌గురు, సుఖ్‌దేవ్‌లతో కలిసి పోరాడి ప్రాణత్యాగం చేసిన భగత్ సింగ్ జీవితం ప్రతి ఒక్కరికీ స్ఫూర్తిదాయకమని పేర్కొన్నారు. దేశం కోసం ప్రాణాలను సైతం లెక్కచేయకుండా ముందుకు సాగిన ఆయన ధైర్యం, త్యాగం నేటి యువతకు ఆదర్శంగా నిలుస్తాయని అన్నారు.

దేశ స్వాతంత్ర్యం కోసం భగత్ సింగ్ చేసిన పోరాటం యువతలో దేశభక్తి, సామాజిక బాధ్యతను పెంపొందించేలా ఉంటుందని షేక్ బాజీ పేర్కొన్నారు. వ్యక్తిగత ప్రయోజనాల కంటే దేశ ప్రయోజనాలకు ప్రాధాన్యత ఇవ్వాలనే సందేశాన్ని ఆయన జీవితం అందిస్తుందని అన్నారు.

ఎస్సీ మోర్చా రాష్ట్ర ఉపాధ్యక్షుడు వల్లూరు గంగాధర్ మాట్లాడుతూ.. మహాకవి గుర్రం జాషువా కుల వివక్ష, సామాజిక అసమానతలు, అనేక అవమానాలను ఎదుర్కొంటూనే తెలుగు సాహిత్యంలో చెరగని ముద్ర వేశారని అన్నారు. అణగారిన వర్గాల సమస్యలను తన రచనల ద్వారా సమాజం ముందుకు తీసుకువచ్చారని పేర్కొన్నారు.

‘గబ్బిలం’ వంటి రచనల ద్వారా సామాజిక అన్యాయాలను ప్రశ్నించిన జాషువా.. సమానత్వం, మానవతా విలువలకు గొంతుకగా నిలిచారని గంగాధర్ అన్నారు. ప్రతికూల పరిస్థితుల్లోనూ తన రచనా ప్రస్థానాన్ని కొనసాగించి సామాజిక చైతన్యానికి కృషి చేసిన ఆయన సాహిత్య స్ఫూర్తి నేటికీ కొనసాగుతోందని చెప్పారు.

భగత్ సింగ్ దేశభక్తి, జాషువా సామాజిక చైతన్యం, సాహిత్య స్ఫూర్తిని నేటి యువత ఆదర్శంగా తీసుకోవాలని షేక్ బాజీ, వల్లూరు గంగాధర్ పిలుపునిచ్చారు. దేశం పట్ల బాధ్యత, సమాజం పట్ల సమానత్వ భావనతో ముందుకు సాగాలని సూచించారు.

కార్యక్రమాన్ని బీజేపీ కార్యాలయ ఇన్‌చార్జి ఉప్పలపాటి శ్రీనివాస్ రాజు పర్యవేక్షించారు. భగత్ సింగ్, గుర్రం జాషువా జీవిత విశేషాలను నాయకులకు వివరించారు. ఎన్టీఆర్ జిల్లా బీజేపీ అధ్యక్షుడు అడ్డూరి శ్రీరామ్ వందన సమర్పణ చేశారు.

కార్యక్రమంలో బీజేపీ రాష్ట్ర కార్యదర్శి భోగిరెడ్డి ఆదిలక్ష్మి, రాష్ట్ర అధికార ప్రతినిధి రవిచంద్రారెడ్డి, పార్టీ ప్రొటోకాల్ ఇన్‌చార్జి పాతూరి నాగభూషణం, మైనారిటీ మోర్చా రాష్ట్ర అధ్యక్షుడు సయ్యద్ బాషా, జిల్లా ఎస్సీ మోర్చా అధ్యక్షుడు సర్వసుద్ది రాజు, కొలనపల్లి గణేష్, పైలా సురేష్, చైతన్య శర్మ, పిట్టల గోవింద్, పట్నాయక్, రత్నకుమారి తదితరులు పాల్గొన్నారు. ఈ సందర్భంగా భగత్ సింగ్, రాజ్‌గురు, సుఖ్‌దేవ్‌లకు నాయకులు జోహార్లు అర్పించగా.. మహాకవి గుర్రం జాషువాకు ఘన నివాళులు సమర్పించారు.