Nara Lokesh: మోదీ హయాంలో రైల్వే విప్లవం.. కుప్పం నేతలకు చంద్రబాబు చెప్పింది ఇదే

Nara Lokesh: ఆంధ్రప్రదేశ్ రాజధాని ప్రాంతమైన మంగళగిరి నియోజకవర్గంలో మరో భారీ అభివృద్ధి మైలురాయి ఆవిష్కృతమైంది. కేంద్ర ప్రభుత్వ ప్రతిష్టాత్మక 'అమృత్‌ భారత్‌ స్టేషన్‌ పథకం' (ABSS) కింద రూ.12.56 కోట్ల భారీ వ్యయంతో అంతర్జాతీయ హంగులతో పునర్నిర్మించిన మంగళగిరి రైల్వేస్టేషన్‌ను ప్రధానమంత్రి నరేంద్ర మోదీ శుక్రవారం వర్చువల్‌గా ప్రారంభించారు. మంగళగిరి రైల్వే స్టేషన్‌లో జరిగిన ఈ అధికారిక కార్యక్రమంలో రాష్ట్ర ఐటీ, ఎలక్ట్రానిక్స్, విద్యాశాఖ మంత్రి నారా లోకేశ్‌, కేంద్ర గ్రామీణాభివృద్ధి, కమ్యూనికేషన్ల శాఖ సహాయ మంత్రి పెమ్మసాని చంద్రశేఖర్‌తో కలిసి పాల్గొన్నారు.

ఈ సందర్భంగా మంత్రి నారా లోకేశ్‌ మాట్లాడుతూ.. దేశ సర్వతోముఖాభివృద్ధికి, ఆర్థిక-సామాజిక ప్రగతికి రైల్వే రవాణా వ్యవస్థే అత్యంత కీలకమని కొనియాడారు. "గతంలో దేశంలో రైల్వే వ్యవస్థ అంటేనే తీవ్ర ఆలస్యాలు, భద్రతా లోపాలకు కేరాఫ్ అడ్రస్‌గా ఉండేది. కానీ నేడు ప్రధాని మోదీ నాయకత్వంలో 'కవచ్' (Kavach) ఆటోమేటిక్ ప్రొటెక్షన్ వంటి అత్యాధునిక సాంకేతికతతో భారత రైల్వే రంగంలో అపూర్వమైన విప్లవం నడుస్తోంది" అని లోకేశ్‌ ప్రశంసించారు.

ఒక నియోజకవర్గంలో ఎంపీ (పెమ్మసాని చంద్రశేఖర్), ఎమ్మెల్యే (నారా లోకేశ్) కలిసికట్టుగా చిత్తశుద్ధితో పనిచేస్తే అభివృద్ధి ఏ స్థాయిలో ఉంటుందో చూపించడానికి నేడు మంగళగిరి ఒక అద్భుతమైన ఉదాహరణగా నిలిచిందని లోకేశ్‌ గర్వంగా ప్రకటించారు. మంగళగిరిలో జరుగుతున్న ఈ సూపర్ స్పీడ్ అభివృద్ధి పనులను స్వయంగా చూసి నేర్చుకోవాలని ముఖ్యమంత్రి నారా చంద్రబాబు నాయుడు గారు కుప్పం నియోజకవర్గ నేతలకు దిశానిర్దేశం చేశారని ఈ సందర్భంగా లోకేశ్‌ గుర్తుచేశారు.

రైళ్ల స్టాపింగ్స్ పెంపు: మంగళగిరి నియోజకవర్గానికి రైల్వే పరంగా మరింత ప్రాధాన్యత ఇవ్వాలని, ఇక్కడ మరిన్ని కీలక ఎక్స్‌ప్రెస్ రైళ్లు ఆగేలా కేంద్రమంత్రి పెమ్మసాని చంద్రశేఖర్‌ ప్రత్యేక చొరవ చూపాలని కోరారు.

పానకాల స్వామి ఆలయ అభివృద్ధి: మంగళగిరిలోని ప్రసిద్ధ పుణ్యక్షేత్రమైన లక్ష్మీ నరసింహ స్వామి దేవస్థానం అభివృద్ధికి కేంద్ర ప్రభుత్వం నుంచి ప్రత్యేక పథకం తీసుకురావాల్సిన అవసరముందని నొక్కిచెప్పారు.

అమరావతి గ్లోబల్ సిటీ: రాజధాని అమరావతిని అంతర్జాతీయ స్థాయి నగరంగా తీర్చిదిద్దడమే కూటమి ప్రభుత్వ ధ్యేయమని.. ఇందుకోసం రైల్వే, రోడ్డు, ఎయిర్ కనెక్టివిటీలను అనుసంధానిస్తున్నట్లు తెలిపారు.

స్థానికంగానే ఉద్యోగాలు: ఏపీని పారిశ్రామికంగా, సాంకేతికంగా శరవేగంగా ముందుకు తీసుకెళ్తున్నామని.. మన నిరుద్యోగ యువత ఉద్యోగాల కోసం పక్క రాష్ట్రాల వైపు చూడాల్సిన అవసరం లేకుండా ఏపీలోనే ఉపాధి అవకాశాలు కల్పిస్తామని నారా లోకేశ్‌ భరోసా ఇచ్చారు.