Amaravati: సంక్షేమం నుంచి సాధికారత వైపు నవ్యాంధ్ర అడుగులు

Amaravati: ఆంధ్రప్రదేశ్‌లో కూటమి ప్రభుత్వం అధికారంలోకి వచ్చిన తర్వాత మహిళా, శిశు మరియు గిరిజన సంక్షేమ రంగాలకు అత్యంత ప్రాధాన్యత ఇచ్చిందని రాష్ట్ర మహిళా అభివృద్ధి, శిశు మరియు గిరిజన సంక్షేమ శాఖ మంత్రి గుమ్మిడి సంధ్యారాణి వెల్లడించారు. ముఖ్యమంత్రి నారా చంద్రబాబు నాయుడు దూరదృష్టి, ఉప ముఖ్యమంత్రి పవన్ కళ్యాణ్ సహకారంతో సంక్షేమాన్ని కేవలం ఆర్థిక సాయం వరకే పరిమితం చేయకుండా, సాధికారతకు వేదికగా మలుస్తున్నామని ఆమె తెలిపారు.ప్రతి మహిళ భద్రంగా జీవించాలి, ప్రతి చిన్నారి ఆరోగ్యంగా ఎదగాలి, ప్రతి గిరిజన కుటుంబం అభివృద్ధి ఫలాలను అందుకోవాలి అనే లక్ష్యంతో ప్రభుత్వం పనిచేస్తోందన్నారు. గత రెండేళ్లలో చేపట్టిన కార్యక్రమాలు లక్షలాది కుటుంబాల జీవితాల్లో ప్రత్యక్ష మార్పు తీసుకువచ్చాయని ఆమె పేర్కొన్నారు.

*అంగన్‌వాడీల బలోపేతం.. 20 లక్షల మందికి సేవలు*

రాష్ట్రవ్యాప్తంగా 56,746 అంగన్‌వాడీ కేంద్రాల ద్వారా గర్భిణీలు, బాలింతలు, చిన్నారులకు పోషకాహారం, ఆరోగ్య సేవలు, ప్రీ-స్కూల్ విద్య అందిస్తున్నట్లు మంత్రి తెలిపారు. దాదాపు 20 లక్షల మంది ఈ సేవలను పొందుతున్నారని వెల్లడించారు.గత రెండు సంవత్సరాల కాలంలో ఎక్కడా అంతరాయం లేకుండా పోషకాహార పంపిణీ కొనసాగిందని తెలిపారు. గ్రామీణ ప్రాంతాల్లో సేవలను మరింత సమర్థవంతంగా అందించేందుకు 5,389 మంది అంగన్‌వాడీ టీచర్లు, 5,287 మంది ఆయాలను నియమించడం ద్వారా 11 వేల మందికి పైగా ఉపాధి అవకాశాలు కల్పించినట్లు వివరించారు.మినీ అంగన్‌వాడీ కేంద్రాలను ప్రధాన కేంద్రాలుగా అప్‌గ్రేడ్ చేయడం వల్ల సేవల నాణ్యత పెరగడమే కాకుండా మహిళలకు ఉద్యోగ అవకాశాలు కూడా విస్తరించాయని చెప్పారు.

*రూ.100 కోట్లతో మౌలిక సదుపాయాల విప్లవం*

అంగన్‌వాడీ కేంద్రాలను కేవలం పోషకాహార పంపిణీ కేంద్రాలుగా కాకుండా చిన్నారుల సమగ్ర అభివృద్ధి కేంద్రాలుగా తీర్చిదిద్దేందుకు ప్రభుత్వం చర్యలు చేపట్టింది.సుమారు రూ.100 కోట్ల వ్యయంతో 10 వేల అంగన్‌వాడీ కేంద్రాల్లో తాగునీటి సదుపాయాలు, ఆర్.ఓ. ప్లాంట్లు, భవనాల మరమ్మతులు, పారిశుద్ధ్య సదుపాయాలు, వంట సామగ్రి, పచ్చదనం కార్యక్రమాలు చేపట్టినట్లు మంత్రి తెలిపారు.

