Amaravati: సింగపూర్‌లో లోకేష్ హంగామా.. అదిరిపోయే వెల్కమ్!

Singapore: సింగపూర్ పర్యటనకు వెళ్లిన ఆంధ్రప్రదేశ్ విద్య, ఐటీ శాఖల మంత్రి నారా లోకేష్ కు అక్కడి ప్రవాసాంధ్రులు ఘన స్వాగతం పలికారు. విమానాశ్రయం వద్ద పెద్ద సంఖ్యలో చేరుకున్న తెలుగు సంఘాల ప్రతినిధులు, యువ ఐటీ ఉద్యోగులు, వ్యాపారవేత్తలు లోకేష్ ను ఆత్మీయంగా ఆహ్వానించారు. “జై తెలుగుదేశం”, “జై ఆంధ్రప్రదేశ్” నినాదాలతో అక్కడ సందడి నెలకొంది. రాష్ట్ర అభివృద్ధిపై ప్రభుత్వం తీసుకుంటున్న నిర్ణయాలు, కొత్త పెట్టుబడుల ఆకర్షణపై ప్రవాసాంధ్రులు ఆసక్తిగా చర్చించారు.

ఈ సందర్భంగా పలువురు తెలుగువారు రాష్ట్రానికి ప్రముఖ ద్విచక్ర వాహన సంస్థ Royal Enfield ను తీసుకురావడంలో మంత్రి లోకేష్ కీలక పాత్ర పోషించారని అభినందించారు. భారీ పరిశ్రమలు, ఐటీ కంపెనీలు, తయారీ రంగ సంస్థలను రాష్ట్రానికి తీసుకువస్తూ యువతకు ఉపాధి అవకాశాలు కల్పిస్తున్నారని కొనియాడారు. ప్రత్యేకంగా ఉద్యోగ అవకాశాలు పెరగడం వల్ల విదేశాలకు వెళ్లాల్సిన పరిస్థితులు తగ్గుతాయని ఆశాభావం వ్యక్తం చేశారు.

ప్రవాసాంధ్రులతో మాట్లాడిన మంత్రి లోకేష్ భావోద్వేగంగా స్పందించారు. “ప్రపంచంలో ఎక్కడ ఉన్నా తెలుగు వాళ్లు తమ ప్రతిభతో ప్రత్యేక గుర్తింపు తెచ్చుకుంటున్నారు. మీ విజయం చూసి గర్వంగా ఉంటుంది” అని అన్నారు. అలాగే విదేశాల్లో పనిచేస్తున్న ప్రతి తెలుగు వ్యక్తి ఆంధ్రప్రదేశ్ కు బ్రాండ్ అంబాసిడర్ గా మారాలని పిలుపునిచ్చారు. “మీరు పనిచేస్తున్న కంపెనీల్లో, మీ పరిచయ వర్గాల్లో రాష్ట్రంలో జరుగుతున్న అభివృద్ధి గురించి చెప్పండి. పెట్టుబడులకు ఏపీ ఎలా అనుకూలంగా మారుతోందో వివరించండి” అని కోరారు.

రాష్ట్రంలో ప్రస్తుతం ఐటీ, ఎలక్ట్రానిక్స్, డేటా సెంటర్లు, గ్రీన్ ఎనర్జీ, తయారీ రంగాల్లో వేగంగా పెట్టుబడులు వస్తున్నాయని లోకేష్ వివరించారు. యువత నైపుణ్యాభివృద్ధిపై ప్రభుత్వం ప్రత్యేక దృష్టి పెట్టిందని తెలిపారు. విద్యా రంగంలో ఆధునిక మార్పులు తీసుకొస్తూ, ప్రపంచ స్థాయి అవకాశాలకు విద్యార్థులను సిద్ధం చేస్తున్నామని చెప్పారు. “ప్రభుత్వం ఒక్కటే రాష్ట్రాన్ని అభివృద్ధి చేయలదు. ప్రపంచవ్యాప్తంగా ఉన్న తెలుగువారి సహకారం కూడా చాలా అవసరం” అని పేర్కొన్నారు.

సింగపూర్ లో జరిగిన ఈ సమావేశం ఆత్మీయ వాతావరణంలో సాగింది. పలువురు ప్రవాసాంధ్రులు మంత్రి లోకేష్ తో ఫోటోలు దిగుతూ తమ ఆనందాన్ని వ్యక్తం చేశారు. రాష్ట్ర అభివృద్ధి కోసం విదేశాల్లో ఉన్న తెలుగువారిని భాగస్వాములను చేయాలన్న ప్రభుత్వ ప్రయత్నాలకు ఈ పర్యటన మరో అడుగుగా మారిందని రాజకీయ వర్గాలు అభిప్రాయపడుతున్నాయి.