Anantapur: మత్తు పదార్థాలకు దూరంగా ఉండండి.. పోలీసుల వినూత్న అవగాహన డ్రైవ్!

Anantapur: అనంతపురం జిల్లా కళ్యాణదుర్గం మండలం పాలవాయి గ్రామంలో గంజాయి నిర్మూలన లక్ష్యంగా పోలీసులు “వజ్రప్రహార్” ప్రత్యేక డ్రైవ్‌ను విస్తృతంగా నిర్వహించారు. జిల్లా ఎస్పీ పి. జగదీష్, ఐపీఎస్ మరియు కళ్యాణదుర్గం డీఎస్పీ ఆదేశాల మేరకు చేపట్టిన ఈ కార్యక్రమం శుక్రవారం కొనసాగింది. గ్రామాల్లో అక్రమ కార్యకలాపాలను పూర్తిగా అరికట్టాలనే ఉద్దేశంతో పోలీసులు ప్రత్యేక దృష్టి సారించారు.

ఈ డ్రైవ్‌లో భాగంగా గ్రామంలోని అనుమానాస్పద గృహాలు, రౌడీషీటర్ల నివాసాలను పోలీసులు సవివరంగా తనిఖీ చేశారు. గంజాయి వినియోగం, నిల్వ, రవాణా వంటి చర్యలపై కఠినంగా వ్యవహరిస్తామని స్పష్టం చేశారు. అక్రమ మత్తు పదార్థాల వ్యాపారం సమాజానికి హానికరమని, యువతను దారి తప్పించే ప్రధాన కారణమని పోలీసులు పేర్కొన్నారు. అలాగే గ్రామ ప్రజలను ఒకేచోట సమీకరించి గంజాయి, నాటు సారా, జూదం వంటి అక్రమ కార్యకలాపాల వల్ల కలిగే దుష్ప్రభావాలపై అవగాహన కార్యక్రమం నిర్వహించారు. ఇటువంటి కార్యకలాపాలకు దూరంగా ఉండాలని, ఎవరైనా ఇలాంటి చర్యలకు పాల్పడుతున్నట్లు తెలిసిన వెంటనే పోలీసులకు సమాచారం అందించాలని సూచించారు. సమాచారం ఇచ్చిన వారి వివరాలు గోప్యంగా ఉంచుతామని హామీ ఇచ్చారు.

గ్రామ ప్రజలతో పోలీసులకు సహకరించాలని ప్రతిజ్ఞ చేయించడంతో పాటు, చట్టాన్ని పాటిస్తూ సమాజంలో శాంతి భద్రతలను కాపాడేందుకు ప్రతి ఒక్కరూ బాధ్యతగా వ్యవహరించాలని సూచించారు. గ్రామస్థులు కూడా పోలీసుల చర్యలను స్వాగతిస్తూ, అక్రమ కార్యకలాపాలను నిర్మూలించడంలో తమవంతు సహకారం అందిస్తామని తెలిపారు. ఈ డ్రైవ్‌లో భాగంగా రహదారులపై వాహనాలను తనిఖీ చేసి పత్రాలు లేని వాహనాలను గుర్తించి జరిమానాలు విధించారు. ట్రాఫిక్ నిబంధనలను పాటించాల్సిన అవసరంపై కూడా అవగాహన కల్పించారు. ఈ కార్యక్రమంలో కళ్యాణదుర్గం గ్రామీణ యుపీఎస్ ఇన్‌స్పెక్టర్ గణేష్, శెట్టూరు, బ్రహ్మసముద్రం ఎస్సైలు మరియు పోలీస్ సిబ్బంది పెద్ద సంఖ్యలో పాల్గొన్నారు. ఈ తరహా ప్రత్యేక డ్రైవ్‌లను కొనసాగిస్తూ జిల్లాలో అక్రమ కార్యకలాపాలపై కట్టడి కొనసాగిస్తామని పోలీసులు తెలిపారు.