Anantapur: అనంతపురంలో సినిమా స్టైల్ చోరీ.. బొలెరో వాహనంతో ఏటీఎం మిషన్‌నే ఎత్తుకెళ్లిన ముఠా!

Anantapur: ఉమ్మడి అనంతపురం జిల్లాలో ఏటీఎం దొంగల ముఠా మరోసారి రెచ్చిపోయింది. పోలీసుల నిఘాను మున్సిపల్ పరిధిలోనే సవాల్ చేస్తూ.. బుక్కరాయసముద్రం మండల కేంద్రంలో అత్యంత సాహసోపేతంగా, ప్రణాళికాబద్ధంగా ఏటీఎంను లూటీ చేశారు. ఏకంగా స్టేట్ బ్యాంక్ ఆఫ్ ఇండియా (SBI) ఏటీఎం మిషన్‌ను పూర్తిగా పెకలించి వాహనంలో ఎత్తుకెళ్లడం స్థానికంగా తీవ్ర కలకలం రేపింది.

పోలీసుల ప్రాథమిక విచారణ ప్రకారం.. అర్ధరాత్రి దాటిన తర్వాత దుండగులు ఒక బొలెరో వాహనంలో ఏటీఎం కేంద్రం వద్దకు చేరుకున్నారు. అత్యంత పక్కా స్కెచ్‌తో వచ్చిన ఈ ముఠా, బలమైన తాడు (Rope) సహాయంతో ఏటీఎం మిషన్‌ను వాహనానికి కట్టారు. ఆపై వాహనాన్ని వేగంగా ముందుకు పోనిచ్చి ఏటీఎం మిషన్‌ను పునాదులతో సహా పెకలించి బయటకు లాగేశారు. ఆ మిషన్‌ను అలాగే వాహనంలో వేసుకుని అక్కడి నుంచి పరారయ్యారు. ఈ దృశ్యాలన్నీ ఏటీఎం లోపల, పరిసరాల్లో ఉన్న సీసీ (CC) కెమెరాల్లో రికార్డ్ అయ్యాయి.

ఉదయాన్నే ఏటీఎం మిషన్ కనిపించకపోవడంతో అప్రమత్తమైన బ్యాంకు అధికారులు, పోలీసులు వెంటనే గాలింపు చర్యలు చేపట్టారు. ఈ క్రమంలో పక్కనే ఉన్న సింగనమల మండలం ఆకులేడు గ్రామ పరిధిలోని పొలాల్లో ఏటీఎం మిషన్ ముక్కలు, పరికరాలు పడి ఉండటాన్ని పోలీసులు గుర్తించారు. దుండగులు నిర్మానుష్య ప్రాంతంలో వాహనాన్ని ఆపి, ఏటీఎంను పగులగొట్టి లోపల ఉన్న నగదు మొత్తాన్ని తీసుకుని మిషన్‌ను అక్కడే పడేసి వెళ్లినట్లు నిర్ధారించారు. అయితే ఏటీఎంలో ఎంత నగదు ఉందనే విషయాన్ని బ్యాంకు అధికారులు ఇంకా లెక్కించాల్సి ఉంది.

ఘటనా స్థలానికి చేరుకున్న క్లూస్ టీమ్ వేలిముద్రలను సేకరించగా, డాగ్ స్క్వాడ్ సాయంతో పోలీసులు పరిసర ప్రాంతాలను జల్లెడ పట్టారు. కాగా, ఉమ్మడి అనంతపురం జిల్లాలో గత కొద్దిరోజులుగా ఇదే తరహా చోరీలు జరగడం పోలీసులను కలవరపెడుతోంది. గత నెలలో ధర్మవరంలో కూడా దొంగలు బొలెరో వాహనం సాయంతోనే ఏటీఎంను లాగి ఎత్తుకెళ్లారు. వారం రోజుల క్రితం గుంతకల్లులోనూ సరిగ్గా ఇలాగే ఏటీఎం చోరీకి విఫలయత్నం చేశారు.

వరుసగా ఒకే పద్ధతిలో దొంగతనాలు జరుగుతుండటంతో.. ఇదంతా ఇతర రాష్ట్రాలకు చెందిన ఒకే ప్రొఫెషనల్ దొంగల ముఠా పని అయి ఉంటుందని పోలీసులు బలంగా అనుమానిస్తున్నారు. నిందితులను పట్టుకునేందుకు ప్రత్యేక బృందాలను (Special Teams) ఏర్పాటు చేసి, సీసీటీవీ ఫుటేజ్ మరియు టెక్నికల్ ఆధారాల సాయంతో ముమ్మరంగా గాలిస్తున్నారు.