Gooty: ఎన్నికల బరిలో సీనియర్ జర్నలిస్ట్, లెక్చరర్ శ్రీకరం గోవిందరాజులు

గుత్తి: గుత్తి మున్సిపల్ ఎన్నికల నేపథ్యంలో పట్టణ రాజకీయ వర్గాల్లో ఆసక్తికర చర్చ సాగుతోంది. సీనియర్ పాత్రికేయుడు, లెక్చరర్ శ్రీకరం గోవిందరాజులు ఎన్నికల బరిలోకి దిగనున్నారనే ప్రచారం ప్రస్తుతం పట్టణంలో జోరుగా వినిపిస్తోంది. ఆయన వైఎస్సార్ కాంగ్రెస్ పార్టీ తరఫున పోటీ చేస్తారా? లేక స్వతంత్ర అభ్యర్థిగా బరిలో నిలుస్తారా? అనే అంశంపై రాజకీయ వర్గాల్లో చర్చ కొనసాగుతోంది.

గుత్తి పట్టణంలోని వివిధ వర్గాలతో శ్రీకరం గోవిందరాజులకు ఉన్న పరిచయాలు, స్నేహ సంబంధాలతో పాటు విద్యారంగంలో సుదీర్ఘ అనుభవం ఆయనకు ప్రత్యేక గుర్తింపును తీసుకువచ్చినట్లు ఆయన సన్నిహితులు పేర్కొంటున్నారు. చిన్ననాటి నుంచే రాజకీయాలపై ఆసక్తి, అవగాహన కలిగి ఉన్న ఆయన విద్యార్థి దశలోనే పలు ఎన్నికల్లో చురుకుగా పాల్గొన్నట్లు సమాచారం.

హైస్కూల్ విద్యార్థిగా ఉన్న సమయంలో స్కూల్ పీపుల్ లీడర్ ఎన్నికల్లో తన స్నేహితులను బరిలో నిలబెట్టి గెలిపించిన అనుభవం ఉందని ఆయన సన్నిహితులు చెబుతున్నారు. ఇంటర్మీడియట్‌లో సెక్రటరీ పదవికి జరిగిన ఎన్నికల్లో ఏడుగురు అభ్యర్థులు పోటీ చేయగా, శ్రీకరం గోవిందరాజులు అత్యధిక మెజార్టీతో విజయం సాధించినట్లు ఆయన వర్గాలు పేర్కొంటున్నాయి. అనంతరం యూనివర్సిటీ స్థాయిలోనూ స్టూడెంట్స్ యూనియన్‌లో పనిచేసిన అనుభవం ఉన్నట్లు చెబుతున్నారు.

విద్యారంగంలో సుదీర్ఘ అనుభవం

శ్రీకరం గోవిందరాజులకు విద్యారంగంలోనూ సుదీర్ఘ అనుభవం ఉన్నట్లు సమాచారం. గుత్తిలోని శ్రీ సాయి డిగ్రీ కళాశాల, ఎమ్మెస్ డిగ్రీ కళాశాల, శ్రీ సాయి జూనియర్ కళాశాల, శ్రీ లక్ష్మీకాంత జూనియర్ కళాశాల, శ్రీ ఎస్.వి. జూనియర్ కళాశాలతో పాటు పెద్దవడుగూరు శ్రీనివాస జూనియర్ కళాశాలలో లెక్చరర్‌గా పనిచేసిన అనుభవం ఉందని ఆయన వర్గాలు చెబుతున్నాయి. అలాగే శ్రీకృష్ణదేవరాయ విశ్వవిద్యాలయంలో టీచింగ్ అసిస్టెంట్‌గా కూడా పనిచేసినట్లు సమాచారం.

MA, LLB, M.Phil, B.Ed వంటి విద్యార్హతలు కలిగి ఉండటంతో పాటు మంచి వక్తగా కూడా శ్రీకరం గోవిందరాజులకు గుర్తింపు ఉందని ఆయన సన్నిహితులు పేర్కొంటున్నారు. విద్యార్థులు, మాజీ విద్యార్థులు, మిత్రులు, వివిధ వర్గాల ప్రజలతో ఉన్న పరిచయాలు ఎన్నికల్లో తనకు అనుకూలంగా మారే అవకాశం ఉందనే చర్చ స్థానికంగా వినిపిస్తోంది.

బరిలోకి వస్తే ఎలా ఉంటుందో?

గుత్తి మున్సిపల్ ఎన్నికల్లో శ్రీకరం గోవిందరాజులు పోటీ చేస్తారనే ప్రచారం నేపథ్యంలో పట్టణ రాజకీయాల్లో ఆసక్తి నెలకొంది. ఆయన ఏ పార్టీ తరఫున పోటీ చేస్తారు? ఏ వార్డు నుంచి బరిలోకి దిగుతారు? లేక స్వతంత్ర అభ్యర్థిగా పోటీ చేస్తారా? అనే అంశాలపై ఇంకా స్పష్టత రావాల్సి ఉంది.

అయితే సీనియర్ జర్నలిస్ట్, లెక్చరర్‌గా పట్టణ ప్రజలతో ఉన్న పరిచయాల నేపథ్యంలో శ్రీకరం గోవిందరాజుల ఎన్నికల రంగ ప్రవేశంపై గుత్తి రాజకీయ వర్గాల్లో ప్రస్తుతం ఆసక్తికర చర్చ జరుగుతోంది.