విధ్వంసం సృష్టించి బాధితులుగా నటించడం వైసీపీ నైజం: ఉండవల్లి శ్రీదేవి

Mangalagiri: విధ్వంసాలు సృష్టించి, ఆ తర్వాత బాధితులుగా నటించడమే వైసీపీ రాజకీయమని మాదిగ కార్పొరేషన్ చైర్మన్ ఉండవల్లి శ్రీదేవి విమర్శించారు. గురువారం మంగళగిరిలోని తెలుగుదేశం పార్టీ కేంద్ర కార్యాలయంలో నిర్వహించిన మీడియా సమావేశంలో ఆమె మాట్లాడుతూ, గత ఐదేళ్ల వైసీపీ పాలనలో ప్రతిపక్షాలను అణచివేసి, అక్రమ కేసులతో వేధించిన నాయకులు ఇప్పుడు ప్రజాస్వామ్యం గురించి మాట్లాడటం విడ్డూరంగా ఉందన్నారు. ప్రజలు వైసీపీని 11 సీట్లకు పరిమితం చేసినా ఆ పార్టీ వైఖరిలో మార్పు రాలేదని విమర్శించారు.

స్థానిక సంస్థల ఎన్నికల సందర్భంగా గంజాయి బ్యాచ్‌లు, రౌడీ మూకలతో అల్లర్లు సృష్టించేందుకు వైసీపీ ప్రయత్నిస్తోందని శ్రీదేవి ఆరోపించారు. ఎంపీ మిథున్ రెడ్డి పెద్ద కాన్వాయ్‌తో వచ్చి ఘర్షణలకు కారణమయ్యారని, ఈ ఘటనల్లో టీడీపీ కార్యకర్తలు సహా పలువురికి గాయాలయ్యాయని పేర్కొన్నారు. తిరుపతి, రాయచోటి, పులివెందుల, పుంగనూరు ప్రాంతాల్లో నేరచరిత్ర ఉన్నవారితో ఉద్రిక్తతలు సృష్టిస్తున్నారని ఆరోపించారు. అయితే, ఎన్నికల్లో గెలవాలంటే ప్రజల మద్దతు పొందాలని, భయభ్రాంతులకు గురిచేసి గెలుస్తామనుకోవడం వైసీపీ భ్రమేనని అన్నారు.

బీసీల రాజకీయ ప్రాతినిధ్యంపై మాట్లాడుతూ, వైసీపీ పాలనలో 34 శాతం రిజర్వేషన్లు అమలు చేయకపోవడంతో 16,800 మంది బీసీలు రాజకీయ పదవులకు దూరమయ్యారని శ్రీదేవి ఆరోపించారు. కూటమి ప్రభుత్వం ఎస్సీ, ఎస్టీ, బీసీ, మైనారిటీలకు 67.6 శాతం సీట్లు కేటాయించిందని తెలిపారు. బీసీలకు దాదాపు 34 శాతం రాజకీయ ప్రాతినిధ్యం కల్పించేందుకు చర్యలు తీసుకుంటున్నామని చెప్పారు. మహిళలు ఆర్థికంగా, రాజకీయంగా ఎదిగేందుకు కూటమి ప్రభుత్వం అవకాశాలు కల్పిస్తోందన్నారు.

కూటమి ప్రభుత్వం సంక్షేమం, అభివృద్ధికి ప్రాధాన్యం ఇస్తోందని శ్రీదేవి పేర్కొన్నారు. ముఖ్యమంత్రి చంద్రబాబు తొలి సంతకం చేసిన మెగా డీఎస్సీ ద్వారా 16 వేల మందికి పైగా ఉద్యోగాలు కల్పించామని, మరో డీఎస్సీని కూడా ప్రకటించామని తెలిపారు. రాష్ట్రానికి సుమారు రూ.26 లక్షల కోట్ల పెట్టుబడులకు సంబంధించిన ఒప్పందాలు రావడం ద్వారా పరిశ్రమలు, ఉపాధి అవకాశాలు పెరుగుతాయని చెప్పారు. అమరావతి నిర్మాణం, పోలవరం ప్రాజెక్టు, పారిశ్రామిక అభివృద్ధి పనులు ముందుకు సాగుతున్నాయని వివరించారు.

సూపర్ సిక్స్ హామీల అమలులో భాగంగా తల్లికి వందనం, అన్నదాత సుఖీభవ, దీపం-2 పథకాలను అమలు చేస్తున్నామని తెలిపారు. అర్హులైన మహిళలకు ఉచిత గ్యాస్ సిలిండర్లు, రైతులకు ఆర్థిక సాయం అందిస్తున్నామని చెప్పారు. గతంలో వైసీపీ ప్రభుత్వం సంక్షేమ పథకాల అమలులో ఇచ్చిన హామీలను పూర్తిస్థాయిలో నిలబెట్టుకోలేదని విమర్శించారు.

తిరుమల లడ్డూ ప్రసాదం అంశాన్ని ప్రస్తావిస్తూ, భక్తుల మనోభావాలను దెబ్బతీసే పరిణామాలకు వైసీపీ పాలనలో చోటు కలిగిందని ఆరోపించారు. అలాగే, కుటుంబ ఆస్తుల వివాదంలో తల్లి విజయమ్మ, చెల్లి షర్మిలకు న్యాయం చేయలేని జగన్ రాష్ట్ర ప్రజలకు ఏం చేస్తారని ప్రశ్నించారు.

ప్రజలు వైసీపీ రాజకీయాలను నమ్మే పరిస్థితిలో లేరని, ముఖ్యంగా మహిళలు ఆ పార్టీకి మరో అవకాశం ఇవ్వబోరని శ్రీదేవి అన్నారు. స్థానిక సంస్థల ఎన్నికలు ప్రశాంతంగా జరిగేందుకు అన్ని వర్గాలు సహకరించాలని కోరారు. అల్లర్లు, విధ్వంసాలకు పాల్పడే వారిపై ప్రభుత్వం కఠినంగా వ్యవహరిస్తుందని హెచ్చరించారు. అభివృద్ధి, సంక్షేమంతో ముందుకు సాగుతున్న కూటమి ప్రభుత్వానికి ప్రజలు మద్దతుగా నిలవాలని ఆమె విజ్ఞప్తి చేశారు...