Anantapur: దసరా మామూళ్ల పేరిట వేధిస్తే కఠిన చర్యలు - సీఐ కౌలుట్లయ్య!

Anantapur: విజయదశమి పండుగను పురస్కరించుకుని అనంతపురం త్రీటౌన్ పోలీస్ స్టేషన్ పరిధిలోని వ్యాపారులు, దుకాణదారులతో సీఐ కౌలుట్లయ్య బుధవారం ప్రత్యేక సమావేశం నిర్వహించారు. ఎస్సైలు, పోలీస్ సిబ్బందితో కలిసి స్థానిక త్రీటౌన్ లో నిర్వహించిన ఈ సమావేశానికి స్థానిక హోటళ్లు, కిరాణా షాపులు, మెడికల్ షాపులు మరియు జనరల్ స్టోర్స్ యజమానులు హాజరయ్యారు.

ఈ సందర్భంగా సీఐ కౌలుట్లయ్య మాట్లాడుతూ దసరా పండుగ పేరుతో హిజ్రాలు (హిజ్రాలు) ఎవరైనా షాపుల వద్దకు వచ్చి హల్‌చల్ చేస్తూ, బలవంతంగా ఎక్కువ మొత్తంలో డబ్బులు డిమాండ్ చేస్తే వెనువెంటనే పోలీసులకు సమాచారం అందించాలని సూచించారు. వ్యాపారులను ఇబ్బందులకు గురిచేసే వారిపై చట్టరీత్యా కఠిన చర్యలు తీసుకుంటామని హెచ్చరించారు.

భద్రతా చర్యల్లో భాగంగా ప్రతీ వ్యాపారస్తుడు తమ ప్రాంగణాల్లో తప్పనిసరిగా సీసీ కెమెరాలు ఏర్పాటు చేసుకోవాలని, అవి ఎల్లప్పుడూ పనిచేసేలా చూసుకోవాలని ఆదేశించారు. శాంతిభద్రతల పరిరక్షణకు, నేరాల అదుపునకు వ్యాపారులంతా పోలీసు శాఖకు సహకరించాలని ఆయన కోరారు.