Amaravati: అమరావతిలో మరో మెగా విద్యా – వైద్య ప్రాజెక్టుకు శ్రీకారం

Amaravati: అమరావతి రాజధాని ప్రాంతంలో మరో కీలక అభివృద్ధి కార్యక్రమానికి నేడు శ్రీకారం చుట్టబోతోంది. రాజధాని పరిధిలోని నిడమర్రు ప్రాంతంలో ప్రతిష్టాత్మకంగా నిర్మించనున్న స్కిల్ యూనివర్సిటీ మెడికల్ కళాశాల, కిమ్స్ ఆసుపత్రి భవనాల నిర్మాణానికి ముఖ్యమంత్రి చంద్రబాబు నాయుడు శంకుస్థాపన చేయనున్నారు. రాష్ట్రంలో వైద్య విద్య, నైపుణ్యాభివృద్ధి, కార్పొరేట్ వైద్య సేవలను ఒకే వేదికపై తీసుకురావడమే లక్ష్యంగా ఈ ప్రాజెక్టును ప్రభుత్వం భావిస్తోంది..

*25 ఎకరాల్లో ఆధునిక వైద్య విద్యా కేంద్రం,

మెడికల్ కాలేజ్, సూపర్ స్పెషాలిటీ ఆసుపత్రితో భారీ ప్రణాళిక*..

సుమారు 25 ఎకరాల విస్తీర్ణంలో ఈ ప్రాజెక్టును అభివృద్ధి చేయనున్నారు. ఇందులో ఆధునిక సదుపాయాలతో మెడికల్ కళాశాల, సూపర్ స్పెషాలిటీ ఆసుపత్రి, పరిశోధనా విభాగాలు, నైపుణ్యాభివృద్ధి కేంద్రాలు ఏర్పాటు చేయనున్నారు. విద్యార్థులకు అంతర్జాతీయ ప్రమాణాలతో వైద్య విద్య అందించడమే కాకుండా, ప్రజలకు అత్యాధునిక వైద్య సేవలు అందేలా రూపకల్పన చేస్తున్నట్లు అధికారులు చెబుతున్నారు..

అమరావతి రాజధాని ప్రాంతాన్ని కేవలం పరిపాలనా కేంద్రంగానే కాకుండా విద్య, వైద్యం, ఉపాధి అవకాశాల హబ్‌గా తీర్చిదిద్దాలన్న ప్రభుత్వ లక్ష్యంలో భాగంగానే ఈ ప్రాజెక్టుకు ప్రాధాన్యం పెరిగింది. ముఖ్యంగా యువతకు మెరుగైన మెడికల్ ఎడ్యుకేషన్ అవకాశాలు కల్పించడంలో ఇది కీలక మైలురాయిగా భావిస్తున్నారు..

*సీఎం పర్యటనకు విస్తృత ఏర్పాట్లు*

మంత్రులు, ప్రజాప్రతినిధులు, వైద్య రంగ ప్రముఖుల హాజరు

ఈ కార్యక్రమంలో మంత్రి నారా లోకేష్, కేంద్ర మంత్రి పెమ్మసాని చంద్రశేఖర్ పాల్గొననున్నారు. స్థానిక ప్రజాప్రతినిధులు, వైద్య రంగానికి చెందిన ప్రముఖులు, విద్యాసంస్థల ప్రతినిధులు కూడా హాజరుకానున్నారు. సీఎం పర్యటన నేపథ్యంలో నిడమర్రు ప్రాంతంలో విస్తృత భద్రతా ఏర్పాట్లు చేపట్టారు.భూమి పూజ అనంతరం ఏర్పాటు చేసే ప్రత్యేక సమావేశంలో సీఎం చంద్రబాబు ప్రసంగించనున్నారు. రాష్ట్రంలో ఆరోగ్య రంగానికి ప్రభుత్వం ఇస్తున్న ప్రాధాన్యం, భవిష్యత్‌లో అమరావతి అభివృద్ధి దిశగా చేపట్టబోయే ప్రాజెక్టులపై ఆయన కీలక వ్యాఖ్యలు చేసే అవకాశం ఉందని అధికార వర్గాలు చెబుతున్నాయి..