అదే విధంగా అన్ని అంగన్‌వాడీ కేంద్రాలకు దశలవారీగా ఇండక్షన్ స్టవ్‌లు అందజేస్తున్నట్లు వెల్లడించారు. దీనివల్ల పరిశుభ్రత పెరగడమే కాకుండా ఇంధన వ్యయం తగ్గుతుందని పేర్కొన్నారు.

*స్మార్ట్ ఫోన్లతో డిజిటల్ అంగన్‌వాడీలు*

సాంకేతికతను గ్రామ స్థాయికి తీసుకెళ్లేందుకు ప్రభుత్వం ప్రత్యేక చర్యలు చేపట్టింది. రూ.72 కోట్ల వ్యయంతో అంగన్‌వాడీ టీచర్లు, కార్యకర్తలకు 5జీ స్మార్ట్‌ఫోన్లు అందజేసినట్లు మంత్రి తెలిపారు.

ఈ ఫోన్ల ద్వారా పిల్లల పెరుగుదల, పోషకాహార పంపిణీ, గర్భిణీల ఆరోగ్య పరిస్థితి, హాజరు వివరాలు, ప్రభుత్వ పథకాల అమలు వంటి అంశాలను రియల్ టైమ్‌లో పర్యవేక్షించే అవకాశం కలిగిందన్నారు.దీంతో సేవల్లో పారదర్శకత పెరగడంతో పాటు లబ్ధిదారులకు వేగవంతమైన సేవలు అందుతున్నాయని పేర్కొన్నారు.

*మహిళల భద్రతకు 26 జిల్లాల్లో వన్ స్టాప్ సెంటర్లు*

మహిళల భద్రతకు రాష్ట్ర ప్రభుత్వం అత్యున్నత ప్రాధాన్యత ఇస్తోందని మంత్రి స్పష్టం చేశారు. రాష్ట్రంలోని 26 జిల్లాల్లో వన్ స్టాప్ సెంటర్లను ఏర్పాటు చేసి అత్యవసర సహాయం, న్యాయ సలహాలు, వైద్య సేవలు, మానసిక స్థైర్యం, పోలీసు సహకారం వంటి సేవలను ఒకే వేదికపై అందిస్తున్నట్లు తెలిపారు.గత రెండేళ్లలో వేలాది మంది మహిళలు ఈ కేంద్రాల ద్వారా సహాయం పొందారని చెప్పారు. మహిళలపై వేధింపులు, హింస, అత్యవసర పరిస్థితుల్లో తక్షణ స్పందన అందించడంలో ఈ కేంద్రాలు కీలక పాత్ర పోషిస్తున్నాయని పేర్కొన్నారు.

*3,393 బాల్య వివాహాలకు అడ్డుకట్ట*

బాలికల విద్య, భవిష్యత్తు పరిరక్షణ కోసం ప్రభుత్వం కఠిన చర్యలు చేపట్టిందని మంత్రి తెలిపారు. గత రెండేళ్లలో రాష్ట్రవ్యాప్తంగా 3,393 బాల్య వివాహాలను అడ్డుకున్నట్లు వెల్లడించారు.

ప్రతి బాలిక చదువు పూర్తి చేసి స్వయం సమృద్ధిని సాధించే వరకు ప్రభుత్వం అండగా నిలుస్తుందని చెప్పారు. బాల్య వివాహాల నిర్మూలన కోసం అధికారులు, అంగన్‌వాడీ సిబ్బంది, పోలీసు శాఖ సమన్వయంతో పనిచేస్తున్నట్లు తెలిపారు.

*మాతా-శిశు ఆరోగ్యానికి ప్రత్యేక పథకాలు*

గర్భిణీలు, బాలింతల ఆరోగ్య పరిరక్షణకు ప్రత్యేక ప్రాధాన్యత ఇస్తున్నామని మంత్రి పేర్కొన్నారు. మొదటి ప్రసవానికి రూ.5,000, రెండో ప్రసవానికి రూ.6,000 ఆర్థిక సహాయం అందిస్తున్నట్లు తెలిపారు.అదనంగా తల్లిపాల ప్రోత్సాహం, పోషకాహార భద్రత, శిశు సంరక్షణ కోసం ప్రత్యేక కేంద్రాలను ఏర్పాటు చేసినట్లు వివరించారు. తల్లి, బిడ్డ ఆరోగ్యం మెరుగుపడేలా సమగ్ర కార్యాచరణ కొనసాగుతోందన్నారు.

