Amaravati: భోగాపురం ఎయిర్‌పోర్ట్‌తో ఉత్తరాంధ్రకు కొత్త కాంతులు!

Amaravati: భోగాపురం అంతర్జాతీయ విమానాశ్రయం వాణిజ్య కార్యకలాపాలను విజయవంతంగా ప్రారంభించడంతో ఉత్తరాంధ్ర అభివృద్ధికి కొత్త దిశ ఏర్పడిందని రాష్ట్ర రహదారులు, భవనాలు, నీటిపారుదల శాఖ మంత్రి బీసీ జనార్థన్ రెడ్డి అన్నారు. భోగాపురం ఎయిర్‌పోర్టు కేవలం విమాన ప్రయాణాలకు పరిమితమయ్యే మౌలిక వసతి కాదని, ఉత్తరాంధ్ర ఆర్థిక, పారిశ్రామిక, పర్యాటక రంగాల రూపురేఖలను మార్చే కీలక ప్రాజెక్టుగా మారబోతోందని ఆయన ఆశాభావం వ్యక్తం చేశారు.

భోగాపురం అంతర్జాతీయ విమానాశ్రయం ప్రారంభోత్సవం, వాణిజ్య కార్యకలాపాలు విజయవంతంగా ప్రారంభమైన నేపథ్యంలో జీఎంఆర్ గ్రూప్ ఎగ్జిక్యూటివ్ డైరెక్టర్ సి. ప్రసన్న సోమవారం సచివాలయంలో మంత్రి బీసీ జనార్థన్ రెడ్డిని మర్యాదపూర్వకంగా కలిశారు. ఈ సందర్భంగా మంత్రికి మెమెంటో అందజేసి అభినందనలు తెలిపారు. విమానాశ్రయం ప్రారంభోత్సవం, కమర్షియల్ ఆపరేషన్స్ విజయవంతంగా ప్రారంభం కావడంపై సంస్థ తరఫున సంతోషం వ్యక్తం చేశారు.

భోగాపురం ఎయిర్‌పోర్టు నిర్మాణం నుంచి ప్రారంభోత్సవం వరకు ప్రభుత్వ సహకారం కీలకంగా నిలిచిందని జీఎంఆర్ ప్రతినిధి పేర్కొన్నారు. ప్రాజెక్టుకు అవసరమైన అన్ని విధాలుగా అండగా నిలిచిన ప్రభుత్వానికి, మంత్రి బీసీ జనార్థన్ రెడ్డికి కృతజ్ఞతలు తెలిపారు. ప్రభుత్వ విభాగాలు, అధికారులు, జీఎంఆర్ సంస్థ సమన్వయంతో పనిచేయడం వల్లే ఇంతటి భారీ కార్యక్రమాన్ని విజయవంతంగా పూర్తి చేయగలిగామని తెలిపారు.

దీనిపై మంత్రి మాట్లాడుతూ.. భోగాపురం ఎయిర్‌పోర్టు విజయవంతమైన ప్రయాణం వెనుక అనేక శాఖలు, అధికారులు, సంస్థలు సమన్వయంతో పనిచేశారని చెప్పారు. సమష్టి కృషి, పరస్పర సహకారంతోనే అంతర్జాతీయ స్థాయి మౌలిక వసతుల ప్రాజెక్టును విజయవంతంగా ప్రజలకు అందుబాటులోకి తీసుకురాగలిగామని పేర్కొన్నారు.

భోగాపురం విమానాశ్రయంలో కమర్షియల్ ఆపరేషన్స్ ప్రారంభం కావడం పట్ల మంత్రి హర్షం వ్యక్తం చేశారు. విమానాశ్రయం అందుబాటులోకి రావడంతో ఉత్తరాంధ్ర ప్రజలకు దేశ, విదేశీ ప్రయాణాలు మరింత సులభతరం కానున్నాయని తెలిపారు. విశాఖపట్నం, విజయనగరం, శ్రీకాకుళం జిల్లాలతో పాటు ఉత్తరాంధ్రలోని విస్తృత ప్రాంతానికి ఈ విమానాశ్రయం అభివృద్ధి కేంద్రంగా మారుతుందని అన్నారు.

భోగాపురం ఎయిర్‌పోర్టు రాకతో పెట్టుబడులు, పరిశ్రమలు, ఐటీ, పర్యాటకం, వాణిజ్య రంగాలకు కొత్త అవకాశాలు ఏర్పడతాయని మంత్రి పేర్కొన్నారు. అంతర్జాతీయ కనెక్టివిటీ పెరగడంతో ఉత్తరాంధ్ర నుంచి ప్రపంచంలోని వివిధ ప్రాంతాలకు రాకపోకలు సులభతరం అవుతాయని చెప్పారు. విమానాశ్రయం చుట్టూ ఉపాధి అవకాశాలు, వ్యాపార కార్యకలాపాలు కూడా గణనీయంగా పెరిగే అవకాశం ఉందన్నారు.

ఉత్తరాంధ్ర అభివృద్ధిలో భోగాపురం అంతర్జాతీయ విమానాశ్రయం ఒక సువర్ణ అధ్యాయంగా నిలవబోతోందని బీసీ జనార్థన్ రెడ్డి అన్నారు. రాబోయే రోజుల్లో ఈ విమానాశ్రయం ప్రపంచ స్థాయి ప్రయాణ సౌకర్యాలను అందించడంతో పాటు ప్రయాణికులకు సరికొత్త అనుభూతిని కల్పించాలని ఆకాంక్షించారు. ప్రయాణికుల అవసరాలకు అనుగుణంగా ఆధునిక సదుపాయాలు, మెరుగైన సేవలు అందుబాటులోకి రావాలని మంత్రి సూచించారు.

భోగాపురం ఎయిర్‌పోర్టు కార్యకలాపాలు పూర్తిస్థాయిలో విస్తరించడంతో ఉత్తరాంధ్ర అభివృద్ధి వేగం మరింత పెరుగుతుందని ప్రభుత్వం భావిస్తోంది. విమానాశ్రయం చుట్టూ మౌలిక వసతుల అభివృద్ధి, పెట్టుబడుల ఆకర్షణ, పర్యాటక ప్రోత్సాహం వంటి అంశాలు ఈ ప్రాంత ఆర్థిక ప్రగతికి దోహదపడనున్నాయి. మొత్తంగా భోగాపురం ఎయిర్‌పోర్టు ఉత్తరాంధ్రకు కొత్త ఆకాశాన్ని తెరవడమే కాకుండా.. ఈ ప్రాంత అభివృద్ధికి కొత్త గమ్యాన్ని నిర్దేశించే కీలక కేంద్రంగా నిలిచే అవకాశముంది.