*అమరావతికి మరో బలం*

విద్య, వైద్యం, పెట్టుబడుల కేంద్రంగా రాజధాని రూపుదిద్దుకునే దిశగా అడుగులు

గత కొంతకాలంగా అమరావతిలో మౌలిక వసతుల అభివృద్ధి, విద్యాసంస్థలు, ఆరోగ్య రంగ పెట్టుబడులపై ప్రభుత్వం ప్రత్యేక దృష్టి సారిస్తోంది. ఇప్పటికే పలు జాతీయ, అంతర్జాతీయ సంస్థలు రాజధాని ప్రాంతంపై ఆసక్తి చూపుతున్న వేళ, కిమ్స్ వంటి వైద్య సంస్థ ప్రవేశం అమరావతికి మరింత బలాన్నిస్తుందని విశ్లేషకులు భావిస్తున్నారు.

ఈ ప్రాజెక్టు పూర్తయితే గుంటూరు, విజయవాడతో పాటు పరిసర జిల్లాల ప్రజలకు మెరుగైన వైద్య సేవలు అందుబాటులోకి రావడంతో పాటు, వైద్య విద్య కోసం ఇతర రాష్ట్రాలకు వెళ్లాల్సిన అవసరం కూడా కొంత మేర తగ్గే అవకాశం ఉంది. ఉపాధి అవకాశాలు పెరగడం, అనుబంధ రంగాలు అభివృద్ధి చెందడం ద్వారా స్థానిక ఆర్థిక వ్యవస్థకు కూడా ఊతమిచ్చే అవకాశముందని అధికారులు అంచనా వేస్తున్నారు..

*అమరావతిని నాలెడ్జ్ సిటీగా తీర్చిదిద్దే దిశగా అడుగు,విద్య, ఆరోగ్యం, ఐటీ రంగాల సమ్మిళిత అభివృద్ధిపై దృష్టి*

అమరావతిని పరిపాలనా రాజధానిగానే కాకుండా నాలెడ్జ్, ఇన్నోవేషన్, హెల్త్‌కేర్ కేంద్రంగా అభివృద్ధి చేయాలని ప్రభుత్వం లక్ష్యంగా పెట్టుకుంది. ఇప్పటికే విద్యాసంస్థలు, ఐటీ సంస్థలు, పరిశ్రమల పెట్టుబడులకు అనుకూల వాతావరణం కల్పించే ప్రయత్నాలు జరుగుతున్నాయి. ఇప్పుడు కిమ్స్ వంటి ప్రముఖ వైద్య సంస్థ ప్రవేశంతో రాజధాని ప్రాంతానికి మరింత గుర్తింపు వచ్చే అవకాశముందని అధికారులు చెబుతున్నారు..

ఈ ప్రాజెక్టు ద్వారా భవిష్యత్‌లో మెడికల్ టూరిజం అవకాశాలు కూడా పెరిగే అవకాశం ఉందని వైద్య రంగ నిపుణులు అభిప్రాయపడుతున్నారు. హైదరాబాద్, చెన్నై, బెంగళూరు వంటి నగరాలకు వెళ్తున్న రోగుల్లో కొంతమంది అమరావతిలోనే చికిత్స పొందే పరిస్థితి ఏర్పడవచ్చని అంచనా వేస్తున్నారు.

*స్థానికంగా ఉపాధి అవకాశాలు,

నిర్మాణ దశ నుంచే వేల మందికి ఉద్యోగాలు*

ఈ ప్రాజెక్టు నిర్మాణ దశలోనే పెద్ద ఎత్తున ఉపాధి అవకాశాలు కలుగనున్నాయని అంచనా వేస్తున్నారు. నిర్మాణ రంగ కార్మికులు, ఇంజనీర్లు, సాంకేతిక నిపుణులతో పాటు ఆసుపత్రి ప్రారంభమైన తర్వాత వైద్యులు, నర్సులు, టెక్నీషియన్లు, అడ్మినిస్ట్రేటివ్ సిబ్బందికి ఉద్యోగ అవకాశాలు పెరగనున్నాయి. దీంతో అమరావతి పరిసర ప్రాంతాల ఆర్థిక కార్యకలాపాలు కూడా వేగం పుంజుకునే అవకాశముందని అధికారులు భావిస్తున్నారు.నిడమర్రులో ప్రారంభమవుతున్న ఈ మెడికల్ – స్కిల్ యూనివర్సిటీ ప్రాజెక్టు అమరావతి అభివృద్ధి ప్రయాణంలో మరో కీలక మైలురాయిగా నిలవనుంది.