*గిరిజన విద్యలో భారీ పెట్టుబడులు*

గిరిజన ప్రాంతాల అభివృద్ధికి విద్యే ప్రధాన ఆయుధమని ప్రభుత్వం భావిస్తోందని మంత్రి తెలిపారు.రాష్ట్రవ్యాప్తంగా 371 ఆశ్రమ పాఠశాలలు, 199 గురుకులాలు, 179 పోస్ట్ మెట్రిక్ హాస్టళ్లు, 1,950 ప్రాథమిక పాఠశాలలతో కలిపి మొత్తం 2,715 గిరిజన విద్యాసంస్థలు పనిచేస్తున్నాయని చెప్పారు.ఈ విద్యాసంస్థల ద్వారా వేలాది మంది విద్యార్థులకు నాణ్యమైన విద్య, వసతి, పోషకాహారం అందిస్తున్నట్లు వెల్లడించారు.

*హాస్టళ్లలో మెరుగైన సౌకర్యాలు*

గిరిజన విద్యార్థులకు మెరుగైన జీవన వాతావరణం కల్పించేందుకు ప్రభుత్వం ప్రత్యేక చర్యలు చేపట్టింది.స్టీల్ ప్లేట్లు, గ్లాసులు, నోట్‌బుక్స్, బెడ్ షీట్లు, దుప్పట్లు, స్టేషనరీ వంటి అవసరమైన సామగ్రిని పంపిణీ చేసినట్లు తెలిపారు. హాస్టళ్లలో పరిశుభ్రత, భద్రత, పోషకాహార నాణ్యతపై ప్రత్యేక పర్యవేక్షణ కొనసాగుతోందన్నారు.

గతంలో ఎన్నడూ లేనివిధంగా విద్యార్థుల సంక్షేమానికి ప్రాధాన్యత ఇస్తున్నామని మంత్రి పేర్కొన్నారు.

*సికిల్ సెల్ అనీమియాపై యుద్ధం*

గిరిజన ప్రాంతాల్లో ఎక్కువగా కనిపించే సికిల్ సెల్ అనీమియా వ్యాధి నియంత్రణకు ప్రభుత్వం సమగ్ర కార్యాచరణ చేపట్టింది.లక్షలాది మందికి ఆరోగ్య పరీక్షలు నిర్వహించడంతో పాటు విశాఖపట్నంలో ప్రత్యేక వైద్య సేవలు అందుబాటులోకి తీసుకువచ్చినట్లు మంత్రి తెలిపారు.

*వ్యాధి గుర్తింపు, చికిత్స, అవగాహన*

కార్యక్రమాలను సమన్వయంతో అమలు చేస్తున్నట్లు చెప్పారు.డోలీ మోతలకు శాశ్వత పరిష్కారం లక్ష్యం గిరిజన ప్రాంతాల్లో రహదారి సదుపాయాల లేమి కారణంగా ఇప్పటికీ కొన్ని ప్రాంతాల్లో రోగులను డోలీలపై తరలించాల్సిన పరిస్థితులు కనిపిస్తున్నాయని మంత్రి పేర్కొన్నారు.

ఈ సమస్యకు శాశ్వత పరిష్కారం కోసం భారీ స్థాయిలో రోడ్ల నిర్మాణం చేపట్టామని తెలిపారు. అటవీ అనుమతులు అవసరమయ్యే ప్రాంతాల్లో కూడా ప్రజల అవసరాలను దృష్టిలో ఉంచుకుని పనులు వేగవంతం చేస్తున్నామని వెల్లడించారు.

ఎవరూ వైద్య సేవల కోసం డోలీలపై ప్రయాణించాల్సిన పరిస్థితి రాకూడదనేదే ప్రభుత్వ లక్ష్యమన్నారు.

