AP Fishing Ban 2026: ఏపీ మత్స్యకారులకు అలర్ట్: ఏప్రిల్ 15 నుండి వేటపై నిషేధం

AP Fishing Ban 2026: ఆంధ్రప్రదేశ్ తీరప్రాంతంలో చేపల వేటపై వార్షిక నిషేధం అమల్లోకి రానుంది. సముద్ర జీవసంపద పెంపుదల, చేపల సంతానోత్పత్తిని దృష్టిలో ఉంచుకుని ఏప్రిల్ 15 నుండి జూన్ 14 వరకు మొత్తం 61 రోజుల పాటు ప్రభుత్వం వేట విరామాన్ని ప్రకటించింది. ఈ కాలంలో మత్స్యకారుల జీవనోపాధి దెబ్బతినకుండా ప్రభుత్వం భారీ ఆర్థిక సాయాన్ని కూడా అందజేస్తోంది.

సముద్ర జీవ వైవిధ్య పరిరక్షణే లక్ష్యం

ప్రతి ఏటా వేసవి కాలంలో చేపలు మరియు ఇతర సముద్ర జీవులు సంతానోత్పత్తి చేస్తాయి. ఈ కీలక సమయంలో యాంత్రిక పడవలతో వేట సాగిస్తే మత్స్య సంపద అంతరించిపోయే ప్రమాదం ఉంది. అందుకే, సముద్ర పర్యావరణాన్ని కాపాడటానికి రాష్ట్ర మత్స్యశాఖ ఈ 61 రోజుల విరామాన్ని తప్పనిసరి చేసింది. ఈ నిబంధనలు విదేశీ నౌకలకు, రాష్ట్రంలోని అన్ని రకాల మోటారు బోట్లకు వర్తిస్తాయి. కేవలం సంప్రదాయ పడవల ద్వారా తీరానికి సమీపంలో వేట సాగించే వారికి మాత్రమే మినహాయింపు ఉంటుంది.

నిబంధనలు ఉల్లంఘిస్తే భారీ జరిమానా

వేట విరామ సమయంలో నిబంధనలు అతిక్రమించి సముద్రంలోకి వెళ్లే వారిపై మత్స్యశాఖ కఠినంగా వ్యవహరించనుంది. నిబంధనలు ఉల్లంఘించిన వారికి 5,000 రూపాయల జరిమానా విధించడమే కాకుండా, వారి వలలను ప్రభుత్వం స్వాధీనం చేసుకుంటుంది. అంతేకాకుండా, సదరు బోటు యొక్క లైసెన్స్, రిజిస్ట్రేషన్‌ను ఏడాది పాటు రద్దు చేస్తారు. తీరప్రాంతాల్లో నిఘా ఉంచేందుకు కోస్ట్ గార్డ్ , మెరైన్ పోలీసుల సహకారం తీసుకోనున్నారు.

మత్స్యకార భరోసా: ప్రతి కుటుంబానికి రూ. 20,000

వేట నిషేధ సమయంలో మత్స్యకార కుటుంబాలు ఇబ్బంది పడకుండా ఉండేందుకు ప్రభుత్వం 'మత్స్యకార భరోసా' పథకం కింద ప్రతి అర్హత కలిగిన కుటుంబానికి 20,000 రూపాయల ఆర్థిక సాయం అందజేస్తోంది. ఈ ఏడాది లబ్ధిదారుల ఎంపిక ప్రక్రియ ఏప్రిల్ 17 నుండి గ్రామ , వార్డు సచివాలయాల ద్వారా ప్రారంభం కానుంది. బోట్లకు డీజిల్ రాయితీతో పాటు, కొత్త ఇంజిన్ల కొనుగోలుపై 40 శాతం వరకు రాయితీని ప్రభుత్వం కల్పిస్తోంది.

పెరిగిన బీమా భరోసా మరియు అర్హతలు

మత్స్యకారుల భద్రత కోసం ప్రభుత్వం బీమా సౌకర్యాన్ని భారీగా పెంచింది. ప్రమాదవశాత్తు మరణించిన మత్స్యకారుల కుటుంబాలకు ఇచ్చే పరిహారాన్ని 2 లక్షల నుండి 10 లక్షల రూపాయలకు పెంచారు. ఈ ప్రయోజనాలు పొందాలంటే మత్స్యకారులు తప్పనిసరిగా గుర్తింపు కార్డులు, ఫిషింగ్ లైసెన్స్ కలిగి ఉండాలి. అలాగే వారు మత్స్యకార సహకార సంఘాల్లో సభ్యులుగా నమోదై ఉండాలి. లబ్ధిదారులు తమ వివరాలను సచివాలయాల్లో సరిచూసుకోవాలని అధికారులు సూచిస్తున్నారు.