Palnadu: వరికపుడిశిల లిఫ్ట్ వేగం; అక్టోబర్‌లోగా కీలక ప్రక్రియలు పూర్తి

Palnadu: పల్నాడు జిల్లాలోని మెట్ట ప్రాంతాలకు సాగునీరు అందించే లక్ష్యంతో చేపట్టిన వరికపుడిశిల లిఫ్ట్ స్కీమ్ ప్రాజెక్టు పనులను వేగవంతం చేయాలని రాష్ట్ర జలవనరుల శాఖ మంత్రి నిమ్మల రామానాయుడు అధికారులను ఆదేశించారు. ప్రాజెక్టుకు సంబంధించిన డీపీఆర్, ఫ్రీ ఫీజిబిలిటీ రిపోర్ట్, ప్రజాభిప్రాయ సేకరణ ప్రక్రియలను అక్టోబర్ నాటికి పూర్తి చేయాలని స్పష్టం చేశారు. అలాగే భూసేకరణ ప్రక్రియను నాలుగు నెలల్లోగా పూర్తి చేయాలని అధికారులకు గడువు విధించారు.

అమరావతి సచివాలయంలో వరికపుడిశిల లిఫ్ట్ స్కీమ్‌పై మంత్రి నిమ్మల రామానాయుడు సమీక్ష నిర్వహించారు. పల్నాడు జిల్లాకు చెందిన ప్రజాప్రతినిధులు, ఇరిగేషన్ శాఖ ఉన్నతాధికారులతో కలిసి ప్రాజెక్టు పురోగతిపై చర్చించారు. ఎంపీ లావు శ్రీకృష్ణదేవరాయులు, ఎమ్మెల్యే జూలకంటి బ్రహ్మానందరెడ్డి, ఇరిగేషన్ అడ్వైజర్ వెంకటేశ్వరరావు, ఈఎన్సీ నరసింహమూర్తితో పాటు ప్రాజెక్టు చీఫ్ ఇంజినీర్, సూపరింటెండెంట్ ఇంజినీర్, సంబంధిత ఏజెన్సీల ప్రతినిధులు సమావేశంలో పాల్గొన్నారు.

సమీక్ష సందర్భంగా ప్రాజెక్టుకు సంబంధించిన సర్వే, డీపీఆర్, భూసేకరణ తదితర అంశాలపై మంత్రి అధికారులను అడిగి వివరాలు తెలుసుకున్నారు. ఇప్పటివరకు జరిగిన పనులు, ప్రాజెక్టు పురోగతిని సమీక్షించిన ఆయన.. ఇకపై ఎలాంటి జాప్యం లేకుండా అన్ని ప్రక్రియలను సమాంతరంగా పూర్తి చేయాలని సూచించారు.

పల్నాడు జిల్లాలో సుమారు 84 వేల ఎకరాల మెట్ట భూములకు సాగునీరు అందించడమే వరికపుడిశిల లిఫ్ట్ స్కీమ్ ప్రధాన ఉద్దేశమని మంత్రి తెలిపారు. మెట్ట ప్రాంత రైతులు చాలాకాలంగా ఎదురుచూస్తున్న సాగునీటి అవసరాలను తీర్చేందుకు ఈ ప్రాజెక్టు కీలకమని పేర్కొన్నారు. సాగునీటి సౌకర్యం అందుబాటులోకి వస్తే పల్నాడు మెట్ట ప్రాంతాల్లో వ్యవసాయ రంగానికి మరింత ఊతం లభిస్తుందని చెప్పారు.

కూటమి ప్రభుత్వం వరికపుడిశిల ప్రాజెక్టును 36 ప్రాధాన్యతా ప్రాజెక్టుల్లో ఒకటిగా గుర్తించిందని మంత్రి నిమ్మల తెలిపారు. ప్రాజెక్టును కేవలం ప్రతిపాదనలకే పరిమితం చేయకుండా.. అవసరమైన అనుమతులు, సర్వేలు, భూసేకరణ, డీపీఆర్ వంటి ప్రక్రియలను వేగంగా పూర్తి చేసి కార్యరూపంలోకి తీసుకురావాలని అధికారులను ఆదేశించారు.

ముఖ్యంగా అక్టోబర్ నాటికి డీపీఆర్, ఫ్రీ ఫీజిబిలిటీ రిపోర్ట్, ప్రజాభిప్రాయ సేకరణ ప్రక్రియలను పూర్తి చేయాలని మంత్రి స్పష్టమైన గడువు విధించారు. ఈ ప్రక్రియల్లో శాఖల మధ్య సమన్వయం పెంచి ఎక్కడా జాప్యం జరగకుండా చూడాలని సూచించారు.

ఇక ప్రాజెక్టుకు అవసరమైన 586 ఎకరాల భూమిని రూ.63 కోట్ల వ్యయంతో భూసేకరణ చేయాల్సి ఉందని అధికారులు మంత్రికి వివరించారు. భూసేకరణ ప్రక్రియను కూడా నాలుగు నెలల్లో పూర్తి చేయాలని మంత్రి ఆదేశించారు. రైతులు, భూయజమానులకు సంబంధించిన అంశాలను నిబంధనల ప్రకారం పరిష్కరిస్తూ ప్రక్రియను వేగవంతం చేయాలని సూచించారు.

వరికపుడిశిల లిఫ్ట్ స్కీమ్ ద్వారా పల్నాడు మెట్ట ప్రాంతాల్లో సాగునీటి సమస్యకు శాశ్వత పరిష్కారం చూపించేందుకు ప్రభుత్వం కట్టుబడి ఉందని మంత్రి నిమ్మల రామానాయుడు తెలిపారు. నిర్దేశించిన గడువుల్లో పనులు పూర్తి చేసేలా అధికారులు, ప్రజాప్రతినిధులు సమన్వయంతో పనిచేయాలని ఆదేశించారు.