*గిరిజన రైతుల ఆదాయ వృద్ధికి ప్రత్యేక ప్రణాళిక*

గిరిజన రైతుల ఆర్థిక సాధికారత కోసం ప్రభుత్వం విలువ ఆధారిత పంటల సాగును ప్రోత్సహిస్తోంది.

కాఫీ, మిరియాలు, పసుపు, చింతపండు వంటి పంటల సాగు ద్వారా రైతుల ఆదాయాన్ని పెంచే ప్రయత్నం జరుగుతోందని మంత్రి తెలిపారు. ప్రస్తుతం 2.26 లక్షల ఎకరాల్లో కాఫీ సాగు జరుగుతోందని వెల్లడించారు.ట్రైకార్ రుణాలు, మార్కెటింగ్ సదుపాయాలు, విలువ ఆధారిత ఉత్పత్తుల తయారీ ద్వారా గిరిజన రైతులకు మెరుగైన ఆదాయం వచ్చేలా చర్యలు తీసుకుంటున్నట్లు వివరించారు.

*గంజాయి సాగుపై ఈగల్ బృందాల నిఘా*

గిరిజన ప్రాంతాల్లో గంజాయి సాగును పూర్తిగా అరికట్టేందుకు ప్రభుత్వం కఠిన చర్యలు చేపట్టిందని మంత్రి తెలిపారు. అల్లూరి సీతారామరాజు జిల్లాతో పాటు ఇతర గిరిజన ప్రాంతాల్లో ప్రత్యేక ఈగల్ బృందాల ద్వారా నిరంతర పర్యవేక్షణ కొనసాగుతోందన్నారు.

పలు మండలాల్లో గంజాయి సాగు పూర్తిగా నియంత్రణలోకి వచ్చిందని, మిగిలిన ప్రాంతాల్లో కూడా కఠిన చర్యలు కొనసాగుతున్నాయని వెల్లడించారు.

*డీఎస్సీ నియామకాలపై స్పష్టత*

ఇటీవల నిర్వహించిన ఉపాధ్యాయ నియామకాల ప్రక్రియ పూర్తిగా రాజ్యాంగబద్ధ రిజర్వేషన్ విధానాలకు అనుగుణంగా పారదర్శకంగా నిర్వహించబడిందని మంత్రి సంధ్యారాణి స్పష్టం చేశారు.షెడ్యూల్డ్ ట్రైబ్స్, షెడ్యూల్డ్ కాస్ట్స్, బీసీలు, ఈడబ్ల్యూఎస్, మహిళలు, దివ్యాంగులు, క్రీడాకారులకు వర్తించే రిజర్వేషన్లను నిబంధనల ప్రకారమే అమలు చేశామని తెలిపారు.16,500కు పైగా ఉపాధ్యాయ పోస్టులను భర్తీ చేయడం ద్వారా వేలాది కుటుంబాలకు ఉపాధి అవకాశాలు కల్పించామని పేర్కొన్నారు.

*సంక్షేమం నుంచి సాధికారత వైపు ప్రభుత్వ అడుగులు*

మహిళలు, పిల్లలు, గిరిజనుల అభివృద్ధిని కేవలం సంక్షేమ పథకాల కోణంలో కాకుండా, దీర్ఘకాలిక సాధికారత దిశగా ప్రభుత్వం తీసుకెళ్తోందని మంత్రి గుమ్మిడి సంధ్యారాణి పేర్కొన్నారు.అంగన్‌వాడీల ఆధునీకరణ, మహిళల భద్రత, బాల్య వివాహాల నిరోధం, గిరిజన విద్యాభివృద్ధి, ఆరోగ్య పరిరక్షణ, రైతుల ఆదాయ వృద్ధి, గంజాయి నిర్మూలన వంటి అనేక రంగాల్లో రెండేళ్లలో స్పష్టమైన ఫలితాలు కనిపిస్తున్నాయని తెలిపారు.ప్రజలకు ఇచ్చిన హామీలను అమలు చేస్తూ, సమాజంలోని చివరి వ్యక్తి వరకు ప్రభుత్వ ఫలాలు చేరేలా కూటమి ప్రభుత్వం నిరంతరం కృషి చేస్తోందని ఆమె స్పష్టం చేశారు.