Weather Update : ఏపీ, తెలంగాణ ప్రజలకు వాతావరణ శాఖ కీలక హెచ్చరిక.. ఏ జిల్లాల్లో ముప్పు ఉందంటే?

Weather Update : తెలుగు రాష్ట్రాల్లో ప్రస్తుతం విచిత్రమైన వాతావరణ పరిస్థితులు తలెత్తాయి. ఒకేసారి ఎండ తీవ్రత, అదే సమయంలో ఊహించని విధంగా భారీ వర్షాలు ప్రజలను ఉక్కిరిబిక్కిరి చేస్తున్నాయి. తూర్పు విదర్భ నుంచి దక్షిణ కేరళ వరకు విస్తరించిన ద్రోణి ప్రభావం వల్ల ఆంధ్రప్రదేశ్, తెలంగాణ రాష్ట్రాల్లో మంగళవారం, బుధవారం రోజుల్లో ఈదురుగాలులు, పిడుగులతో కూడిన మోస్తరు నుంచి భారీ వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ ఎండీ ప్రఖర్ జైన్ వెల్లడించారు. వాతావరణంలో వస్తున్న ఈ హఠాత్ మార్పుల వల్ల ప్రజలు చాలా అప్రమత్తంగా ఉండాలని ఆయన హెచ్చరించారు.

ద్రోణి ప్రభావం తీవ్రంగా ఉండటం వల్ల రాష్ట్రవ్యాప్తంగా వాతావరణం అస్థిరంగా మారింది. దీని కారణంగా మంగళ, బుధవారాల్లో గంటకు 40 నుంచి 50 కిలోమీటర్ల వేగంతో బలమైన ఈదురుగాలులు వీచే అవకాశం ఉందని అధికారులు తెలిపారు. ఈ గాలుల తీవ్రతకు పాత ఇళ్లు, చెట్ల కొమ్మలు విరిగిపడే ప్రమాదం ఉంది. అందువల్ల ప్రయాణాలు చేసే వారు, బయట తిరిగే వారు తగిన జాగ్రత్తలు తీసుకోవాలని విపత్తుల నిర్వహణ సంస్థ స్పష్టం చేసింది.

మంగళవారం ఆంధ్రప్రదేశ్‌లోని పలు జిల్లాల్లో పిడుగులతో కూడిన మోస్తరు నుంచి భారీ వర్షాలు పడే ఛాన్స్ ఉంది. ముఖ్యంగా ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు జిల్లాల్లో అక్కడక్కడా ఉరుములు, మెరుపులతో వానలు పడతాయని ఎండీ ప్రఖర్ జైన్ పేర్కొన్నారు. ఈ ప్రాంతాల్లో పిడుగులు పడే అవకాశం ఎక్కువగా ఉన్నందున ప్రజలు అత్యవసరమైతే తప్ప బయటకు రాకపోవడమే మంచిది.

భారీ వర్షాలు కురిసే జిల్లాలతో పాటు శ్రీసత్యసాయి, అన్నమయ్య, చిత్తూరు జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని అధికారులు అంచనా వేస్తున్నారు. వీటితో పాటు మన్యం, అల్లూరి, విశాఖ, అనకాపల్లి, పశ్చిమగోదావరి, మార్కాపురం, ప్రకాశం, నెల్లూరు, అనంతపురం, వైఎస్సార్ కడప, తిరుపతి జిల్లాల్లో కూడా పిడుగుల శబ్దాలతో తేలికపాటి జల్లులు కురుస్తాయని వాతావరణ శాఖ వివరించింది.

ఆకస్మికంగా ఉరుములు, మెరుపులతో వర్షం పడే సమయంలో ప్రజలు ఎవరూ కూడా పెద్ద పెద్ద చెట్ల కింద, విద్యుత్ స్తంభాల పక్కన, హోర్డింగ్స్ కింద నిలబడకూడదని అధికారులు గట్టిగా సూచిస్తున్నారు. ముఖ్యంగా పొలాల్లో పనులు చేసుకునే రైతులు, గొర్రెలు లేదా పశువులను కాసే పశుకాపరులు మరింత అప్రమత్తంగా ఉండాలి. ఆకాశం మేఘావృతమై ఉరుముల శబ్దం వినబడగానే పొలాల్లో ఉండకుండా వెంటనే సురక్షితమైన బిల్డింగుల లోపలికి వెళ్లాలని కోరారు. అలాగే వర్షపు గాలుల వల్ల ఎక్కడైనా విద్యుత్ వైర్లు తెగిపడి ఉంటే వాటికి దూరంగా ఉండటం ప్రాణ రక్షణకు ఎంతో ముఖ్యం.

వర్షాల ముప్పు ఇలా ఉంటే.. కొన్ని జిల్లాల్లో మాత్రం ఎండల తీవ్రత తీవ్ర రూపం దాల్చనుంది. మంగళవారం రోజున పోలవరం, ఏలూరు, ఎన్టీఆర్, గుంటూరు, పల్నాడు జిల్లాల్లోని కొన్ని ప్రాంతాల్లో ఏకంగా 42 నుంచి 44 డిగ్రీల మధ్య గరిష్ఠ ఉష్ణోగ్రతలు రికార్డు అయ్యే అవకాశం ఉందని విపత్తుల నిర్వహణ సంస్థ తెలిపింది. అలాగే పార్వతీపురంమన్యం, కాకినాడ, కోనసీమ, తూర్పుగోదావరి, కృష్ణా, బాపట్ల, మార్కాపురం, ప్రకాశం, నెల్లూరు జిల్లాల్లోని కొన్ని ప్రాంతాల్లో 40 నుంచి 42 డిగ్రీల మధ్య సెల్సియస్ ఉష్ణోగ్రతలు నమోదవుతాయని పేర్కొన్నారు.

సోమవారం నమోదైన వివరాల ప్రకారం నెల్లూరు జిల్లా గూడూరులో 43.6 డిగ్రీలు, మార్కాపురం జిల్లా నందనమారెళ్లలో 43.3, తిరుపతి జిల్లా వెంకటగిరిలో 43.1 డిగ్రీల అత్యధిక వేడి నమోదైంది. ఇక చిత్తూరు జిల్లా సింధురాజపురంలో 42.2, పల్నాడు జిల్లా మాచర్లలో 41.5 డిగ్రీల ఉష్ణోగ్రతలు నమోదయ్యాయి. ఏపీతో పాటు పొరుగు రాష్ట్రమైన తెలంగాణలో సైతం అక్కడక్కడ ఉరుములు, మెరుపులతో కూడిన వర్షాలు కురుస్తాయని వాతావరణ శాఖ స్పష్టం చేసింది.